ການປ່ຽນແປງຂອງດິນຟ້າອາກາດໃນປັດຈຸບັນ ນັບມື້ຮ້າຍແຮງຂຶ້ນ ເຊິ່ງເກີດເປັນໄພພິບັດ ທີ່ສົ່ງຜົນກະທົບໃສ່ການພັດທະນາເສດຖະກິດ-ສັງຄົມຂອງຫຼາຍປະເທດໃນທົ່ວໂລກ ແລະ ສປປ ລາວ ກໍເປັນປະເທດໜຶ່ງທີ່ໄດ້ຮັບຜົນກະທົບອັນໜຶ່ງ ຈາກການປ່ຽນແປງຂອງສະພາບການດັ່ງກ່າວ ເຖິງແມ່ນວ່າຈະບໍ່ຮ້າຍແຮງເທົ່າກັບຫຼາຍປະເທດ ແຕ່ທຸກເຫດການທີ່ເກີດຂຶ້ນຈາກບັນຫາດັ່ງກ່າວນັ້ນ ແມ່ນສ້າງຄວາມເສຍຫາຍແກ່ຊັບສິນສ່ວນລວມ ຊີວິດ ແລະ ຊັບສິນຂອງປະຊາຊົນ.
ເນື່ອງຈາກການປ່ຽນແປງຂອງສະພາບອາກາດ ສົ່ງຜົນໃຫ້ເກີດບັນຫາຕ່າງໆຕາມມາ ເຊັ່ນ: ເກີດມີລົມພັດແຮງກະທັນຫັນ ຝົນຕົກເປັນຫຼາຍຊົ່ວໂມງກໍ່ໃຫ້ເກີດນ້ຳຖ້ວມ ດິນຊຸເຈື່ອນ ແລະ ອື່ນໆ ຍິ່ງໃນໄລຍະກ້າວສູ່ລະດູຝົນ ສະພາບອາກາດຍິ່ງມີຄວາມສັບສົນ ເຖິງແມ່ນວ່າທຸກໆກໍລະນີທີ່ຈະເກີດຂຶ້ນ ເຮົາບໍ່ສາມາດຮັບຮູ້ແນ່ນອນໄດ້ລ່ວງໜ້າ ແຕ່ກໍຕ້ອງໄດ້ລະມັດລະວັງເພື່ອບໍ່ໃຫ້ເກີດຄວາມເສຍຫາຍແກ່ຊີວິດ ແລະ ຊັບສິນຂອງເຮົາ.
ໃນແຕ່ລະປີ ໃນໄລຍະທີ່ສິ້ນສຸດລະດູແລ້ງ ຕໍ່ໃສ່ລະດູຝົນ ສະພາບອາກາດໃນໄລຍະນີ້ມີການປ່ຽນແປງຫຼາຍ ເກີດມີລົມພັດແຮງທີ່ເກີດຈາກລົມພາຍຸລະດູຮ້ອນ ກໍ່ໃຫ້ເກີດຕົ້ນໄມ້ໃຫຍ່ ເສົາໄຟຟ້າຫັກ-ລົ້ມ ກີດຂວາງເສັ້ນທາງກັນສັນຈອນ ທັບເຮືອນຊານບ້ານຊ່ອງຂອງປະຊາຊົນ ແລະ ອື່ນໆ.
ຫຼ້າສຸດໃນເວລາປະມານ 17:00 ໂມງຂອງວັນທີ 7 ພຶດສະພາ 2020 ເກີດມີລົມພັດແຮງໃນຫຼາຍທ້ອງຖິ່ນຂອງນະຄອນຫຼວງວຽງຈັນ ໄດ້ສ້າງຄວາມເສຍຫາຍແກ່ຊັບສິນຂອງລັດ ແລະ ຂອງປະຊາຊົນ ໂດຍສະເພາະ ກໍລະນີທີ່ເກີດຂຶ້ນຢູ່ເສັ້ນທາງເລກ 11 ບໍລິເວນບ້ານທ່າເດື່ອ ເມືອງຫາດຊາຍຟອງ ນະຄອນຫຼວງວຽງຈັນ ຈາກສະພາບການລົມພັດແຮງ ສົ່ງຜົນໃຫ້ເສົ້າໄຟຟ້າບໍລິເວນບ້ານດັ່ງກ່າວ ລົ້ມທັບເຮືອນຊານປະຊາຊົນ ແລະ ລົດກຳລັງສັນຈອນໄປມາ ສ້າງຄວາມເສຍຫາຍເປັນມູນຄ່າມະຫາສານ ຖືວ່າໂຊກດີບໍ່ມີຜູ້ເສຍຊີວິດ.
ຕໍ່ກັບສະພາບການທີ່ເກີດຂຶ້ນ ເປັນເລື່ອງທີ່ໜ້າເຫັນໃຈຕໍ່ກັບຜູ້ທີ່ເສຍຫາຍ ເພາະເປັນເລື່ອງທີ່ເກີດຂຶ້ນ ແບບສຸດວິໄສທີ່ບໍ່ມີສັນຍານເຕື່ອນວ່າຈະເກີດຂຶ້ນໃນມື້ໃດ ເວລາໃດ ຢ່າງໃດກໍຕາມ ກໍຂໍໃຫ້ເຫດການທີ່ເກີດຂຶ້ນຄັ້ງນີ້ ເປັນອີກບົດຮຽນ ປະສົບການຕໍ່ຜູ້ໃຊ້ລົດໃຊ້ຖະໜົນ ຕ້ອງມີສະຕິຕື່ມ ນອກຈາກເຕັກນິກຂອງພາຫະນະ ເລື່ອງຂອງການຂັບຂີ່ແລ້ວ ເຮົາຕ້ອງໄດ້ມາໃສ່ໃຈເລື່ອງການຕິດຕາມສະພາບການອາກາດຕື່ມອີກ ໂດຍສະເພາະ ເວລາກ່ອນທີ່ຈະອອກຈາກເຮືອນ ຫຼື ຈະກັບເຮືອນ ຄວນສັງເກດເບິ່ງສະພາບການຕົວຈິງ ຖ້າມີຝົນຕົກລົມພັດແຮງ ກໍບໍ່ຄວນເດີນທາງ ຖ້າຢຸດພັກເຊົາຝົນກໍຕ້ອງໃຫ້ສັງເກດເບິ່ງບໍລິເວນອ້ອມຮອບໃຫ້ດີ ເພື່ອຫຼີກລ່ຽງຜົນກະທົບທີ່ຈະເກີດຂຶ້ນ ເພາະເຫດການທີ່ເກີດຂຶ້ນນີ້ ບໍ່ແມ່ນເປັນກໍລະນີທຳອິດ ແລະ ບໍ່ແມ່ນເກີດຂຶ້ນສະເພາະຢູ່ນະຄອນຫຼວງວຽງຈັນ ຫຼາຍທ້ອງຖິ່ນໃນຂອບເຂດທົ່ວປະເທດກໍເຄີຍເກີດຂຶ້ນແລ້ວ.
ນອກຈາກກໍລະນີທີ່ມີເສົາໄຟຟ້າ ຕົ້ນໄມ້ຫັກທັບເຮືອນທັບລົດແລ້ວ ການຂັບຂີ່ໃນໄລຍະທີ່ມີຟ້າລົມຝົນຕົກແຮງ ຈະເຮັດໃຫ້ຄວາມສາມາດໃນການເບິ່ງເຫັນຫຼຸດລົງ ເສັ້ນທາງມື່ນ ຈະເຮັດໃຫ້ຄວາມສາມາດໃນການຄວບຄຸມລົດຫຼຸດລົງເຊັ່ນກັນ ເຊິ່ງອາດຈະກໍ່ໃຫ້ເກີດອຸບັດເຫດໄດ້.