ບາງຄົນຍັງເວົ້າຕື່ມວ່າ ຜູ້ເວົ້າບໍ່ຮູ້ ຫຼື ຜູ້ຮູ້ບໍ່ໄດ້ເວົ້າ ຜູ້ຂຽນຄິດເຫັນຄຳບູຮານເວົ້າວ່າ: ກົກບໍ່ເຕື້ອງ ຕີງຕາຍຕັ້ງແຕ່ງ່າ ບາດວ່າງ່າບໍ່ເຕື້ອງຕີງໄດ້ແຕ່ໃບ ບາງຄັ້ງເວລາໄປນັ່ງກິນກາເຟ ກໍມັກຈະໄດ້ຍິນວ່າ ທຸກມື້ນີ້ ບຸກຄົນຈະກ້າວໜ້າຕ້ອງຮູ້ຈັກລູບແຄ່ງ ເລຍຂາ ບາດວ່າ ນັກວິຊາການແທ້ (ຜູ້ຮູ້ແທ້) ພັດບໍ່ຮູ້ຈັກເວົ້າເອົາໃຈຫົວໜ້າ ຈຶ່ງບໍ່ກ້າວໜ້າ ຫຼື ໃນບາງໜ່ວຍງານຫົວໜ້າພັດມັກລູກນ້ອງເວົ້າບໍ່ຂັດໃຈຕົນ ອັນໃດທີ່ຕົນສະເໜີໄດ້ຜົນປະໂຫຍດ ບໍ່ມີ ໃຜຄັດຄ້ານ ຖືວ່າຖືກໃຈຕົນ.
ປາກົດການຫຍໍ້ທໍ້ໃນສັງຄົມບ້ານເຮົາ ມີຫຼາຍແບບບາງຄັ້ງກໍເກີດກັບພະນັກງານເອງ ຫຼື ບາງບ່ອນກໍເກີດຈາກປະຊາຊົນທີ່ມີສະພາບເສດຖະກິດ ແລະ ກະແສໂລກາພິວັດ ກະຕຸກຊຸກຍູ້ ຈົນເຫັນດີ ຕາມຄ່ານິຍົມ ທ່າອຽງບໍລິໂພກເຕັມໂຕ ຖ້າວ່າເຮົາຫຼົງເຫີ່ຄ່ານິຍົມທີ່ບໍ່ຖືກຕ້ອງກໍເທົ່າກັບພາກັນເທີດທູນຄ່ານິຍົມທີ່ຜິດພາດ ເຊິ່ງຈະນຳມາເຊິ່ງບັນຫາ ໃນຄອບຄົວ ແລະ ສັງຄົມ ເຊັ່ນ: ເລື່ອງການກິນດື່ມ ບາງຄົນກໍບອກວ່າ ມັນເລື່ອງທຳມະດາ ເວລາ ແລ້ວວຽກ ຫຼື ສະຫຼຸບໂຄງການນ້ອຍໃຫຍ່ ກໍສະ ຫຼອງດ້ວຍເຫຼົ້າເບຍ ເຊິ່ງປົນມາກັບການໃຊ້ເລ້ຫຼ່ຽມນອກໃຈຄູ່ຄອງ ພາໃຫ້ເກີດຄອບຄົວແຕກ ແຍກ.
ບັນຫາໄພງຽບຄອບຄົວແຕກແຍກສັງຄົມຮູ້ແກ່ໃຈ ເຊິ່ງທ່າອ່ຽງຫຼັກກໍແມ່ນ ຂໍ້ຖົກຖຽງ ເຈົ້າມີສິດ ຂ້ອຍກໍມີສິດ ຜົວ-ເມຍ ຂີ່ລົດໃຫຍ່ຄົນລະຄັນ ຈຶ່ງ ສະດວກໄປຄົນລະທາງ ຜູ້ຂຽນຕິດຕາມຟັງຫຼາຍຄົນ ເວົ້າບັນຫາຄອບຄົວແຕກແຍກ ສ່ວນໃຫຍ່ແມ່ນຄອບຄົວໄວກາງຄົນ ເມື່ອສ້າງຖານະຄອບຄົວມີເຮືອນ ມີລົດໃຫຍ່ຂີ່ຄົນລະຄັນ ຜົວ ແລະ ເມຍ ຈຶ່ງຊອກທາງໄປມ່ວນຊື່ນກັບໝູ່ຄູ່ ພໍໄປມ່ວນຊື່ນ ເລື້ອຍໆ ກໍເກີດບັນຫາພາໃຫ້ຄອບຄົວແຕກແຍກ ລູກທີ່ເກີດມາຈຶ່ງຮັບພາລະ ຊາຕາກຳ ຫຼີກລຽງບໍ່ ໄດ້ ລູກກຳພ້າພໍ່ແມ່ຍັງໝົດ.
ປາກົດການຫຍໍ້ທໍ້ຂອງສັງຄົມ ຈຶ່ງມີຫຼາຍແບບ ເຊັ່ນ: ສໍ້ໂກງ ລັກຊັບ ປຸ້ນຈີ້ ຄອບຄົວແຕກແຍກ ເກີດຈາກຫຼິ້ນກິນເສລີ ແລະ ຟຸມເຟືອຍ ມີທ່າອຽງ ສັງຄົມວຸ້ນວາຍຫຼາຍຂຶ້ນນັບມື້ ບາງທີ່ອາດຍ້ອນ ມີແຕ່ຜູ້ເວົ້າ ບໍ່ມີຜູ້ແກ້ ບາງກໍລະນີມີທັງນະໂຍບາຍ ແລະ ຄຳສັ່ງ ແຕ່ຖືກເຊື່ອງໄວ້ໃນລີ້ນຊັກໂຕະກໍມີ.
ຫັນມາສູ່ການນຳໃຊ້ຄົນ ບໍ່ວ່າພາກລັດ ກໍຄື ພາກເອກະຊົນ ມັນເຖິງເວລາແລ້ວທີ່ຈະຕ້ອງໃຊ້ ຄົນມີຄວາມຮູ້-ຄວາມສາມາດ ເພື່ອຫຼີກເວັ້ນຄຳ ວ່າ: ຜູ້ຮູ້ບໍ່ໄດ້ເຮັດ ຜູ້ເຮັດບໍ່ຮູ້ ຢູ່ພາກລັດ ປາກົດການສະກັດກັ້ນຜູ້ຮູ້ບໍ່ໄດ້ເຮັດມີຫຼາຍວິທີ ແຕ່ແຜ່ ຫຼາຍແມ່ນປະປ່ອຍ ບໍ່ໃຫ້ຄວາມສຳຄັນ ບໍ່ໃຫ້ເຂົ້າຢູ່ໃນຕຳແໜ່ງວົງໃນແກ່ຍາວໄປ ທ້າຍທີ່ສຸດຜູ້ຮູ້ ຜູ້ເກ່ງ ກໍເຖິງເກນອາຍຸຮັບບຳນານ ຈາກນັ້ນ ກໍສະແດງຄວາມອາໄລ-ອາວອນ ຮຽກຮ້ອງໃຫ້ເຂົ້າມາ ຊ່ວຍ ໃຫ້ຄວາມນັບຖື ແຕ່ມັນຊ້າເກີນໄປແລ້ວ ເພາະຜູ້ຖືກໜີບ ຖືກກົດໜ່ວງ ເຂົາຮູ້ທັນ ແລະ ເບື່ອໜ່າຍແລ້ວ? ເລີຍກາຍເປັນສະໝອງໄຫຼໄປສູ່ບ່ອນທີ່ເຂົາຕ້ອງການ.
ປາກົດການຜູ້ຮູ້ບໍ່ໄດ້ເຮັດ ຜູ້ເຮັດບໍ່ຮູ້ ແມ່ນອັນຕະ ລາຍຫຼາຍ.
ສະເໜີແລກປ່ຽນ
ໂດຍ: ດັ້ນກີບເມກ