ໂດຍ: ສ.ແສງງາມ
ໃນຍຸກທີ່ລາຄານ້ຳມັນຜັນຜວນ ແລະ ຄ່າຄອງຊີບຖີບຕົວສູງຂຶ້ນທຸກມື້ ການຊອກຫາທາງເລືອກໃໝ່ໃນການດຳລົງຊີວິດຈຶ່ງເປັນສິ່ງທີ່ຫຼາຍຄອບຄົວໃຫ້ຄວາມສົນໃຈ. ແຕ່ຈະມີຈັກຄົນທີ່ເລີ່ມຕົ້ນຈາກ “ຄວາມຕັ້ງໃຈ” ຢາກເຫັນສັງຄົມດີຂຶ້ນ ແລ້ວລົງມືເຮັດຈົນກາຍເປັນ “ສະຖານີສາກລົດໄຟຟ້າ EV ໜອງບອນ” ທີ່ຕອບໂຈດໃຫ້ກັບນັກຂັບຂີ່ໃນສັງຄົມປັດຈຸບັນ.
ໃນບົດຄວາມບົດນີ້ເຮົາຈະພາມາເວົ້າ ແລະ ເຈາະເລິກເຖິງ ເບື້ອງຫຼັງຄວາມສຳເລັດ ພ້ອມກັບແນວຄິດຂອງ ທ່ານ ສີໄທ ແກ້ວບຸນມາ ຜູ້ບຸກເບີກ ແລະ ເຈົ້າຂອງກິຈະການສະຖານີສາກລົດໄຟຟ້າແຫ່ງນີ້ ທີ່ເປີດໃຫ້ບໍລິການມາໄດ້ປະມານປີປາຍແລ້ວ. ເຊິ່ງຈຸດເລີ່ມຕົ້ນຈາກຄວາມຝັນແມ່ນ “ຢາກໃຫ້ປະຊາຊົນລາວປະຢັດ ແລະ ຫາຍໃຈໄດ້ເຕັມປອດ”
ເມື່ອຖາມເຖິງແຮງຈູງໃຈໃນການສ້າງຕັ້ງສະຖານີ ທ່ານ ສີໄທ ເລົ່າໃຫ້ຟັງດ້ວຍຄວາມຕັ້ງໃຈວ່າ: ທຸກຢ່າງເລີ່ມຕົ້ນຈາກຄວາມຢາກ “ສົ່ງເສີມໃຫ້ປະຊາຊົນລາວຫັນມາໃຊ້ລົດໄຟຟ້າໃຫ້ຫຼາຍຂຶ້ນ” ເພື່ອຫຼຸດ ຜ່ອນມົນລະພິດທາງອາກາດທີ່ເກີດຈາກກາບວນການນຳໃຊ້ພາຫະນະທົ່ວໄປ. “ແນ່ນອນວ່າການໃຊ້ EV ມັນຊ່ວຍປະຢັດຄ່າໃຊ້ຈ່າຍໃນຄອບຄົວໄດ້ຫຼາຍ ເມື່ອທຽບໃສ່ການໃຊ້ລົດນ້ຳມັນ ຍິ່ງໄປກວ່ານັ້ນກໍຫຼຸດຄ່າໃຊ້ຈ່າຍໃນການນຳເຂົ້ານ້ຳມັນເຊື້ອໄຟຈາກຕ່າງປະເທດ. ສຳລັບລາຄາບໍລິການພວກເຮົາຕັ້ງລາຄາໃຫ້ໃກ້ຄຽງກັບຄ່າໄຟຟ້າທີ່ໃຊ້ຢູ່ເຮືອນ ແຕ່ມີຄວາມໄວໃນການສາກທີ່ຕອບໂຈດ” ໂດຍສະເພາະກຸ່ມລູກຄ້າຫຼັກທີ່ທາງສະຖານີຕັ້ງໃຈຊ່ວຍເຫຼືອກໍຄື “ອ້າຍນ້ອງໂຊເຟີແທັກຊີ້” ເນື່ອງຈາກກຸ່ມນີ້ຕ້ອງການຫຼຸດຕົ້ນທຶນຄ່າໃຊ້ຈ່າຍໃນການເດີນທາງຫຼາຍທີ່ສຸດ ເພື່ອໃຫ້ເຂົາເຈົ້າສາມາດເກັບກຳໄລ ແລະ ບໍລິຫານຊີວິດປະຈຳວັນໄດ້ສະບາຍຂຶ້ນ.
ສິ່ງທີ່ເຮັດໃຫ້ສະຖານີ EV ໜອງບອນ ແຕກຕ່າງ ແລະ ກາຍເປັນຈຸດໝາຍປາຍທາງຂອງຜູ້ໃຊ້ລົດໄຟຟ້າ ບໍ່ແມ່ນພຽງແຕ່ເລື່ອງລາຄາ ແຕ່ແມ່ນ “ຄວາມສະດວກສະບາຍທີ່ພຽບພ້ອມ” ຍາກທີ່ຈະຫາບ່ອນໃດມາປຽບໄດ້ເຊັ່ນ: ສາກຢູ່ໃນຮົ່ມ 100%: ໝົດຫ່ວງເລື່ອງລົດຕາກແດດຕາກຝົນ ເພາະສະຖານີຖືກອອກແບບມາໃຫ້ຢູ່ໃນຮົ່ມຢ່າງດີ, ມູມພັກຜ່ອນ ແລະ ຕຽງນອນ ໄວ້ໃຫ້ລູກຄ້າໄດ້ຫຼັບພັກຜ່ອນຢ່າງສະບາຍລະ ຫວ່າງທີ່ລໍຖ້າລົດສາກແບັດ ພ້ອມນັ້ນຍັງມີລົດຈັກໄຟຟ້າໃຫ້ຂີ່ໄປທຸລະສ່ວນຕົວ: ຖ້າລູກຄ້າຕ້ອງການໄປເຮັດບາງສິ່ງບາງຢ່າງລະຫວ່າງສາກລົດ ພ້ອມນັ້ນໃນສະຖານີຍັງມີຮ້ານອາຫານ ແລະ ຮ້ານກາເຟໄວ້ໃຫ້ບໍລິການ.
ນອກນັ້ນ ອີກສິ່ງທີ່ສາມາດຶງດູດລູກຄ້າແມ່ນມາຮອດໄດ້ສາກເລີຍ ບໍ່ຕ້ອງຈອງຄິວ: ດ້ວຍຈຳນວນຫົວສາກທີ່ຂະຫຍາຍເພີ່ມຂຶ້ນຈົນເຖິງ 26 ຫົວໜ່ວຍ (ຄິດເປັນ 52 ຫົວຈ່າຍ) ເຮັດໃຫ້ລູກຄ້າຂັບລົດມາຮອດກໍສາມາດສາກໄດ້ທັນທີ ປັດຈຸບັນມີລູກຄ້າປະຈຳທີ່ມີປະມານ 40 ຄັນ (ຈາກຈຳນວນລົດທີ່ມາໃຊ້ບໍລິການທັງໝົດປະມານ 70–80 ຄັນຕໍ່ມື້), ທາງສະຖານພວກເຮົາມີພະນັກງານຕິດຕາມຊ່ວຍສາກໃຫ້ຕັ້ງແຕ່ຕອນທີ່ລູກຄ້ານຳລົດມາຈອດ ແລະ ຕິດຕາມຈົນສຳເລັດ ແລ້ວສາມາດຈອດລົດໄວ້ຈົນກວ່າລູກຄ້າຈະມາຮັບລົດ ໂດຍທີ່ລູກຄ້າບໍ່ຈຳເປັນຕ້ອງມາເຝົ້າໂດຍບໍ່ໄດ້ເກັບຄ່າຈອດລົດເພີ່ມ ສ່ວນຄ່າຄບໍລິການສາກໄຟຟ້າຕາມຕົວຈິງໃນອັດຕາ 2.700 ກີບ ຕໍ່ ກິໂລວັດໂມງ (kWh) ເທົ່ານັ້ນ.
ຕະຫຼອດໄລຍະປີກວ່າທີ່ຜ່ານມາທຸກຢ່າງເຕີບໂຕຂຶ້ນໄດ້ຍ້ອນຄວາມນິຍົມ ແລະ ຄວາມໄວ້ວາງໃຈຂອງລູກຄ້າ ເປັນການໂຄສະນາ “ປາກຕໍ່ປາກ” ຂອງລູກຄ້າທີ່ມາໃຊ້ບໍລິການແລ້ວປະທັບໃຈ ຈົນເຮັດໃຫ້ຈຳນວນຜູ້ໃຊ້ລົດໄຟຟ້າໃນກຸ່ມນີ້ເພີ່ມຂຶ້ນຢ່າງເຫັນໄດ້ຊັດເຈນ.
“ເຮົາດີໃຈທີ່ໄດ້ເປັນສ່ວນໜຶ່ງໃນການຊ່ວຍເຫຼືອສັງຄົມ ແລະ ຊ່ວຍລັດຖະບານໃນການປະຢັດງົບປະ ມານໃນການຳເຂົ້ານ້ຳມັນເຊື້ອໄຟຈາກຕ່າງປະເທດ ພ້ອມທັງອຳນວຍຄວາມສະດວກໃຫ້ກັບນັກຂັບຂີ່ ຫຼຸດ ຜ່ອນຄ່າໃຊ້ຈ່າຍ ເຊິ່ງຈະຊ່ວຍໃຫ້ເຂົາເຈົ້າເຫຼົ່ານັ້ນມີຊີວິດການເປັນຢູ່ທີ່ດີຂຶ້ນ” ທ່ານ ສີໄທ ຝາກຕອນທ້າຍພ້ອມດ້ວຍຮອຍຍິ້ມ.
ຖ້າທ່ານໃດກຳລັງຊອກຫາສະຖານທີ່ສາກລົດໄຟຟ້າທີ່ໃຫ້ຫຼາຍກວ່າພະລັງງານ ບ່ອນທີ່ມີຄວາມສະດວກສະບາຍ, ບ່ອນນອນພັກຜ່ອນ, ຮ້ານກາເຟ ແລະ ການບໍລິການທີ່ອົບອຸ່ນຄືຄົນໃນຄອບຄົວ… ສະຖານີສາກລົດໄຟຟ້າ EV ໜອງບອນ ພ້ອມຕ້ອນຮັບທຸກທ່ານ.