ໃນບົດນີ້ຜູ້ຂຽນມີເລື່ອງອ່າວເກົ່າມາເລົ່າສູ້ຟັງ ເພື່ອໃຫ້ເຫັນວ່າ ໃນຂະແໜງການທ່ອງທ່ຽວນີ້ມັນມີທັງເລື່ອງດີ ແລະ ເລື່ອງທີ່ເຮັດໃຫ້ປວດຫົວໄປພ້ອມໆກັນ.
ທີ່ມາເລເຊຍ: ໃນຕົ້ນປີ 2016 ທີ່ ມາລາກາ ເມືອງທີ່ເປັນແຫຼ່ງທ່ອງທ່ຽວອັນລືຊື່ຂອງມາເລເຊຍ ໄດ້ເກີດມີເຫດການທີ່ສັງຄົມຂອງປະເທດນີ້ຍອມຮັບບໍ່ໄດ້ ຂ່າວບອກວ່າ ຢູ່ຕະຫຼາດມືດ ຈົງເກີວອກ (Jonker Walk) ມີຊາຍໃນໄວ 20 ປີ ກວ່າໆໄດ້ເອົາໄສ້ກອກທີ່ມີຮູບຮ່າງຄືອະໄວຍະວະເພດຊາຍ 100% ມາວາງຂາຍ ເຫດການຄັ້ງນີ້ ໄດ້ກາຍເປັນເລື່ອງວິພາກວິຈານກັນຢ່າງຟົດເດືອດວ່າ ເປັນການທຳລາຍຊື່ສຽງຂອງຕະຫຼາດມືດທີ່ລືຊື່ ເປັນການຝືນຕໍ່ຮີດຄອງປະເພນີ ແລະ ເປັນເລື່ອງອັບອາຍຂາຍໜ້າ ສ່ວນຊາຍຜູ້ກະທຳຜິດນັ້ນໄດ້ບອກວ່າ ເຂົາບໍ່ມີເຈດຕະນາແນວອື່ນ ເຂົາເຫັນວ່າແຕ່ໄສ້ກອກຮູບຮ່າງແບບນີ້ເປັນສິ່ງແປກຕາ ສາມາດດຶງດູດຄວາມສົນໃຈຂອງນັກທ່ອງທ່ຽວໄດ້ດີ ທ່ານ ຕັນຈຽນລູ ຫົວໜ້າກຸ່ມທຸລະກິດທີ່ຮັບຜິດຊອບບໍລິຫານຕະຫຼາດມືດແຫ່ງນີ້ບອກວ່າ: ເລື່ອງນີ້ຍອມຮັບບໍ່ໄດ້ເດັດຂາດ ຜູ້ກະທຳຜິດຕ້ອງຮັບຜິດຊອບທຸກຢ່າງ ແລະ ວ່າຈະຮັບປະກັນບໍ່ໃຫ້ເຫດການແບບນີ້ເກີດຂຶ້ນຢູ່ຕະຫຼາດມືດ ຈົງເກີວອກ ອີກເດັດຂາດ ຂ່າວໄດ້ມ້ວນທ້າຍວ່າ ທ້າວຜູ້ກໍ່ເລື່ອງຖືກຍົກເລີກໃບອະນຸຍາດຂາຍເຄື່ອງຢູ່ຕະຫຼາດແຫ່ງນີ້ ເພາະເຂົາເລືອກໄປຂາຍແນວບໍ່ແນວ ທັງໆທີ່ໃບທະບຽນທຸລະກິດອະນຸຍາດໃຫ້ເຂົາຂາຍ ແຕ່ສະເພາະເຄື່ອງລະລຶກ ແລະ ອາຫານປະເພດກັບແກ້ມເທົ່ານັ້ນ.
ທີ່ມຽນມາ: ມີຂ່າວທີ່ບອກວ່າ ທາງການຂອງມຽນມາບໍ່ໄວ້ໜ້ານັກທ່ອງທ່ຽວທີ່ມີການປະພຶດແບບລົບລູ່ວັດທະນະທຳ ຮີດຄອງປະເພນີຂອງຊາດ ໃນປີ 2015 ແລະ 2016 ທາງການມຽນມາໄດ້ລົງໂທດນັກທ່ອງທ່ຽວຕ່າງປະເທດ 3 ກໍລະນີ ທີ່ມີພຶດຕິກຳໝິ່ນປະໝາດສາສະໜາພຸດ ໃນປີ 2015 ຄົນນິວຊີແລນ ເຈົ້າຂອງບາຂາຍເຄື່ອງດື່ມຖືກຕັດສິນຈຳຄຸກ ເປັນເວລາ 10 ປີ ຍ້ອນເຂົາໄດ້ຮູບແຕ້ມພະສົງເພື່ອໂຄສະນາເຄື່ອງດື່ມໃນຮ້ານຂອງເຂົາ ຊຶ່ງຖືເປັນໂທດໃນຖານໝິ່ນປະໝາດສາສະໜາພຸດ ໃນເດືອນກໍລະກົດ 2016 ນັກທ່ອງທ່ຽວ ແອດສະປາຍຄົນໜຶ່ງ ກໍໄດ້ຖືກເນລະເທດຍ້ອນສັກຮູບພະພຸດທະຮູບໃສ່ຂາຂອງຕົນ ໃນເດືອນຕຸລາ 2016 ນັກທ່ອງທ່ຽວຊາວໂຮນລັງ ຖືກຕັດສິນຈຳຄຸກ 3 ເດືອນ ແລະ ອອກແຮງງານໜັກຍ້ອນໄດ້ລັກຖອດສາຍໂທລະໂຄ່ງທີ່ກະຈາຍບົດສູດຢູ່ໃນວັດແຫ່ງໜຶ່ງ ສານໄດ້ຕັດສິນວ່າ ການກະທຳຂອງເຂົາເປັນການໝິ່ນປະໝາດສາສະໜາ ນອກຈາກນັ້ນ ເວລານັກທ່ອງທ່ຽວຄົນນີ້ ໄປລັກປົດສາຍໂທລະໂຄ່ງຢູ່ສິມ ຜູ້ກ່ຽວບໍ່ໄດ້ປົດເກີບ ເຊິ່ງກໍຖືວ່າເປັນໂທດໜັກຕື່ມອີກ ນັກທ່ອງທ່ຽວຊາວໂຮນລັງຄົນນີ້ບອກວ່າ ເຂົາເຮັດໄປກໍຍ້ອນວ່າເຂົານອນບໍ່ຫຼັບ ຍ້ອນສຽງສູດ ບໍ່ໄດ້ມີເຈດຕະນາລົບລູ່ສາສະໜາຢ່າງໃດ ສຸດທ້າຍເຂົາກໍຍອມຖືກປັບໃໝເປັນເງິນ ຈຳນວນ 2.800 ໂດລາສະຫະລັດ ເພື່ອໃຫ້ຫວິດປາກຄຸກ.
ທີ່ປະເທດໄທ: ໃນເດືອນທັນວາ 2016 ກະຊວງການຄ້າໄທ ໄດ້ເປີດບັ້ນປຸກລະດົມບໍ່ໃຫ້ນັກທ່ອງທ່ຽວຕ່າງປະເທດຊື້ສິນຄ້າປອມຍ້ອມແມວ ທີ່ວາງຂາຍຢ່າງແຜ່ຫຼາຍໃນສະຖານທີ່ທ່ອງທ່ຽວ ທາງການໄທຖືວ່າ ສິນຄ້າປອມ-ສິນຄ້າລະເມີດລິຂະສິດເຫຼົ່ານີ້ ເຮັດໃຫ້ເສື່ອມເສຍຊື່ສຽງຂອງປະເທດ ບັ້ນປຸກລະດົມນີ້ໄດ້ເຮັດຜ່ານສະຖານທູດຕ່າງປະເທດໃນໄທ ພ້ອມດຽວກັນນັ້ນ ທາງການໄທກໍໄດ້ຂຶ້ນແຜ່ນປ້າຍຫ້າມຊື້ສິນຄ້າປອມ ທີ່ຕິດໄວ້ຕາມສະຖານທີ່ທ່ອງທ່ຽວຕ່າງໆ ສ່ວນບັນດາການຄ້າຂອງແຂວງຕ່າງໆນັ້ນ ກໍໄດ້ຮັບໜ້າທີ່ຕິດຕາມກວດກາ ສິນຄ້າປອມແປງ ເພື່ອບັນລຸເປົ້າໝາຍ ທາງການໄທໄດ້ຮ່ວມມືກັບເຈົ້າຂອງລິຂະສິດສິນຄ້າ ແລະ ເຈົ້າໜ້າທີ່ຕຳຫຼວດເພື່ອຮ່ວມກັນແກ້ໄຂບັນຫາດັ່ງກ່າວ.