ບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ເປັນງານທາງສາສະໜາ ທີ່ປະຊາຊົນລາວບັນດາເຜົ່າໄດ້ເຄີຍປະຕິບັດສືບທອດກັນມາແຕ່ດົນນານ ອັນໄດ້ສະແດງເຖິງຮິດຄອງປະເພນີ ວິຖີຊີວິດ ແລະ ວັດທະນະທຳຂອງຄົນລາວ ເພື່ອຮັບປະກັນໃນໄລຍະງານບຸນປະເພນີດັ່ງກ່າວໃຫ້ມີຄວາມສະຫງົບ ປອດໄພ ມີຄວາມເປັນລະບຽບຮຽບຮ້ອຍທາງດ້ານສັງຄົມ ແລະ ບໍ່ໃຫ້ມີເຫດການທີ່ຮ້າຍແຮງເກີດຂື້ນ ເວົ້າລວມ ເວົ້າສະເພາະກໍຄືບັນຫາການເກີດອຸບັດເຫດຢູ່ຕາມຖະໜົນ ແລະ ເສັ້ນທາງຕ່າງໆໃນນະຄອນຫຼວງວຽງຈັນ.
ງານບຸນອອກພັນສາປະວໍລະນາ ແລະ ບຸນຊ່ວງເຮືອປະເພນີ ປະຈຳປີນີ້ ຈະຈັດຂຶ້ນແຕ່ວັນທີ 1-3 ຕຸລາ 2020 ທີ່ທ່າວັດຈັນ ເມືອງຈັນທະບູລີ ນະຄອນຫຼວງວຽງຈັນ ທາງເຈົ້າໜ້າທີ່ພະແນກຕຳຫຼວດຈະລາຈອນນະຄອນຫຼວງວຽງຈັນ ໄດ້ວາງກຳລັງປ້ອງກັນທັງໝົດ 52 ຈຸດ ພ້ອມເຈົ້າໜ້າທີ່ຕຳຫຼວດຈະລາຈອນ ນວ ຈຳນວນ 221 ສະຫາຍ ຍິງ 7 ສະຫາຍ ເຂົ້າປະຈຳຕາມຈຸດສຳຄັນຕ່າງໆໃນ 3 ເມືອງຄື: ເມືອງສີໂຄດຕະບອງ ຈັນທະບູລີ ແລະ ເມືອງສີສັດຕະນາກ ໃນນີ້ ມີຈຸດປ້ອງກັນວົງໃນ 30 ຈຸດ ແລະ ວົງນອກ 22 ຈຸດ (ປ້ອມສາມແຍກ ສີ່ແຍກ ແລະ ຕາມຮ່ອມ) ເພື່ອຫຼຸດຜ່ອນບັນຫາອຸບັດເຫດທີ່ຈະເກີດຂຶ້ນ.
ເພື່ອເຮັດໃຫ້ງານດັ່ງກ່າວນີ້ມີຄວາມສະຫງົບ ແລະ ປອດໄພ ຈາກການເກີດອຸບັດເຫດທາງຖະໜົນ ເຈົ້າໜ້າທີ່ພະແນກຕຳຫຼວດຈະລາຈອນ ນວ ຈຶ່ງໄດ້ຮຽກຮ້ອງມາຍັງບັນດາຜູ້ຂັບຂີ່ ຈົ່ງປະຕິບັດກົດລະບຽບຈະລາຈອນຢ່າງເຄັ່ງຄັດ ມີສະຕິທຸກໆຄັ້ງໃນການຂັບຂີ່ ເມົາແລ້ວຫ້າມຂັບລົດເປັນເດັດຂາດ ຈົ່ງຄວບຄຸມຄວາມໄວຂອງລົດ ຫ້າມຂີ່ລົດເປັນພຶງເປັນແພ ແລະ ຫ້າມຈອດລົດຊະຊາຍ ເຊິ່ງມັນຈະເປັນການກີດຂວາງການສັນຈອນ ແລະ ອາດຈະເກີດອຸບັດເຫດຕາມມາ.