ຫາກເວົ້າເຖິງເລື່ອງ “ນອນກົນ” ຫຼາຍຄົນອາດຈະເບິ່ງວ່າເປັນເລື່ອງປົກກະຕິ ແຕ່ຮູ້ຫຼືບໍ່ວ່າ ການນອນກົນສາມາດສົ່ງຜົນອັນຕະລາຍຕໍ່ສຸຂະພາບຂອງເຮົາໄດ້.
ການນອນກົນ ຄືສຽງຜິດປົກກະຕິທີ່ເກີດຂຶ້ນລະຫວ່າງການຫາຍໃຈໃນຂະນະນອນຫຼັບ ພົບໄດ້ຫຼາຍໃນເພດຊາຍຫຼາຍກວ່າເພດຍິງ ແລະ ຈະມີອາການໜັກຂຶ້ນເມື່ອອາຍຸຫຼາຍຂຶ້ນ ອາການນອນກົນມີທັງແບບທຳມະດາ ແລະ ແບບຮຸນແຮງ ຫຼືບາງຄັ້ງອາດມີພາວະຢຸດຫາຍໃຈຂະນະຫຼັບໄດ້.
ສາເຫດຂອງການນອນກົນ ສ່ວນຫຼາຍແມ່ນເນື່ອງຈາກ
– ຄວາມຕຸ້ຍ ເນື່ອງຈາກຄົນທີ່ມີນ້ຳໜັກຫຼາຍຈະມີໄຂມັນສະສົມຢູ່ທີ່ເນື້ອເຍື່ອຮອບຊ່ອງຄໍ ເຮັດໃຫ້ທາງເດີນຫາຍໃຈແຄບລົງ.
– ອາຍຸ ອາຍຸຫຼາຍ ມີສ່ວນເຮັດໃຫ້ກ້າມຊີ້ນບໍລິເວນທາງເດີນຫາຍໃຈສ່ວນຕົ້ນ ແລະ ເນື້ອເຍື່ອຕ່າງໆຂອງລຳຄໍຢ່ອນຍານ ຈຶ່ງມີສ່ວນໄປຂວາງກັ້ນທາງເດີນຜ່ານຂອງອາກາດເຮັດໃຫ້ທາງເດີນຫາຍໃຈຕີບແຄບລົງ ຈຶ່ງເກີດການສັ່ນເວລາຫາຍໃຈຂະນະຫຼັບຈຶ່ງເກີດສຽງກົນ.
– ການດື່ມເຫຼົ້າ ຄົນທີ່ດື່ມມັກພົບອາການນອນກົນຫຼາຍກວ່າຄົນທີ່ບໍ່ດື່ມ.
– ການສູບຢາ ເຮັດໃຫ້ເກີດການບວມຂອງເຍື່ອບຸຂອງລະບົບທາງເດີນຫາຍໃຈສ່ວນເທິງ ສາມາດເພີ່ມໂອກາດການເກີດການອຸດກັ້ນຂອງລະບົບທາງເດີນຫາຍໃຈສ່ວນເທິງໄດ້ ຈຶ່ງເປັນສາເຫດເຮັດໃຫ້ຕັນດັງ ແລະ ຫາຍໃຈບໍ່ສະດວກ.
– ການນອນຫງາຍກໍມີສ່ວນ ເພາະເມື່ອນອນຫງາຍ ລີ້ນຈະຕົກລົງໄປໃນລຳຄໍ ຈຶ່ງກໍການປິດກັ້ນຊ່ອງລຳຄໍໄດ້.
– ການເປັນຫວັດ ການມີເນື້ອງອກໃນໂພງດັງ ແລະ ພູມແພ້.
– ການຮັບປະທານຢາບາງຊະນິດ ເຮັດໃຫ້ເພີ່ມໂອກາດໃນການກົນ ເພາະອາດມີສ່ວນໄປເຮັດໃຫ້ທາງເດີນຫາຍໃຈແຫ້ງ ຫຼື ເກີດການເຄືອງຄາຍບໍລິເວນດັ່ງກ່າວ.
ການນອນກົນ ມີ 3 ລະດັບ
ລະດັບ 1 ຄື ການນອນກົນທົ່ວໄປ ມີສຽງບໍ່ດັງຫຼາຍ ການນອນກົນໃນລະດັບນີ້ຍັງບໍ່ສົ່ງຜົນຕໍ່ການຫາຍໃຈໃນຂະນະນອນຫຼັບ.
ລະດັບ 2 ຄື ການນອນກົນທີ່ເກີດຂຶ້ນເລື້ອຍ ຫຼື ຫຼາຍກວ່າ 3 ວັນຕໍ່ອາທິດ ໂດຍອາດສົ່ງຜົນຕໍ່ການຫາຍໃຈໃນລະດັບນ້ອຍເຖິງປານກາງໃນຂະນະນອນຫຼັບ.
ລະດັບ 3 ຄື ການນອນກົນເປັນປະຈຳທຸກວັນ ແລະ ມີສຽງດັງ ການນອນກົນໃນລະດັບນີ້ ມັກເກີດພາວະຢຸດຫາຍໃຈໃນຂະນະຫຼັບຮ່ວມນຳດ້ວຍ.
ຜົນກະທົບຕໍ່ສຸຂະພາບຈາກການນອນກົນ
– ສົ່ງຜົນເຮັດໃຫ້ສະໝອງໄດ້ຣັບອົກຊິແຊນບໍ່ພຽງພໍໃນຂະນະຫຼັບ ຈຶ່ງເກີດອາການອ່ອນເພຍ ຄວາມຈຳບໍ່ດີ ຫງຸດຫງິດງ່າຍ ສະມາທິຫຼຸດລົງ ເຮັດໃຫ້ຄຸນະພາບຊີວິດຫຼຸດລົງເນື່ອງຈາກສາເຫດນອນພັກຜ່ອນບໍ່ພຽງພໍ.
– ອາດເກີດຄວາມສ່ຽງນຳໄປສູ່ໂຣກຄວາມດັນເລືອດສູງ ໂຣກຫົວໃຈ ໂຣກຫຼອດເລືອດສະໝອງ ອຳມະພຶກ ອຳມະພາດ ໂຣກຊຶມເສົ້າ.
– ອາດສົ່ງຜົນໃຫ້ເກີດພາວະຢຸດຫາຍໃຈຂະນະຫຼັບ ຊຶ່ງເປັນຄວາມຜິດປົກກະຕິໃນການນອນຫຼັບ ມັກມີຄວາມກ່ຽວຂ້ອງ ແລະ ເກີດຂຶ້ນໄດ້ກັບຜູ້ທີ່ນອນກົນ ຫາກທ່ານພົບວ່າມີການກົນສຽງດັງລົບກວນການນອນຂອງຕົວເອງ ຫຼືຜູ້ທີ່ນອນຢູ່ຂ້າງໆ ຫາຍໃຈຂາດໆ ຫາຍໆ ເໝືອນຄົນຫາຍໃຈຕິດຂັດ ຫາຍໃຈບໍ່ສະດວກ ລຸກຂຶ້ນມາຫາຍໃຈເຮືອກເໝືອນຄົນຂາດອາກາດຫາຍໃຈ ຫຼືສຽງການຫາຍໃຈບໍ່ສະໝ່ຳສະເໝີ ມີການຢຸດຫາຍໃຈເປັນໄລຍະໆ ຄວນໄປພົບແພດເພື່ອຮັບການປິ່ນປົວ.
ວິທີປ້ອງກັນ ແລະ ການປິ່ນປົວ
ສຳລັບຜູ້ທີ່ນອນກົນໃນລະດັບທີ່ບໍ່ຮຸນແຮງ ສາມາດບັນເທົາ ແລະ ປ້ອງກັນໄດ້ດ້ວຍການປັບປ່ຽນພຶດຕິກຳເຊັ່ນ:
– ປັບທ່າທາງໃນການນອນ ເຝິກນອນຫຼັບໃນທ່ານອນແຄງ ເພາະການນອນຫງາຍ ເພີ່ມໂອກາດໃຫ້ລີ້ນໄປປິດກັ້ນທາງເດີນຫາຍໃຈ ຫຼື ອາດຈະຫັນມານອນໝອນສູງ ໃຊ້ໝອນຮອງໃຫ້ຫົວສູງຂຶ້ນປະມານ 30 ອົງສາຈາກແນວພື້ນພຽງ.
– ຄວບຄຸມນ້ຳໜັກ ຈຳກັດ ແລະ ຫຼຸດປະລິມານອາຫານ ໂດຍສະເພາະ ອາຫານປະເພດຄາຣ໌ໂບໄຮເດຣດ ແລະ ໄຂມັນ.
– ງົດເຄື່ອງດື່ມເຫຼົ້າ ໂດຍສະເພາະ ໃກ້ເວລາເຂົ້ານອນ.
– ອອກກຳລັງກາຍຢ່າງໜ້ອຍວັນລະ 30 ນາທີ 3 ວັນຕໍ່ອາທິດ ເພາະຈະເຮັດໃຫ້ກ້າມຊີ້ນບໍລິເວນທາງເດີນຫາຍໃຈສ່ວນເທິງຕຶງຕົວ ແລະ ກະຊັບ ເຮັດໃຫ້ທາງເດີນຫາຍໃຈສ່ວນເທິງກັບມາແຄບໃໝ່.
ສ່ວນຜູ້ທີ່ນອນກົນໃນລະດັບຮຸນແຮງ ຫຼືມີສາເຫດການກົນມາຈາກພາວະຢຸດຫາຍໃຈຂະນະຫຼັບ ຄວນໄປພົບແພດເພື່ອໃຫ້ແພດວິນິດໄສ ເພາະແພດອາດມີແນວທາງໃນການປິ່ນປົວອື່ນໆ ເຊັ່ນ ການໃຊ້ອຸປະກອນຊ່ວຍຫຼຸດການນອນກົນ, ການໃຊ້ຢາ ແລະ ການຜ່າຕັດຕ່າງໆ ເປັນຕົ້ນ.