ປະຊາກອນໃນພາກພື້ນອາຊີຕາເວັນອອກສຽງໃຕ້ ໃຊ້ອິນເຕີເນັດຜ່ານສະມາດໂຟນຫຼາຍທີ່ສຸດໃນໂລກ ໂດຍຄົນໄທສ້າງສະຖິຕິນຳໜ້າທຸກປະເທດໃນອາຊຽນ ດ້ວຍການໃຊ້ເວ ລາຫຼາຍກວ່າ 5 ຊົ່ວໂມງຕໍ່ມື້ເພື່ອທ່ອງໂລກອິນເຕີເນັດ ຕາມດ້ວຍອິນໂດເນເຊຍ ຟິລິບປິນ ແລະ ມາເລເຊຍ ທີ່ໃຊ້ເວລາຫຼາຍກວ່າ 4 ຊົ່ວໂມງ ໃນຂະນະທີ່ຄົນທັງໂລກ ໃຊ້ເວລາສະເລ່ຍປະມານ 3 ຊົ່ວໂມງ.
ຂໍ້ມູນດັ່ງກ່າວ ໄດ້ມາຈາກລາຍງານສຳຫຼວດກິດຈະກຳທາງເສດຖະກິດອອນລາຍໃນພາກພື້ນອາຊີຕາເວັນອອກສຽງໃຕ້ (“e-Conomy SEA 2019 – Swipe up and to the right: Southeast Asia’s $100 billion internet economy”) ທີ່ກູເກິລ ຈັດທຳຮ່ວມກັບກອງທຶນ ເທມາເສກ (Temasek) ຂອງລັດຖະບານສິງກະໂປ ແລະ ເບນ ແອນ ຄອມປານີ (Bain & Company) ບໍລິສັດໃຫ້ຄຳປຶກສາດ້ານທຸລະກິດ ເຊິ່ງອອກມາເມື່ອບໍ່ດົນຜ່ານມານີ້.
ລາຍງານດັ່ງກ່າວ ວັດການຈະເລີນເຕີບໂຕຂອງເສດຖະກິດອອນລາຍຜ່ານ 5 ພາກສ່ວນ ຄື ທຸລະກິດທ່ອງທ່ຽວອອນລາຍ ສື່ອອນລາຍ ເຊິ່ງລວມເຖິງການໂຄສະນາ ແລະ ການກຳນົດເວລາ ການໃຊ້ບໍລິການເອີ້ນລົດໂດຍສານຜ່ານແອັບພລິເຄຊັ່ນ ການຊື້ເຄື່ອງທາງອອນລາຍ ແລະ ການໃຊ້ບໍລິ ການການເງິນອອນລາຍ ແລະ ຄາດວ່າເສດຖະກິດອອນລາຍຈະເຕີບໂຕທະລຸຄວາມຄາດໝາຍ ມີມູນຄ່າຫຼາຍເຖິງ 100 ຕື້ໂດລາສະຫະລັດໃນປີນີ້.
ນອກຈາກນີ້ ຍັງໄດ້ທຳນາຍດ້ວຍວ່າ ຊ່ອງຫວ່າງຂອງການໃຊ້ອິນເຕີເນັດລະຫວ່າງມະຫານະຄອນທີ່ມີຜູ້ອາໄສຫຼາຍກວ່າ 10 ລ້ານຄົນ ແລະ ຊົນນະບົດ ຈະແຄບລົງ ເພາະຄົນໃນພື້ນທີ່ນອກເມືອງຈະຫັນມາໃຊ້ອິນເຕີເນັດຫຼາຍຂຶ້ນ ແລະ ຈະເຮັດໃຫ້ກິດຈະກຳເສດຖະກິດອອນລາຍນອກຫົວເມືອງໃຫຍ່ເຕີບໂຕຂຶ້ນ 4 ເທົ່າໃນອີກ 6 ປີຂ້າງໜ້າ.
ທັງນີ້ ລາຍງານຂອງກູເກິລບໍ່ໄດ້ສຳຫຼວດຜົນເສຍຂອງເສດຖະກິດອອນລາຍ ບໍ່ວ່າຈະເປັນພາວະການເສບຕິດເກມອອນລາຍຂອງເຍົາວະຊົນໃນພາກພື້ນ ຫຼື ຂີ້ເຫຍື້ອປລາສຕິກທີ່ເພີ່ມຫຼາຍຂຶ້ນ ຈາກການສັ່ງຊື້ອາຫານ ແລະ ສິນຄ້າອອນລາຍ ເປັນຕົ້ນ.