ທ່ານ ເພັດ ພົມພິພັກ ລັດຖະມົນຕີ ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ຕ້ອນຮັບທ່ານ ຫູ ເຫວີຍຫົວ ປະທານບໍລິສັດ ຫົວເຫວີຍ ລາວ ແລະ ຄະນະ ວັນທີ 23 ກັນຍາຜ່ານມາ ແລະ ສະແດງຄວາມຂອບໃຈທີ່ບໍລິສັດດັ່ງກ່າວໄດ້ສະໜັບສະໜູນດ້ານເຕັກນິກໄອທີ ກໍຄືຜົນງານທີ່ໄດ້ຕໍ່ສູ້ກັບການລະບາດຂອງພະຍາດໂຄວິດ-19 ໃນໄລຍະຜ່ານມາ ພ້ອມທັງຖ່າຍທອດສິ່ງທີ່ທ່ານ ທອງລຸນ ສີສຸລິດ ນາຍົກລັດຖະ ມົນຕີ ສປປ ລາວ ໄດ້ກ່າວຄຳສະແດງຄວາມຂອບໃຈຕໍ່ບໍລິສັດຫົວເຫວີຍ ໃນການປະກອບສ່ວນສະໜອງລະບົບການປະຊຸມທາງໄກ ແລະ ອຸປະກອນຕ່າງໆຮັບໃຊ້ກອງປະຊຸມພົບປະລະຫວ່າງທ່ານ ນາຍົກລັດຖະມົນຕີ ສປປ ລາວ ແລະ ທ່ານນາຍົກລັດຖະມົນຕີ ສປ ຈີນ ລວມທັງກອງປະຊຸມຜູ້ນຳປະເທດແມ່ນ້ຳຂອງ-ແມ່ນ້ຳລ້ານຊ້າງ ຄັ້ງທີ 3 ໂດຍທ່ານ ທອງລຸນ ສີສຸລິດ ແລະ ທ່ານ ຫຼີ ເຄີ້ສຽງ ນາຍົກລັດຖະມົນຕີ ສປ ຈີນ ເປັນປະທານ ມີທ່ານນາຍົກລັດຖະມົນຕີລາຊະອານາຈັກກຳປູເຈຍ ປະທານາທິບໍດີ ສ ມຽນມາ ນາຍົກລັດຖະມົນຕີລາຊະອານາຈັກໄທ ແລະ ນາຍົກລັດຖະມົນຕີ ສສ ຫວຽດນາມເຂົ້າຮ່ວມ.
ໂອກາດດັ່ງກ່າວ ທ່ານ ເພັດ ພົມພິພັກ ກໍໄດ້ຕາງໜ້າໃຫ້ລັດຖະບານລາວ ມອບໃບຍ້ອງຍໍໃຫ້ທ່ານ ຫູ ເຫວີຍຫົວ ພ້ອມທັງສະແດງຄວາມຂອບໃຈຕໍ່ການສະໜັບສະໜູນຂອງຫົວເຫວີຍ ສຳລັບການປັບປຸງສຳນັກງານນາຍົກລັດຖະມົນຕີໃຫ້ທັນສະໄໝ ຫົວເຫວີຍ ເປັນບໍລິສັດນະວັດຕະກຳໄອຊີທີຊັ້ນນຳຂອງໂລກ ແລະ ຫວັງວ່າຫົວເຫວີຍລາວຈະສືບຕໍ່ນຳໃຊ້ເຕັກໂນໂລຊີທີ່ທັນສະໄໝ ມານຳໃຊ້ໃນການພັດທະນາເສດຖະກິດ-ສັງຄົມໃນ ສປປ ລາວ ຕື່ມອີກ.
# ຂ່າວ & ພາບ: ສະບາໄພ