ຈາກວິໄສທັດຂອງຜູ້ບຸກເບີກ ສູ່ການປ່ຽນໂສມໝູ່ບ້ານພູດອຍ: ບົດຮຽນການພັດທະນາທ່ອງທ່ຽວຊົນນະບົດຢູນນານ

ໂດຍ: ສ.ແສງ​ງາມ

ການພັດທະນາໝູ່ບ້ານທີ່ເຄີຍຫ່າງໄກຈາກຄວາມຈະເລີນ ໃຫ້ກາຍເປັນແຫຼ່ງທ່ອງທ່ຽວທີ່ດຶງດູດຜູ້ຄົນຈາກຫຼາຍປະເທດ ບໍ່ແມ່ນເລື່ອງທີ່ເກີດຂຶ້ນໄດ້ໃນຂ້າມຄືນ. ແຕ່ຕ້ອງອາໄສວິໄສທັດ, ຄວາມກ້າຄິດກ້າທຳຂອງຜູ້ບຸກເບີກ ຄຽງຄູ່ກັບການສະໜັບສະໜູນຈາກພາກລັດຢ່າງຕໍ່ເນື່ອງ. ເລື່ອງລາວຂອງ ທ່ານ ເຫີ ຊິນຫາຍ ປະທານບໍລິສັດ ຕີຊິງ ຊັງກາຣີລາ ປລາປູຣົງ ການກະເສດ ແລະ ການພັດທະນາການທ່ອງທ່ຽວ ເຂດເວີຍຊີ ຊັງກາຣີລາ ທັງ​ເປັນ​ປະ​ທານ​ສະ​ມາ​ຄົມ ໂຮມ​ສະ​ເຕ​ ແລະ ໂຮງ​ແຮມ ບ້ານ​ຊີ​ເປິຍ ແລະ ຊິນ​ຫາຍ ແຂວງຢູນນານ ຖືເປັນຕົວຢ່າງໜຶ່ງທີ່ສະທ້ອນໃຫ້ເຫັນພະລັງຂອງວິໄສທັດ ແລະ ການຮ່ວມມືໃນການພັດທະນາຊົນນະບົດ.

ທ່ານ ເຫີ ຊິນຫາຍ ປະທານບໍລິສັດ ຕີຊິງ ຊັງກາຣີລາ ປລາປູຣົງ ການກະເສດ ແລະ ການພັດທະນາການທ່ອງທ່ຽວ ເຂດເວີຍຊີ ຊັງກາຣີລາ ທັງ​ເປັນ​ປະ​ທານ​ສະ​ມາ​ຄົມ ໂຮມ​ສະ​ເຕ​ ແລະ ໂຮງ​ແຮມ ບ້ານ​ຊີ​ເປິຍ ແລະ ຊິນ​ຫາຍ ແຂວງຢູນນານ

ປະມານປີ 2006, ທ່ານ ເຫີ ຊິນຫາຍ ໄດ້ເລີ່ມຕົ້ນລົງມືສ້າງໂຮມສະເຕ ແລະ ບ້ານພັກພາຍໃນໝູ່ບ້ານ ໂດຍມີຄວາມເຊື່ອວ່າ ທຳມະຊາດ, ວິຖີຊີວິດ ແລະ ວັດທະນະທຳຂອງຊຸມຊົນ ຈະສາມາດດຶງດູດນັກທ່ອງທ່ຽວໃຫ້ເຂົ້າມາຢ້ຽມຢາມໄດ້. ແຕ່ໃນໄລຍະເລີ່ມຕົ້ນ ແນວຄິດດັ່ງກ່າວຕ້ອງພົບກັບຄວາມທ້າທາຍຫຼາຍດ້ານ. ໝູ່ບ້ານຍັງຂາດໂຄງລ່າງພື້ນຖານ, ເສັ້ນທາງຄົມມະນາຄົມບໍ່ສະດວກ, ລະບົບໄຟຟ້າ ແລະ ນ້ຳປະປາຍັງບໍ່ທົ່ວເຖິງ, ສ່ວນສິ່ງອຳນວຍຄວາມສະດວກກໍຍັງມີຂໍ້ຈຳກັດ. ການດຶງດູດນັກທ່ອງທ່ຽວຈຶ່ງບໍ່ໄດ້ງ່າຍດາຍຕາມທີ່ຄາດຫວັງ. ທ່ານ ເຫີ ຊິນຫາຍ ເຂົ້າໃຈວ່າ ການມີພຽງທຳມະຊາດທີ່ສວຍງາມອາດບໍ່ພຽງພໍ ຫາກຂາດເສັ້ນທາງ ແລະ ສິ່ງອຳນວຍຄວາມສະດວກທີ່ຈຳເປັນ. ດັ່ງນັ້ນ ການພັດທະນາຈຶ່ງບໍ່ສາມາດອາໄສພຽງຄວາມພະຍາຍາມຂອງບຸກຄົນ ຫຼື ຊຸມຊົນເທົ່ານັ້ນ ແຕ່ຈຳເປັນຕ້ອງມີການວາງແຜນ ແລະ ສະໜັບສະໜູນຈາກພາກລັດ.

ຈຸດປ່ຽນສຳຄັນເລີ່ມເກີດຂຶ້ນເມື່ອການ​ປົກ​ຄອງທ້ອງຖິ່ນ ກໍ​ຄື ລັດ​ຖະ​ບານ ໄດ້ເຂົ້າມາມີບົດບາດໃນການສະໜັບສະໜູນການພັດທະນາໝູ່ບ້ານ ໂດຍເນັ້ນໃສ່ການລົງທຶນດ້ານໂຄງລ່າງພື້ນຖານ. ໂດຍສະເພາະການປັບປຸງ ແລະ ຂະຫຍາຍເສັ້ນທາງຄົມມະນາຄົມ ເພື່ອໃຫ້ການເດີນທາງເຂົ້າ-ອອກໝູ່ບ້ານສະດວກຂຶ້ນ, ພ້ອມທັງຮັບປະກັນການສະໜອງໄຟຟ້າ ແລະ ນ້ຳປະປາໃຫ້ມີຄວາມໝັ້ນຄົງ ລວມທັງການຈັດສັນທີ່ດິນໃຫ້ປະຊາຊົນ.

ການລົງທຶນດ້ານຄົມມະນາຄົມມີຄວາມສຳຄັນເປັນພິເສດ ເພາະເສັ້ນທາງບໍ່ແມ່ນພຽງສິ່ງທີ່ຊ່ວຍໃຫ້ຄົນເດີນທາງໄດ້ສະດວກຂຶ້ນເທົ່ານັ້ນ ແຕ່ຍັງເປັນຂົວຕໍ່ທາງເສດຖະກິດ ທີ່ເຊື່ອມໂຍງຊຸມຊົນກັບຕະຫຼາດພາຍນອກ. ເມື່ອການເດີນທາງສະດວກຂຶ້ນ ນັກທ່ອງທ່ຽວກໍສາມາດເຂົ້າມາໄດ້ຫຼາຍຂຶ້ນ, ສິນຄ້າກະສິກຳ ແລະ ຜະລິດຕະພັນທ້ອງຖິ່ນກໍສາມາດຂົນສົ່ງໄປຈຳໜ່າຍໄດ້ສະດວກກວ່າເກົ່າ. ສິ່ງນີ້ຈຶ່ງກາຍເປັນພື້ນຖານສຳຄັນທີ່ຊ່ວຍປົດລັອກທ່າແຮງຂອງໝູ່ບ້ານ. ພາຍໃນປີ 2013 ໝູ່ບ້ານໄດ້ເລີ່ມມີໂຮມສະເຕ ແລະ ໂຮງແຮມທີ່ເປັນຮູບເປັນຮ່າງຫຼາຍຂຶ້ນ. ຈາກຈຸດເລີ່ມຕົ້ນຂອງຜູ້ບຸກເບີກ ແລະ ການສະໜັບສະໜູນຂອງພາກລັດ ໄດ້ກາຍເປັນແຮງຊຸ​ກ​ຍູ້ໃຫ້ປະຊາຊົນໃນຊຸມຊົນຫັນມາມີສ່ວນຮ່ວມໃນການບໍລິການທ່ອງທ່ຽວຫຼາຍຂຶ້ນ. ການພັດທະນາຍັງດຳເນີນຕໍ່ໄປ ເຖິງແມ່ນຈະປະເຊີນກັບສິ່ງທ້າທາຍຈາກການລະບາດຂອງພະຍາດໃນປີຕໍ່ໆມາ ຊຸມຊົນກໍຍັງພະຍາຍາມຍົກລະດັບມາດຕະຖານການບໍລິການ ເພື່ອກຽມພ້ອມຮອງຮັບນັກທ່ອງທ່ຽວ.

ປັດຈຸບັນ ໝູ່ບ້ານແຫ່ງນີ້ມີໂຮມສະເຕຫຼາຍກວ່າ 300 ແຫ່ງ ແລະ ສາມາດຕ້ອນຮັບນັກທ່ອງທ່ຽວໄດ້ຫຼາຍກວ່າ 10.000 ຄົນຕໍ່ປີ. ນີ້ບໍ່ພຽງແຕ່ສະທ້ອນໃຫ້ເຫັນການເຕີບໂຕຂອງອຸດສາຫະກຳທ່ອງທ່ຽວເທົ່ານັ້ນ ແຕ່ຍັງສະທ້ອນເຖິງໂອກາດທາງເສດຖະກິດທີ່ເພີ່ມຂຶ້ນຂອງປະຊາຊົນ.ປະຊາຊົນສາມາດນຳເອົາທີ່​ຢູ່​ອາ​ໃສມາປັບປຸງເປັນໂຮມສະເຕ, ປະກອບອາຊີບໃນການບໍລິການ, ຈຳໜ່າຍອາຫານ ແລະ ສິນຄ້າທ້ອງຖິ່ນ ເຊິ່ງຊ່ວຍສ້າງລາຍຮັບໃຫ້ແກ່ຫຼາຍຄອບຄົວ. ນອກຈາກການທ່ອງທ່ຽວແລ້ວ ເສດຖະກິດຂອງຊຸມຊົນຍັງເຕີບໂຕຈາກການຈຳໜ່າຍຜະລິດຕະພັນ​ຈາກເຄື່ອງ​ປ່າ​ຂອງ​ດົງ ໂດຍສະເພາະເຫັດຊົງ​ຫຼົງ ຫຼື ເຫັດ Matsutake ແລະ ເຫັດທຣັບເຟິລ (Truffle) ທີ່ມີມູນຄ່າສູງ. ໃນບາງກໍລະນີ ເຫັດ​ຊົງຫຼົງທີ່ມີຄຸນນະພາບດີສາມາດຈຳໜ່າຍໄດ້ໃນລາຄາສູງ​ເຖິງຫຼາຍ​ພັນຢວນຕໍ່ກິໂລກຣາມ. ໃນລະດູເກັບເຫັດລະຫວ່າງເດືອນກໍລະກົດຫາເດືອນພະຈິກ ນັກທ່ອງທ່ຽວຍັງສາມາດມາພັກອາໄສຮ່ວມກັບຊຸມຊົນ ແລະ ສຳຜັດກັບປະສົບການການເກັບເຫັດໃນປ່າພູເຂົາໄດ້ອີກດ້ວຍ.

ການເຕີບໂຕຂອງຂະແໜງການເຫຼົ່ານີ້ໄດ້ສ້າງໂອກາດວຽກເຮັດງານທຳໃຫ້ປະຊາຊົນໃນທ້ອງຖິ່ນ ໂດຍສະເພາະແມ່ຍິງ ທີ່ສາມາດເຂົ້າມາມີສ່ວນຮ່ວມໃນວຽກບໍລິການ ແລະ ການກະເສດ ພ້ອມທັງໄດ້ຮັບຄ່າຈ້າງປະຈຳວັນ ແລະ ສະຫວັດດີການດ້ານອາຫານການກິນ ແລະ ທີ່ພັກ. ຈາກການປະກອບອາຊີບແບບດັ້ງເດີມ ປະຊາຊົນຈຶ່ງມີທາງເລືອກດ້ານລາຍຮັບຫຼາຍຂຶ້ນ. ຂະນະດຽວກັນ ການສົ່ງເສີມຕະຫຼາດທ່ອງທ່ຽວສາກົນຍັງຊ່ວຍດຶງດູດນັກທ່ອງທ່ຽວຈາກຫຼາຍປະເທດໃນອາຊີຕາເວັນອອກສ່ຽງໃຕ້ ເຊັ່ນ ສິງກະໂປ, ມາເລເຊຍ ແລະ ໄທ ໃຫ້ເຂົ້າມາສຳຜັດກັບອາກາດທີ່ເຢັນສະບາຍ, ວັດທະນະທຳທ້ອງຖິ່ນ, ອາຫານ ແລະ ຜະລິດຕະພັນຈາກພື້ນທີ່.

ສຳລັບຊຸມຊົນທີ່ມີປະມານ 120 ຄອບຄົວ ໃນ​ບ້ານແຫ່ງນີ້ ການພັດທະນາບໍ່ໄດ້ຈຳກັດຢູ່ພຽງການສ້າງລາຍຮັບເທົ່ານັ້ນ ແຕ່ຍັງຂະຫຍາຍໄປເຖິງການແບ່ງປັນ ແລະ ຕອບແທນສັງຄົມ. ຊຸມຊົນ ແລະ ຜູ້ປະກອບການທີ່ປະສົບຜົນສຳເລັດ ໄດ້ຮ່ວມກັນບໍລິຈາກເງິນ ແລະ ວັດສະດຸ ເພື່ອສະໜັບສະໜູນການສຶກສາຂອງເດັກນ້ອຍ ລວມມູນຄ່າຫຼາຍກວ່າ 10 ລ້ານຢວນຕະຫຼອດໄລຍະຫຼາຍທີ່ຜ່ານມາ. ນີ້ສະທ້ອນໃຫ້ເຫັນວ່າ ເມື່ອເສດຖະກິດຂອງຊຸມຊົນເຕີບໂຕ ຜົນປະໂຫຍດກໍສາມາດຖືກນຳກັບຄືນມາພັດທະນາສັງຄົມໄດ້ເຊັ່ນກັນ. ຈາກຈຸດເລີ່ມຕົ້ນໃນປີ 2006 ທີ່ມີພຽງແນວຄິດຂອງຜູ້ບຸກເບີກ ມາຮອດມື້ນີ້ ການປ່ຽນແປງຂອງໝູ່ບ້ານໄດ້ສະທ້ອນໃຫ້ເຫັນບົດບາດທີ່ສຳຄັນຂອງທັງພາກເອກະຊົນ, ປະຊາຊົນ ແລະ ລັດຖະບານ.

ທ່ານ ເຫີ ຊິນຫາຍ ເປັນຜູ້ຈຸດປະກາຍແນວຄິດ ແລະ ກ້າລົງມືເຮັດ, ຂະນະທີ່ລັດຖະບານຈີນໄດ້ວາງຮາກຖານດ້ານໂຄງລ່າງ ໂດຍສະເພາະເສັ້ນທາງຄົມມະນາຄົມ ທີ່ເປັນປັດໄຈສຳຄັນໃນການເປີດໂອກາດທາງເສດຖະກິດ. ສ່ວນປະຊາຊົນກໍໄດ້ເຂົ້າມາມີສ່ວນຮ່ວມ ແລະ ນຳເອົາໂອກາດເຫຼົ່ານັ້ນມາປ່ຽນເປັນລາຍຮັບທີ່ເປັນຮູບປະທຳ.

ບົດຮຽນສຳຄັນຈາກໝູ່ບ້ານແຫ່ງນີ້ ຄື ການພັດທະນາຊົນນະບົດບໍ່ອາດອາໄສພຽງຜູ້ບຸກເບີກ ຫຼື ນະໂຍບາຍພາກລັດຢ່າງໃດຢ່າງໜຶ່ງ. ແຕ່ຕ້ອງເປັນການປະສານພະລັງລະຫວ່າງວິໄສທັດຂອງຜູ້ນຳ, ການລົງທຶນຂອງລັດ, ການຮ່ວມມືຂອງຊຸມຊົນ ແລະ ການສ້າງໂອກາດທາງການຕະຫຼາດ. ເມື່ອປັດໄຈເຫຼົ່ານີ້ສາມາດເຊື່ອມໂຍງກັນໄດ້ ໝູ່ບ້ານພູດອຍທີ່ເຄີຍຫ່າງໄກ ກໍສາມາດກາຍເປັນແຫຼ່ງທ່ອງທ່ຽວທີ່ສ້າງລາຍຮັບ, ຍົກລະດັບຊີວິດການເປັນຢູ່ ແລະ ສ້າງຄວາມຫວັງໃໝ່ໃຫ້ແກ່ປະຊາຊົນໃນຊຸມຊົນໄດ້ຢ່າງແທ້ຈິງ.

error: Content is protected !!