ສື່ສັງຄົມອອນລາຍຂອງຫວຽດນາມ ເຊິ່ງມີລັກສະນະຄ້າຍຄືເຟສບຸກ ເປິດຕົວແລ້ວ ເມື່ອມໍ່ໆມານີ້ ໂດຍໃສ່ຊື່ວ່າ ກາໂປ (Gapo) ເຊິ່ງເປັນແອັບທາງມືຖືທີ່ໃຫ້ຜູ້ໃຊ້ສາມາດສ້າງໜ້າໂປຣຟາຍຂອງຕົນເອງ ແລະ ແຊຣ໌ ໂພສໃນໜ້າ “news feed” ເໝືອນເຟສບຸກ ໄດ້ດ້ວຍ.
ບໍລິສັດເຕັກໂນໂລຊີ G-Group ຂອງຫວຽດນາມເປັນຜູ້ພັດທະນາແອັບນີ້ຂຶ້ນມາ ໂດຍໃຊ້ເງິນລົງທຶນ 500.000 ລ້ານດົງ ຫຼື ປະມານ 22 ລ້ານໂດລາສະຫະລັດ.
ທ່ານ ຮາ ຕຣຶງ ກຽນ ຜູ້ບໍລິຫານລະດັບສູງຂອງ G-Group ບອກວ່າ ປັດຈຸບັນ ຊາວ ຫວຽດນາມເພິ່ງພາເຟສບຸກຫຼາຍເກີນໄປ ເນື່ອງຈາກບໍ່ມີສື່ສັງຄົມອອນລາຍອື່ນໃຫ້ເລືອກຫຼາຍປານໃດ ໂດຍ Gapo ຕັ້ງເປົ້າວ່າ ຈະມີຜູ້ໃຊ້ປະມານ 3 ລ້ານຄົນ ພາຍໃນປີນີ້ ແລະ ເພີ່ມເປັນ 20 ລ້ານຄົນພາຍໃນປີໜ້າ.
ກ່ອນໜ້ານີ້ຫວຽດນາມເຄີຍມີສື່ສັງຄົມ ອອນລາຍພາຍໃນປະເທດເກີດຂຶ້ນແດ່ແລ້ວ ເຊັ່ນ VietnamTa ແລະ Hahalolo ເຊິ່ງມີ ລັກສະນະຄ້າຍຄືເຟສບຸກເຊັ່ນກັນ ແຕ່ບໍ່ໄດ້ຮັບຄວາມນິຍົມຫຼາຍປານໃດ.
ຄວາມທ້າທາຍສຳຄັນຂອງສື່ສັງຄົມ ອອນ ລາຍໃນຫວຽດນາມ ຄືຄຸ້ມຄອງດ້ານເນື້ອໃນຢ່າງເຄັ່ງຄັດ.
ນອກຈາກນັ້ນ ຫວຽດນາມຫາກໍປະກາດໃຊ້ກົດໝາຍຄວາມໝັ້ນຄົງທາງໄຊເບີ ສະບັບໃໝ່ ເມື່ອຕົ້ນປີນີ້.