ມາເຖິງປັດຈຸບັນ ພະຍາດໄຂ້ຍຸງລາຍ ຫຼື ໄຂ້ເລືອດອອກ ຍັງສືບຕໍ່ເພີ່ມຂຶ້ນຢ່າງຕໍ່ເນື່ອງ ສະແດງອອກໃນວັນທີ 29 ກັນຍາ 2020 ພຽງມື້ດຽວ ທົ່ວປະເທດມີຜູ້ຕິດເຊື້ອໃໝ່ຈຳນວນ 41 ກໍລະນີ ຈຶ່ງສົ່ງຜົນໃຫ້ຕົວເລກສະສົມຄົນເຈັບພະຍາດໄຂ້ຍຸງລາຍນັບມື້ນັບເພີ່ມຂຶ້ນ.
ອີງຕາມການໃຫ້ຂໍ້ມູນຂອງກະຊວງສາທາລະນະສຸກໃນວັນທີ 30 ກັນຍາ 2020 ໃຫ້ຮູ້ວ່າ: ນັບແຕ່ວັນທີ 28 ທັນວາ 2019 ຫາ 29 ກັນຍາ 2020 ທົ່ວປະເທດມີຄົນເຈັບຕິດເຊື້ອພະຍາດໄຂ້ຍຸງລາຍສະສົມ 6.812 ກໍລະນີ ແລະ ເສຍຊີວິດ 12 ຄົນ ໃນນັ້ນ ນະຄອນ ຫຼວງວຽງຈັນຍັງຄອງອັນດັບ 1 ທີ່ມີຜູ້ຕິດເຊື້ອພະຍາດໄຂ້ຍຸງສະສົມເຖິງ 1.585 ກໍລະນີ ເສຍຊີວິດ 4 ຄົນ ຮອງລົງມາແມ່ນບໍລິຄຳໄຊ 753 ກໍລະນີ ເສຍຊີວິດ 2 ຄົນ ບໍ່ແກ້ວ 680 ກໍລະນີ ວຽງຈັນ 664 ກໍລະນີ ສະຫວັນນະເຂດ 649 ກໍລະນີ ເສຍຊີວິດ 1 ຄົນ ຫຼວງພະບາງ 460 ກໍລະນີ ຫຼວງນ້ຳທາ 453 ກໍລະນີ ສາລະວັນ 392 ກໍລະນີ ຄຳມ່ວນ 385 ກໍລະນີ ເສຍຊີວິດ 2 ຄົນ ອັດຕະປື 319 ກໍລະນີ ໄຊຍະບູລີ 186 ກໍລະນີ ເສຍຊີວິດ 1 ຄົນ ອຸດົມໄຊ 98 ກໍລະນີ ເຊກອງ 83 ກໍລະນີ ໄຊສົມບູນ 54 ກໍລະນີ ຈຳປາສັກ 34 ກໍລະນີ ຜົ້ງສາລີ 12 ກໍລະນີ ເສຍຊີວິດ 1 ຄົນ ຊຽງຂວາງ 3 ກໍລະນີ ເສຍຊີວິດ 1 ຄົນ ແລະ ຫົວພັນ 2 ກໍລະນີ.
ເພື່ອປ້ອງກັນພະຍາດໄຂ້ຍຸງລາຍນັບມື້ນັບຫຼຸດລົງ ແລະ ກ້າວໄປເຖິງບໍ່ມີກໍລະນີໃໝ່ເກີດຂຶ້ນ ແລະບໍ່ມີຜູ້ເສຍຊີວິດເພີ່ມຂຶ້ນນັ້ນ ທຸກຄົນຄວນຫັນມາພ້ອມກັນເອົາໃຈໃສ່ປ້ອງກັນພະຍາດໄຂ້ຍຸງລາຍ ຄຽງຄູ່ໄປກັບການປ້ອງກັນພະຍາດໂຄວິດ-19 ກໍຄື ພະຍາດອື່ນໆ ດ້ວຍການຫັນມາເອົາໃຈໃສ່ປະຕິບັດຫຼັກການ 5 ປ ປາບໄຂ້ຍຸງລາຍຄື: ປິດຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນເພື່ອບໍ່ໃຫ້ຍຸງໄຂ່ໃສ່ ປ່ຽນນ້ຳ ແລະ ຜັດຖູພາຊະນະ ເຊັ່ນ: ເຕົ້າດອກໄມ້ ນ້ຳຮອງຕີນຕູ້ ຖ້ານຮອງຈອກ ແລະ ອື່ນໆ ປັບປຸງບໍ່ໃຫ້ມີນ້ຳຂັງໃນກະໂປະ ກະປ໋ອງ ຮາງລິນ ຢາງຕີນລົດເກົ່າ ແລະ ປະຕິບັດເປັນປະຈຳທຸກໆອາທິດ ຖ້າເປັນໄຂ້ໃຫ້ໄປປິ່ນປົວຢູ່ໂຮງໝໍ ຫຼື ສຸກສາລາໃກ້ບ້ານທ່ານ ຫ້າມຊື້ຢາມາກິນເອງ ຄວນໄປພົບແພດໝໍເພື່ອຮັບການປິ່ນປົວໃຫ້ທັນເວລາ ເພື່ອປ້ອງກັນການເສຍຊີວິດ ເຊິ່ງໃນໄລຍະຜ່ານມາ ມີຄົນເຈັບທີ່ເສຍຊີວິດຈຳນວນໜຶ່ງແມ່ນໄດ້ຊື້ຢາມາກິນເອງ ເມື່ອເກີດອາການສົນ ຫຼື ອາການໜັກ ແລ້ວຈຶ່ງໄປພົບແພດ ສົ່ງຜົນໃຫ້ແພດໝໍບໍ່ສາມາດກອບກູ້ຊີວິດໄດ້ຢ່າງທັນການ.
# ຂ່າວ & ພາບ: ເພັດສະໝອນ