ຄະນະສະເພາະກິດເພື່ອປ້ອງກັນ ຄວບຄຸມ ແລະ ການແກ້ໄຂການລະບາດຂອງພະຍາດ COVID-19 ກະຊວງໂຍທາທິການ ແລະ ຂົນສົ່ງ (ຍທຂ) ໄດ້ອອກຄຳແນະນຳ ເພື່ອອະນຸຍາດໃຫ້ດຳເນີນການບໍລິການຂົນສົ່ງໂດຍສານ ຢູ່ພາຍໃນນະຄອນຫຼວງວຽງຈັນ ແລະ ຢູ່ພາຍໃນບັນດາແຂວງທົ່ວປະເທດ ໂດຍໃຫ້ຈັດຕັ້ງປະຕິບັດ ແຕ່ວັນທີ 4-17 ພຶດສະພາ 2020 ອີງຕາມຄຳແນະນຳ ສຳລັບການບໍລິການຂົນສົ່ງໂດຍສານຢູ່ພາຍໃນນະຄອນຫຼວງວຽງຈັນ ແລະ ຢູ່ພາຍໃນບັນດາແຂວງ ໃນການປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ກະຊວງໂຍທາທິການ ແລະ ຂົນສົ່ງ ສະບັບເລກທີ 292/ຍທຂ ລົງວັນທີ 3 ພຶດສະພາ 2020 ໃຫ້ຮູ້ວ່າ: ເພື່ອຮັບປະກັນການຈັດຕັ້ງປະຕິບັດມາດຕະການຜ່ອນຜັນ ຄຳສັ່ງຂອງທ່ານນາຍົກລັດຖະມົນຕີ ສະບັບເລກທີ 06/ນຍ ລົງວັນທີ 29 ມີນາ 2020 ໃຫ້ມີປະສິດທິຜົນ ແລະ ປ້ອງກັນການແຜ່ລະບາດຂອງພະຍາດໂຄວິດ-19.
ກະຊວງໂຍທາທິການ ແລະ ຂົນສົ່ງ ຄະນະສະເພາະກິດ ເພື່ອປ້ອງກັນ ຄວບຄຸມ ແລະ ການແກ້ໄຂການລະບາດຂອງພະຍາດ COVID-19 ອອກຄຳສັ່ງແນະນຳ ເພື່ອອະນຸຍາດໃຫ້ດຳເນີນການບໍລິການຂົນສົ່ງໂດຍສານ ຢູ່ພາຍໃນນະຄອນຫຼວງວຽງຈັນ ແລະ ຢູ່ພາຍໃນບັນດາແຂວງ ເຊິ່ງລວມມີລົດເມ ລົດຕູ້ ລົດຮັບສົ່ງພະນັກງານ ລົດຮັບສົ່ງກຳມະກອນ ລົດເຕັກຊີ ລົດສອງແຖວ ລົດຕຸກໆ ແລະ ລົດຈຳໂບ້ ໃຫ້ຈັດຕັ້ງປະຕິບັດຕາມມາດຕະການຄື: ຢູ່ສະຖານີລົດຂົນສົ່ງຜູ້ໂດຍສານ ແລະ ບ່ອນລໍຖ້າລົດເມ: ຕ້ອງຈັດສັນບ່ອນນັ່ງ ຫຼື ຢືນລໍຖ້າ ໂດຍໃຫ້ຮັກສາໄລຍະຫ່າງ ຢ່າງໜ້ອຍ 1 ແມັດຂຶ້ນໄປ ຕ້ອງມີການວັດແທກອຸນຫະພູມ ເຈລລ້າງມື ຫຼື ເຫຼົ້າສຳລັບຂ້າເຊື້ອຢູ່ໃນສະຖານີ ຕ້ອງມີສະບູລ້າງມື ແລະ ເຈ້ຍເຊັດມືຢູ່ໃນຫ້ອງນ້ຳຂອງສະຖານີ ຕ້ອງໃຫ້ມີຖັງໃສ່ຂີ້ເຫຍື້ອທີ່ມີຝາປິດ ແລະ ເໝາະສົມກັບປະລິມານຂອງຂີ້ເຫຍື້ອ ຕ້ອງມີການອະນາໄມຂ້າເຊື້ອກ່ອນໃຫ້ການບໍລິການ ປະຈຳວັນໃນສະຖານີ ໂດຍການສີດຢາຂ້າເຊື້ອ ຫຼື ເຊັດຖູວັດຖຸດ້ວຍແຟັບ ຫຼື ໄຮເຕີຕາມຕັ່ງນັ່ງ ຮາວຈັບ ແລະ ບ່ອນອື່ນໆທີ່ມີຄົນສຳຜັດເລື້ອຍໆ.
ຜູ້ຂັບລົດ ແລະ ຜູ້ຊ່ວຍ: ຕ້ອງໄດ້ວັດແທກອຸນຫະພູມກ່ອນຂຶ້ນລົດ ຖ້າພົບວ່າມີອຸນຫະສູງກວ່າ 37,5 ອົງສາ ແມ່ນເດັດຂາດບໍ່ໃຫ້ຂຶ້ນລົດ ແລະ ໃຫ້ໂທປຶກສາດ່ວນ 165 ຫຼື 166 ຕ້ອງໃສ່ຜ້າອັດປາກ-ດັງຕະຫຼອດເວລາ ຖ້າບໍ່ປະຕິບັດແມ່ນບໍ່ອະນຸຍາດໃຫ້ບໍລິການ ການຂົນສົ່ງເດັດຂາດ ຕ້ອງໝັ່ນລ້າງມືດ້ວຍເຈລລ້າງມື ຫຼື ສະບູ ແລະ ນ້ຳສະອາດທຸກຄັ້ງທີ່ໄດ້ສຳຜັດບ່ອນອື່ນໆ.
ຜູ້ໂດຍສານ: ຕ້ອງໄດ້ວັດແທກອຸນຫະພູມກ່ອນຂຶ້ນລົດ ຖ້າພົບວ່າມີອຸຫະພູມສູງກວ່າ 37,5 ອົງສາ ແມ່ນເດັດຂາດບໍ່ໃຫ້ຂຶ້ນລົດ ແລະ ໃຫ້ໂທປຶກສາດ່ວນ 165 ຫຼື 166 ຕ້ອງໃສ່ຜ້າອັດປາກ-ດັງຕະຫຼອດເວລາ ຖ້າບໍ່ໃສ່ຈະບໍ່ອະນຸຍາດໃຫ້ຂຶ້ນລົດເດັດຂາດ ຕ້ອງໝັ່ນລ້າງມືດ້ວຍເຈລລ້າງມື ຫຼື ສະບູ ແລະ ນ້ຳສະອາດທຸກຄັ້ງທີ່ໄດ້ສຳຜັດບ່ອນອື່ນໆ ຕ້ອງນັ່ງຕາມບ່ອນທີ່ກຳນົດໄວ້ຢູ່ໃນລົດ ໂດຍຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ ຕ້ອງຮັກສາມາລະຍາດໃນການໄອ-ຈາມ ຕ້ອງອັດປາກ ແລະ ຖິ້ມຂີ້ເຫຍື້ອຕ້ອງຮັບປະກັນ ຕ້ອງຮັກສາໄລຍະຫ່າງ 1 ແມັດຂຶ້ນໄປໃນເວລາຢືນ ຫຼື ນັ່ງລໍຖ້າຢູ່ສະຖານີ ແລະ ບ່ອນລໍຖ້າຂຶ້ນລົດ.
ຍານພາຫະນະຂົນສົ່ງ: ຕ້ອງມີການອະນາໄມຂ້າເຊື້ອກ່ອນໃຫ້ການບໍລິການປະຈຳວັນ ໂດຍການຂ້າເຊື້ອ ຫຼື ເຊັດຖູດ້ວຍນ້ຳແຟັບ ຫຼື ໄຮເຕີຕາມຕັ່ງນັ່ງ ຮາວຈັບ ບ່ອນໄຂປະຕູລົດ ພວງມາໄລ ແລະ ບ່ອນອື່ນໆທີ່ມີສຳຜັດເລື້ອຍໆ ຕ້ອງມີເຈລລ້າງມື ຫຼື ເຫຼົ້າຂ້າເຊື້ອປະຈຳລົດ ຕ້ອງກຳນົດ ແລະ ໝາຍບ່ອນນັ່ງຜູ້ໂດຍສານ ໂດຍຮັກສາໄລຍະຫ່າງຢ່າງໜ້ອຍ 1 ແມັດຂຶ້ນໄປ ຕ້ອງເປີດປະຕູ ຫຼື ແວ່ນຂ້າງ ເພື່ອລະບາຍອາກາດ ເວລາຈອດລົດ ຖ້າບໍ່ປະຕິບັດຕາມຄຳສັ່ງແນະນຳທີ່ຄະນະສະເພາະກິດວາງອອກ ຈະບໍ່ອະນຸຍາດໃຫ້ດຳເນີນການຂົນສົ່ງ ແລະ ໃສ່ວິໄນຕາມລະບຽບກົດໝາຍຂອງ ສປປ ລາວ.