ທີ່ເອຢິບ: ການຖ່າຍເຊວຟີ (ໃຊ້ສະມາດໂຟນຖ່າຍເອົາຮູບຕົນເອງ) ກັບພາບຄົນອື່ນ ຫຼື ເຫດການທີ່ເກີດຂຶ້ນ ແລ້ວເຜີຍແຜ່ຜ່ານສື່ສັງຄົມອອນລາຍໃຫ້ຄົນ ສັງຄົມຮູ້ວ່າຕົນພວມເຮັດຫຍັງຢູ່ໃສ ຢູ່ກັບໃຜນັ້ນ ໄດ້ກາຍເປັນກະແສນິຍົມໃນການໃຊ້ໂທລະສັບມືຖື ແຕ່ເລື່ອງນີ້ຢູ່ໃນຫຼາຍໆປະເທດເຂົາມີມາດຕະການລົງໂທດກັນຢ່າງຈິງຈັງ ຖ້າຖ່າຍຮູບແບບເຊວຟີກັບເຫດການທີ່ບໍ່ສົມມາພາຄວນ ເຊັ່ນ: ຖ່າຍກັບພາບການໃຊ້ຄວາມຮຸນແຮງແບບສະຍົດສະຫຍອງ ຖ່າຍກັບພາບອຸບັດເຫດທີ່ມີຄົນບາດເຈັບ ລົ້ມຕາຍ ແລະອື່ນໆ ຕົວຢ່າງ ກໍລະນີດັ່ງກ່າວນີ້ ໄດ້ເກີດຂຶ້ນຢູ່ປະເທດເອຢິບ ເມື່ອ 3 ປີກ່ອນໜ້ານີ້ ເລື່ອງມີຢູ່ວ່າ ໄດ້ເກີດມີອຸບັດເຫດລົດໄຟຊົນກັນທີ່ນະຄອນອາເລັກຊັນເດຼຍ (ເມືອງໃຫຍ່ອັນດັບທີ 2 ຂອງເອຢິບ) ໃນເດືອນສິງຫາ ປີ 2017 ເຫດການດັ່ງກ່າວໄດ້ເຮັດໃຫ້ມີຄົນເສຍຊີວິດ 41 ຄົນ ສ່ວນຜູ້ທີ່ໄດ້ຮັບບາດເຈັບນັ້ນນັບບໍ່ຖ້ວນ ເມື່ອລົດແພດສຸກເສີນໄດ້ລົງໄປຮອດບ່ອນເກີດເຫດເປັນການດ່ວນ ແຕ່ແທນທີ່ຈະຮີບຮ້ອນໄປຊ່ວຍຄົນເຈັບ ນາຍແພດຈຳນວນ 6 ຄົນ ໄດ້ພາກັນໄປຢືນຖ່າຍເຊວຟີໃຫ້ເຫັນພາບສະຍົດສະຫຍອງທີ່ເກີດຈາກລົດໄຟຊົນກັນ ແລ້ວເຜີຍແຜ່ຜ່ານສື່ສັງຄົມອອນລາຍ ຜົນຮັບຈາກການເຜີຍແຜ່ພາບດັ່ງກ່າວ ກໍຄື ສຽງວິພາກວິຈານຢ່າງຟົດສະນັ່ນ ທັງມີການຮຽກຮ້ອງໃຫ້ລົງໂທດ “ນາຍແພດເຊວຟີ” ເຫຼົ່ານັ້ນຢ່າງສະສົມ ບາງສຽງວິພາກວິຈານເອີ້ນການຖ່າຍເຊວຟີຂອງນາຍແພດເຫຼົ່ານັ້ນວ່າ “ມະໂນທຳໄດ້ສິ້ນສະຕິຂັ້ນໂຄມາແລ້ວ” ທ່າມກາງສຽງວິພາກວິຈານດັ່ງກ່າວ ທາງກະຊວງສາທາລະນະສຸກ ກໍໄດ້ອອກຄຳສັ່ງລົງໂທດ ໂດຍການຍົກຍ້າຍແພດເຊວຟີ ທັງ 6 ຄົນ ໄປປະຈຳການຢູ່ເມືອງ ຊີວາ-ເຂດຫ່າງໄກສອກຫຼີກ ທາງພາກຕາເວັນຕົກຂອງປະເທດ ທ່ານ ອັກຄເມັດ ອານຊາຣີ ຫົວໜ້າກົມຈັດຕັ້ງກະຊວງສາທາລະນະສຸກເອຢິບ ບອກສັ້ນໆກ່ຽວກັບການກະທຳຂອງແພດທັງ 6 ຄົນວ່າ: “ເປັນການປະພຶດທີ່ບໍ່ເໝາະສົມເລີຍ”.
ທີ່ສິງກະໂປ: ການຖ່າຍຮູບ ຫຼື ການຖ່າຍທຳວິດີໂອໃນສະຖານທີ່ທີ່ເກີດເຫດໂຈມຕີແບບກໍ່ການຮ້າຍ ກໍຄື ການເຜີຍແຜ່ຂ່າວທີ່ບໍ່ເປັນທາງການ ກ່ຽວກັບການປະຕິບັດງານຂອງຕຳຫຼວດນັ້ນ ທາງການຂອງປະເທດສິງກະໂປ ໄດ້ມີກົດໝາຍຫ້າມຢ່າງເດັດຂາດ ກົດໝາຍດັ່ງກ່າວໄດ້ຖືກຮັບຮອງເອົາໂດຍ ສະພາແຫ່ງຊາດສິງກະໂປ ໃນຄັ້ງວັນທີ 21 ມີນາ 2018 ພາຍໃຕ້ກົດໝາຍສະບັບນີ້ ຕຳຫຼວດມີສິດຫ້າມການຖ່າຍຮູບ ຖ່າຍວີດີໂອ ເອົາເຫດການໃນສະຖານທີ່ທີ່ມີການໂຈມຕີແບບກໍ່ການຮ້າຍ ລວມທັງການບັນທຶກພາບ ບັນທຶກສຽງ ກ່ຽວກັບການເຄື່ອນໄຫວຂອງເຈົ້າໜ້າທີ່ຕຳຫຼວດ ເພື່ອເຜີຍແຜ່ເປັນຂ່າວ ເຫດຜົນທີ່ຕ້ອງມີກົດໝາຍກຳນົດຫ້າມດັ່ງກ່າວ ກໍແມ່ນເພື່ອຮັກສາຄວາມລັບບໍ່ໃຫ້ພວກໃຊ້ຄວາມຮຸນແຮງແບບກໍ່ການຮ້າຍ ສາມາດກຳໄດ້ຂໍ້ມູນການສືບສວນ-ສອບສວນຂອງເຈົ້າໜ້າທີ່ຕຳຫຼວດ ທາງການສິງກະໂປ ເຫັນວ່າ ຖ້າພວກກໍ່ການຮ້າຍສາມາດກຳໄດ້ ກ່ຽວກັບການປະຕິບັດງານຂອງເຈົ້າໜ້າທີ່ຕຳຫຼວດ ຜ່ານສື່ສັງຄົມອອນລາຍແລ້ວ ມັນກໍຈະກາຍເປັນໄພຄຸກຄາມຕໍ່ຊີວິດຂອງເຈົ້າໜ້າທີ່ຕຳຫຼວດ ທີ່ຮັກສາຄວາມສະຫງົບ ກໍຄື ຄວາມປອດໄພຂອງບັນດາຕົວປະກັນທີ່ພວກກໍ່ການຮ້າຍຈັບໄວ້.