ໃນໂລກທີ່ smart phone ເຊື່ອມຕໍ່ເຈົ້າກັບທ່ານໝໍໄດ້ພາຍໃນບໍ່ເທົ່າໃດວິນາທີ ສຸຂະພາບດິຈິຕອນ (Digital Health) ກຳລັງປ່ຽນແປງຮູບແບບການດູແລສຸຂະພາບ ແລະ ການເຂົ້າເຖິງການຮັກສາສຸຂະພາບ ສິ່ງທີ່ເຄີຍເປັນແນວຄິດໃນອະນາຄົດ ບັດນີ້ໄດ້ກາຍເປັນຄວາມເປັນຈິງ ດ້ວຍການເອົາເທັກໂນໂລຊີມາເປັນຫົວໃຈຂອງການດູແລສຸຂະພາບ ສ້າງລະບົບທີ່ເຂົ້າເຖິງໄດ້ທົ່ວໂລກ ແລະ ເພີ່ມອຳນາດໃຫ້ຜູ້ປ່ວຍ.
ການລະບາດຂອງໂຄວິດ-19 ເປັນໂຕກະຕຸ້ນທີ່ເຮັດໃຫ້ການນຳໃຊ້ເທັກໂນໂລຊີດ້ານສຸຂະພາບເກີດຂຶ້ນຢ່າງວ່ອງໄວ ຕັ້ງ ແຕ່ການປຶກສາແພດຜ່ານລະບົບ Online ຫາການຕິດຕາມການປິ່ນປົວພະຍາດຈາກໄລຍະໄກ ທຸກຄົນໄດ້ເຫັນວ່າ ການດູແລສຸຂະພາບບໍ່ຈຳເປັນຕ້ອງຢູ່ໃນໂຮງໝໍອີກຕໍ່ໄປ ແຕ່ຄວາມກ້າວໜ້າຢ່າງໄວນີ້ກໍໄດ້ເປີດເຜີຍບັນຫາໃໝ່ໆ ຕັ້ງແຕ່ການຄວບຄຸມກົດໝາຍ ແລະ ຈັນຍາບັນການນຳໃຊ້ຂໍ້ມູນ ເພື່ອຊອກຫາການຄວບຄຸມການເຮັດວຽກຮ່ວມກັນຢ່າງມີຈິດສຳນຶກ.
ໂອກາດ ແລະ ຄວາມທ້າທາຍໃນພາກພື້ນຕາເວັນອອກສຽງໃຕ້: ໃນພາກພື້ນ Western Pacific ການພັດທະນາດ້ານສຸຂະພາບ ດິຈິຕອນ ມີຄວາມແຕກຕ່າງກັນຢ່າງຫຼວງຫຼາຍ ຕາມພູມສັນຖານ ແລະ ສະພາບເສດຖະກິດ ບາງປະເທດມີຄວາມກ້າວໜ້າຢ່າງໄວ ໃນຂະນະທີ່ປະເທດອື່ນໆຍັງຢູ່ໃນຂັ້ນຕອນເລີ່ມຕົ້ນ ແຕ່ທີ່ເຫັນຮ່ວມກັນຄືວ່າ ການເຊື່ອມຕໍ່ອິນເຕີເນັດ ແລະ ການໃຊ້ smart phone ແມ່ນເພີ່ມຂຶ້ນຢ່າງໄວວາ ເຊິ່ງເຮັດໃຫ້ຜູ້ປ່ວຍ ແລະ ພະນັກງານສາທາລະນະສຸກມີຄວາມຄຸ້ນເຄີຍກັບເຄື່ອງມືດິຈິຕອນຫຼາຍຂຶ້ນ.
ລັດຖະບານຫຼາຍປະເທດເລີ່ມມີບົດບາດຫຼາຍຂຶ້ນ ໃນການກຳນົດມາດຕະຖານ ແລະ ກົດໝາຍການໃຊ້ເທັກໂນໂລຊີດ້ານສຸຂະພາບ ນອກຈາກນັ້ນ ບໍລິສັດເທັກໂນໂລຊີຂະໜາດໃຫຍ່ກໍເຂົ້າມາມີສ່ວນຮ່ວມຫຼາຍຂຶ້ນ ສ້າງການຮ່ວມມືລະຫວ່າງ ພາກລັດ ແລະ ພາກເອກະຊົນ ຢ່າງແຜ່ຫຼາຍ.
ການປະເມີນຂອງ WHO ຊີ້ໃຫ້ເຫັນວ່າ: ເຖິງແມ່ນຈະມີຄວາມຄືບໜ້າໃນດ້ານໂຄງສ້າງພື້ນຖານ ແລະ ການຈັດຕັ້ງການຄຸ້ມຄອງ ແຕ່ບາງດ້ານເຊັ່ນ ຄວາມເທົ່າທຽມ ການຮຽນຮູ້ກ່ຽວກັບດິຈິຕອນ ແລະ ການມີສ່ວນຮ່ວມຂອງພາກສ່ວນກ່ຽວຂ້ອງ ຍັງຕ້ອງການການພັດທະນາຫຼາຍກວ່ານີ້.
ສຸດທ້າຍ ສຸຂະພາບດິຈິຕອນ ຈະບໍ່ສາມາດປະສົບຜົນສຳເລັດໄດ້ ຖ້າຫາກວ່າມັນບໍ່ສາມາດເຂົ້າເຖິງທຸກຄົນ ທັງຜູ້ທີ່ເຂົ້າເຖິງເທັກໂນໂລຊີ ແລະ ຜູ້ທີ່ຍັງບໍ່ສາມາດເຂົ້າເຖິງ.
WHO ແລະ ພາລະກິດໃນການຂັບເຄື່ອນ ສຸຂະພາບດິຈິຕອນ: ອົງການອະນາໄມໂລກ (WHO) ມີພາລະກິດໃນການຊ່ວຍເຫຼືອປະເທດສະມາຊິກໃຫ້ນຳໃຊ້ ສຸຂະພາບດິຈິຕອນ ໄດ້ຢ່າງມີປະສິດທິຜົນ ໂດຍມຸ່ງເນັ້ນລະບົບທີ່ເນັ້ນຄົນເປັນສູນກາງ.
ການດຳເນີນການຫຼັກຂອງ WHO ປະກອບດ້ວຍ:
- ຊ່ວຍເຫຼືອປະເທດສະມາຊິກໃຫ້ພັດທະນາ ຍຸດທະສາດສຸຂະພາບດິຈິຕອນ ທີ່ສອດຄ່ອງກັບແຜນສາທາລະນະສຸກແຫ່ງຊາດ.
- ສົ່ງເສີມ ການແລກປ່ຽນຄວາມຮູ້ ແລະ ປະສົບການ ລະຫວ່າງປະເທດ.
- ໃຫ້ ການສະໜັບສະໜູນທາງເທັກນິກ ຕາມຂອບເຂດຍຸດທະສາດ 5 ດ້ານຂອງກອບການພື້ນຖານພາກພື້ນ.
- ສ້າງ ເຄືອຂ່າຍນັກຊຽ່ວຊານ ແລະ ພາກຮ່ວມມືດ້ານເຕັກນິກ ເພື່ອສະໜັບສະໜູນການດຳເນີນງານ.
- ສະໜັບສະໜູນການລົງທຶນແບບຍືນຍົງໃນນະວັດຕະກໍາດິຈິຕອນທີ່ກວ້າງຂວາງກວ່າ ການດູແລສຸຂະພາບແບບດັ້ງເດີມ.
ໃນອະນາຄົດຂ້າງໜ້າ ພາກພື້ນປາຊີຟິກຕາເວັນຕົກຢືນຢູ່ຈຸດຕັດກັນທີ່ສຳຄັນ ສຸຂະພາບດິຈິຕອນສາມາດຂະຫຍາຍຊ່ອງຫວ່າງລະຫວ່າງຜູ້ເຊື່ອມຕໍ່ ແລະ ຜູ້ທີ່ຖືກກີດກັນ ຫຼື ເຊື່ອມຕໍ່ມັນຜ່ານການຮ່ວມມື ນະວັດຕະກໍາ ແລະ ການປົກຄອງແບບມີສ່ວນຮ່ວມ ໃນຂະນະທີ່ WHO ແລະ ຄູ່ຮ່ວມງານຂອງຕົນສືບຕໍ່ນໍາພາການຫັນປ່ຽນດິຈິຕອນນີ້ ສິ່ງໜຶ່ງທີ່ແນ່ ນອນຄື: ອະນາຄົດຂອງສຸຂະພາບບໍ່ພຽງແຕ່ກ່ຽວກັບໂຮງໝໍ ແລະ ທ່ານໝໍເທົ່ານັ້ນ ມັນກ່ຽວກັບຂໍ້ມູນ ອຸປະກອນ ແລະ ການເຊື່ອມຕໍ່ດິຈິຕອນທີ່ໃຫ້ຄວາມສໍາຄັນກັບປະຊາຊົນ.
ສຳລັບ ສປປ ລາວ “ຍຸດທະສາດ ສຸຂະພາບດິຈິຕອນ ຂອງ ສປປ ລາວ 2023-2027″ ຈັດພິມໂດຍກະຊວງສາທາລະນະສຸກໃນເດືອນມັງກອນ 2023 ໄດ້ກຳນົດວິທີການທີ່ສົມບູນແບບໃນການຫັນການດູແລສຸຂະພາບເປັນດິຈິຕອນໃນລາວ ໂດຍຮັບຮູ້ເຖິງຄວາມຕ້ອງການສຳລັບວິທີແກ້ໄຂ ສຸຂະພາບດິຈິຕອນ ທີ່ສອດຄ່ອງກັນ ຍຸດທະສາດດັ່ງກ່າວແກ້ໄຂບັນຫາທີ່ມີຢູ່ແລ້ວໃນດ້ານຄຸນນະພາບຂໍ້ມູນ ການເຂົ້າເຖິງ ແລະ ພື້ນຖານໂຄງລ່າງ ດ້ວຍ 37 ໂຄງການຍຸດທະສາດໃນຫ້າບຸລິມະສິດຫຼັກ ມັນມີຈຸດປະສົງເພື່ອສ້າງລະບົບນິເວດສຸຂະພາບດິຈິຕອນທີ່ມີການຄຸ້ມຄອງທີ່ດີ.
ບຸລິມະສິດຫຼັກປະກອບມີ:
- ການພັດທະນາກຳລັງແຮງງານ: ເສີມສ້າງທັກສະດິຈິຕອນພາຍໃນກຳລັງແຮງງານສາທາລະນະສຸກ ຮັບປະກັນຄວາມສາມາດແລະຄວາມເປັນຜູ້ນຳໃນ ສຸຂະພາບດິຈິຕອນ.
- ການຄຸ້ມຄອງ: ການສ້າງຕັ້ງການກວດກາ ແລະ ການຄວບຄຸມສຳລັບກິດຈະກຳສຸຂະພາບດິຈິຕອນ ສົ່ງເສີມການຮ່ວມມືລະຫວ່າງຜູ້ມີສ່ວນຮ່ວມ.
- ມາດຕະຖານ ແລະ ການເຮັດວຽກຮ່ວມກັນ: ການກຳນົດມາດຕະຖານຂໍ້ມູນເພື່ອອຳນວຍຄວາມສະດວກໃນການແລກປ່ຽນຂໍ້ມູນທີ່ລຽບງ່າຍໃນທົ່ວລະບົບສຸຂະພາບ.
- ການນຳໃຊ້: ການສ້າງເວທີສຸຂະພາບດິຈິຕອນແບບລວມສູນ ລວມທັງການລົງທະບຽນຄົນເຈັບ ແລະ ລະບົບຂໍ້ມູນການຄຸ້ມຄອງ.
- ພື້ນຖານໂຄງລ່າງ: ການປັບປຸງອິນເຕີເນັດ ແລະ ຄວາມສາມາດໃນການເກັບຮັກສາຂໍ້ມູນເພື່ອສະໜັບສະໜູນສຸຂະພາບອີເລັກໂທຣນິກໃນທົ່ວສະຖານທີ່ສຸຂະພາບ.
ຍຸດທະສາດດັ່ງກ່າວ ເນັ້ນໜັກເຖິງການຮ່ວມມືກັບຄູ່ຮ່ວມງານພາຍໃນ ແລະ ສາກົນ ດ້ວຍງົບປະມານປະມານຕໍ່າກວ່າ 9 ລ້ານໂດລາ ຮອດປີ 2027 ມັນໄດ້ວາງວິໄສທັດໃຫ້ມີລະບົບນິເວດສຸຂະພາບດິຈິຕອນທີ່ເຂັ້ມແຂງ ແລະ ສາມາດເຮັດວຽກຮ່ວມກັນໄດ້ ເຊິ່ງຊ່ວຍເສີມຂະຫຍາຍການໃຫ້ບໍລິການດ້ານສຸຂະພາບ ແລະ ການຕັດສິນໃຈໂດຍອີງໃສ່ຂໍ້ມູນໃນທົ່ວລາວ.
ຂໍ້ມູນຈາກ WHO