ມື້ນີ້ຂໍພາທ່ານໄປຮູ້ຈັກກັບກົດໝາຍຂອງອິນເດຍ ທີ່ກຳນົດຫ້າມເຜີຍຊື່ເຫຍື່ອການຂົ່ມຂືນຝືນໃຈ ແລະ ມ້ວນທ້າຍກັບກົດໝາຍຫ້າມໃຊ້ມືຖືເວລາບັນຊາເຂົາລົດຖີບ ໃນປະເທດໂຮນລັງ.
ທີ່ ປະເທດອິນເດຍ: ການເຜີຍຊື່ຂອງຜູ້ເຄາະຮ້າຍໃນຄະດີຂົ່ມຂືນຝືນໃຈນັ້ນ ເປັນຄວາມຜິດທີ່ຕ້ອງໄດ້ຮັບໂທດຕາມກົດໝາຍຂອງອິນເດຍ ວ່າກັນວ່າ ກົດໝາຍນີ້ມີໜ້າທີ່ປ້ອງກັນບໍ່ໃຫ້ເຫຍື່ອການຂົ່ມຂືນມີປົມດ້ອຍຕິດຫ້ອຍຊີວິດ ແລະ ປະຫວັດສ່ວນຕົວຕະຫຼອດໄປ ເຖິງວ່າເຫຍື່ອຈະເສຍຊີວິດໄປແລ້ວກໍຕາມ ພາຍໃຕ້ກົດໝາຍດັ່ງກ່າວ ກໍໄດ້ມີຂ່າວໃນທ້າຍເດືອນເມສາ ປີ 2018 (ຕາມຂ່າວໜັງສືພິມຜູ້ແທນປະຊາຊົນ) ວ່າ: ສານສູງສຸດຂອງອິນເດຍ ໄດ້ສັ່ງປັບໃໝບໍລິສັດສື່ມວນຊົນ 12 ແຫ່ງ ເປັນຈຳນວນເງິນ 1 ລ້ານຣູປີ ຈາກແຕ່ລະບໍລິສັດ (ເປັນເງິນລາວປະມານ 118 ລ້ານກີບ) ຍ້ອນຄວາມຜິດທີ່ໄດ້ລາຍງານຂ່າວໂດຍລະບຸຊື່ເດັກຍິງອາຍຸ 8 ປີ ທີ່ຖືກກຸ່ມຄົນບໍ່ດີຂົ່ມຂືນແລ້ວຂ້າຖິ້ມ.
ເດັກຍິງທີ່ຕົກເປັນເຫຍື່ອຄວາມຮຸນແຮງຄັ້ງນີ້ ຖືກລັກພາຕົວ ຖືກກັກຂັງ ວາງຢາ ແລະ ຖືກຂົ່ມຂືນເປັນເວລາ 5 ວັນ ແລ້ວຖືກທຸບຕີຈົນເສຍຊີວິດ ກົດໝາຍອິນເດຍສະບັບນີ້ ກຳນົດຫ້າມເປີດເຜີຍຊື່ຜູ້ເຄາະຮ້າຍຈາກການຂົ່ມຂືນ ບໍ່ວ່າຈະເປັນການເປີດເຜີຍເຫຍື່ອທີ່ຍັງມີຊີວິດຢູ່ ຫຼື ຫຼັງຈາກເສຍຊີວິດແລ້ວກໍຕາມ ນອກຈາກໂທດປັບໃໝແລ້ວ ຍັງມີໂທດຈຳຄຸກສູງສຸດອີກ 2 ປີ ເຊິ່ງຂຶ້ນກັບການຄົ້ນຄວ້າພິຈາລະນາຂອງສານ ກຸ່ມທະນາຍຄວາມຂອງ 12 ບໍລິສັດທີ່ຖືກປັບໃໝໄດ້ຖະແຫຼງຕໍ່ສານວ່າ: ຄວາມຜິດພາດຂອງບໍລິສັດສື່ ເກີດຂຶ້ນຍ້ອນບໍ່ຮູ້ວ່າການເປີດເຜີຍຊື່ຂອງເຫຍື່ອເປັນຄວາມຜິດທາງກົດໝາຍ ທັງນີ້ກໍເພາະວ່າເຫຍື່ອໄດ້ເສຍຊີວິດລົງແລ້ວ.
ທີ່ ປະເທດໂຮນລັງ: ປະເທດທີ່ມີຈຳນວນລົດຖີບຫຼາຍກວ່າຈຳນວນພົນລະເມືອງນັ້ນແມ່ນປະເທດໂຮນລັງ (ບາງຄົນນິຍົມເອີ້ນວ່າ ໂຮນແລນ ຫຼື ເນເທີແລນ) ຄື: ມີລົດຖີບຈຳນວນ 23 ລ້ານຄັນຕໍ່ພົນລະເມືອງ ຈຳນວນ 17 ລ້ານຄົນ ລົດຖີບກັບວິຖີຊີວິດຂອງຄົນໂຮນແລນນັ້ນ ບໍ່ຕ່າງຫຍັງກັບປາ ແລະ ນ້ຳ ດັ່ງນັ້ນ ຈຶ່ງບໍ່ເປັນເລື່ອງແປກທີ່ປະເທດມີມົນລະພິດທາງອາກາດໜ້ອຍທີ່ສຸດໃນໂລກ ເມື່ອມີຄົນຈຳນວນຫຼວງຫຼາຍເລືອກໃຊ້ລົດຖີບເປັນພາຫະນະຕົ້ນຕໍ ໃນການເຄື່ອນໄຫວໄປມາຕາມຖະໜົນ ແນ່ນອນກໍຕ້ອງມີກົດລະບຽບຄວບຄຸມຄືດຽວກັບພາຫະນະອື່ນໆ ທັງນີ້ກໍເພື່ອປ້ອງກັນບໍ່ໃຫ້ເກີດອຸບັດເຫດກັບລົດສອງຕີນຊະນິດນີ້ ຍ້ອນແນວນີ້ ປະເທດນີ້ຈຶ່ງໄດ້ຂຶ້ນແຜນສ້າງກົດໝາຍຫ້າມໃຊ້ໂທລະສັບມືຖື (ສະມາດໂຟນ) ເວລາບັນຊາເຂົາລົດຖີບ.
ການລິເລີ່ມສ້າງກົດໝາຍສະບັບນີ້ ມີຂຶ້ນໃນທ້າຍປີ 2018 ແລະ ມີຜົນບັງຄັບໃຊ້ຕົວຈິງນັບແຕ່ເດືອນກໍລະກົດ ປີ 2019 ເປັນຕົ້ນມາ ສ່ວນການກຳນົດຫ້າມຜູ້ຂັບຂີ່ພາຫະນະຊະນິດອື່ນໆ (ທີ່ມີຂະໜາດໃຫຍ່ ແລະ ຄວາມແຮງກວ່າລົດຖີບ) ໃຊ້ໂທລະສັບມືຖືນັ້ນ ມີມາກ່ອນແລ້ວ ອັດຕາການປັບໃໝຜູ້ໃຊ້ໂທລະສັບມືຖືເວລາຂັບຂີ່ລົດຖີບ ຫຼື ລົດຊະນິດອື່ນໆນັ້ນ ສູງສຸດແມ່ນ 230 ເອີໂຣ ທີ່ຕ້ອງມີກົດໝາຍຫ້າມດັ່ງກ່າວ ກໍຍ້ອນວ່າໃນທຸກໆ 5 ກໍລະນີຂອງອຸບັດເຫດທີ່ເກີດຂຶ້ນກັບໄວໜຸ່ມໂຮນລັງນັ້ນມີ 1 ຄັ້ງທີ່ພົວພັນກັບການໃຊ້ໂທລະສັບມືຖືເວລາຂັບລົດ.