ການລົງພົບປະລະຫວ່າງຜູ້ມີສິດເລືອກຕັ້ງ ກັບສະມາຊິກສະພາແຫ່ງຊາດ ຊຸດທີ VIII ປະຈຳເຂດເລືອກຕັ້ງທີ 1 ນະຄອນຫຼວງວຽງຈັນ (ນວ) ນຳໂດຍທ່ານ ປຣະຈິດ ໄຊຍະວົງ ຮອງປະທານສະພາການຄ້າ ແລະ ອຸດສາຫະກຳ ນວ ປະທານສະມາຄົມຜູ້ຈັດສົ່ງສິນຄ້າລະຫວ່າງປະເທດ ສສຊ ຊຸດທີ VIII ທັງເປັນ ສສ ນວ ຊຸດທີ I ແລະ ທ່ານ ສຸກສະຫວັນ ບຸດຕະວົງ ຮອງເຈົ້າເມືອງຫາດຊາຍຟອງ ສະມາຊິກສະພາປະຊາຊົນ ນວ ສສ ນວ ຊຸດທີ I ເພື່ອເຜີຍແຜ່ຜົນສຳເລັດກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ ຊຸດທີ VIII ແລະ ສະພາປະຊາຊົນ ນວ ຊຸດທີ I ຢູ່ສະໂມສອນປົກຄອງເມືອງໃນອາທິດຜ່ານມາ ມີທ່ານ ຖາວອນ ສີຫາມາຍາ ຮອງເຈົ້າເມືອງຫາດຊາຍຟອງ ພ້ອມດ້ວຍການນຳຂັ້ນເມືອງ ແລະ ພະນັກງານອ້ອມຂ້າງ ເຂົ້າຮ່ວມ.
ໂອກາດນີ້ ທ່ານຮອງເຈົ້າເມືອງໄດ້ກ່າວລາຍງານຫຍໍ້ໃຫ້ຮູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງວ່າ: ສຳລັບການຜະລິດເນື້ອທີ່ນາແຊງ 4.339 ເຮັກຕາ ປະຕິບັດໄດ້ 100% ມີກຸ່ມປູກພືດຜັກສະອາດ 3 ກຸ່ມ ເນື້ອທີ 26 ເຮັກຕາ ກຸ່ມຜະລິດພືດຜັກອິນຊີ 2 ກຸ່ມ ເນື້ອທີ່ 9,84 ເຮັກຕາ ມີລະບົບຊົນລະປະທານ 17 ແຫ່ງ ສຳເລັດໂຄງການກໍ່ສ້າງຄູປ້ອງກັນນ້ຳຖ້ວມຄວາມຍາວ 32,2 ກິໂລແມັດ ປີ 2019 ໄດ້ຮັບອະນຸມັດງົບປະມານຈາກຂັ້ນເທິງ 42 ໂຄງການ ມູນຄ່າ 149,89 ຕື້ກີບ ຕົວເລກແຜນຈັດເກັບລາຍຮັບ 21,08 ຕື້ກີບ ປະຕິບັດໄດ້ 21,63 ຕື້ກີບ ເທົ່າກັບ 102,64% ລົງວັດແທກອອກໃບຕາດິນເປັນລະບົບໄດ້ 2.075 ຕອນ ອອກໃບຕາດິນສະເພາະຕອນໄດ້ຮັບເອກະ ສານ 84 ຕອນ ເບີກຈ່າຍໃຫ້ປະຊາຊົນແລ້ວ 1.140 ຕອນ ພ້ອມນີ້ ຍັງໄດ້ລາຍງານໃຫ້ຮູ້ຕໍ່ກັບວຽກງານອື່ນໆອີກ.
ຈາກນັ້ນ ສສຊ ແລະ ສສ ນວ ໄດ້ເຜີຍແຜ່ ແລະ ແຈ້ງໃຫ້ຊາບຕໍ່ບັນດາເນື້ອໃນຜົນສຳເລັດ ຂອງກອງປະຊຸມທີ່ທັງສອງສະພາໄດ້ຕົກລົງຄົ້ນຄວ້າພິຈາລະນາ ຮັບເອົາບັນຫາສຳຄັນຕ່າງໆຂອງຊາດຂອງ ນວ ແລະ ນຳມາເຜີຍແຜ່ຄັ້ງນີ້ຂອງສະພາແຫ່ງຊາດມີທັງໝົດ 9 ບັນຫາ ພ້ອມທັງຮັບຮອງເອົາກົດໝາຍໃໝ່ທີ່ປັບປຸງ 6 ກົດໝາຍ ສຳລັບສະພາປະຊາຊົນ ນວ ໄດ້ຍົກໃຫ້ເຫັນເຖິງ 8 ບັນຫາສຳຄັນດ້ວຍກັນ ທັງໄດ້ຮູ້ແຈ້ງຕໍ່ກັບພາລະບົດບາດສິດໜ້າທີ່ ຂອງສະພາທີ່ເປັນຕົວແທນຢ່າງແທ້ຈິງຂອງປະຊາຊົນ ສະມາຊິກສະພາທັງສອງໄດ້ລົງພົບປະຢູ່ເມືອງຫາດຊາຍຟອງມີທັງໝົດ 5 ຈຸດ ແລະ ໄດ້ສັງລວມເອົາຫຼາຍບັນຫາຂໍ້ຄິດເຫັນຕ່າງໆທີ່ປະຊາຊົນໄດ້ສະເໜີ ໂດຍສະເພາະ ບັນຫາເສດຖະກິດທີ່ຕິດພັນກັບຊີວິດການເປັນຢູ່ຂອງປະຊາຊົນເພື່ອໃຫ້ໄດ້ຮັບການແກ້ໄຂ ແລະ ນຳມາສະເໜີປຶກສາຫາລືຕໍ່ພາກສ່ວນກ່ຽວຂ້ອງຂັ້ນເມືອງ ໃຫ້ຄົ້ນຄວ້າມີການອະທິບາຍຊີ້ແຈງຢ່າງຊັດເຈນ ຈາກພາກສ່ວນທີ່ກ່ຽວຂ້ອງ ເພື່ອເລັ່ງຊ່ວຍແກ້ໄຂຂໍ້ຂ້ອງໃຈຂອງປະຊາຊົນທີ່ພົບບັນ ຫາຢ່າງຮີບດ່ວນ ແລະ ທັນເວລາ.