ຄະນະສະເພາະກິດ ຮັບຜິດຊອບຕິດຕາມຜົນກະທົບ ແລະ ຜັນຂະຫຍາຍນະໂຍບາຍ ມາດຕະການ ເພື່ອຫຼຸດຜ່ອນຜົນກະທົບການລະບາດພະຍາດ COVID-19 ຕໍ່ເສດຖະກິດລາວ ຕາມຂໍ້ຕົກລົງຂອງທ່ານນາຍົກລັດຖະມົນຕີ ເລກທີ 32/ນຍ ລົງວັນທີ 3 ເມສາ 2020 ໄດ້ຈັດກອງປະຊຸມຂຶ້ນໃນວັນທີ 23 ກັນຍາ 2020 ທີ່ກະຊວງແຜນການ ແລະ ການລົງທຶນ ເປັນປະທານຂອງທ່ານ ສອນໄຊ ສີພັນດອນ ຮອງນາຍົກລັດຖະມົນຕີ ລັດຖະມົນຕີກະຊວງແຜນການ ແລະ ການລົງທຶນ ຫົວໜ້າຄະນະສະເພາະກິດ ມີບັນດາທ່ານໃນຄະນະສະເພາະກິດດັ່ງກ່າວ ຄະນະນຳຈາກກະຊວງກ່ຽວຂ້ອງ ລັດວິສາຫະກິດ ຕາງໜ້າສະພາການຄ້າ ແລະ ອຸດສາຫະກຳເຂົ້າຮ່ວມ.
ຈຸດປະສົງຂອງກອງປະຊຸມຄັ້ງນີ້ ເພື່ອຊຸກຍູ້ ແລະ ຕິດຕາມສະພາບການຜັນຂະຫຍາຍມາດຕະການແກ້ໄຂ ມາຮອດປັດຈຸບັນ ໄດ້ຄົ້ນຄວ້າລົງເລິກເພື່ອກຳນົດທິດທາງ ນະໂຍບາຍແກ້ໄຂ ຟື້ນຟູເສດຖະກິດໃນ 3 ເດືອນທ້າຍປີ ແລະ ໃນປີ 2021 ໃຫ້ເປັນຮູບປະທຳ ສາມາດຈັດຕັ້ງປະຕິບັດໄດ້ຢ່າງໄວ ຜົນຂອງກອງປະຊຸມໃນມື້ນີ້ ໄດ້ສັ່ງລວມເພື່ອລາຍງານຕໍ່ລັດຖະບານເພື່ອພິຈາລະນາໃນຂັ້ນຕໍ່ໄປ. ສະພາບການລະບາດຂອງພະຍາດໂຄວິດ-19 ໃນທົ່ວໂລກ ຍັງສືບຕໍ່ເພີ່ມທະວີຄວາມຮຸນແຮງຂຶ້ນໃນແຕ່ລະໄລຍະ ເຊິ່ງສະພາບດັ່ງກ່າວຍັງສືບຕໍ່ສົ່ງຜົນກະທົບຕໍ່ສະພາບເສດຖະກິດ ກໍຄືການດຳລົງຊີວິດຂອງປະຊາຊົນໃນທົ່ວໂລກ ແລະ ພາກພື້ນ ສະພາບດັ່ງກ່າວ ສືບຕໍ່ເປັນສິ່ງທ້າທາຍໃຫ້ແກ່ການພັດທະນາເສດຖະກິດ-ສັງຄົມ ຢູ່ໃນ ສປປ ລາວ ເຖິງແມ່ນວ່າພວກເຮົາຈະສາມາດສະກັດກັ້ນ ແລະ ປ້ອງກັນການແຜ່ລະບາດຂອງພະຍາດໂຄວິດ-19 ໄວ້ໄດ້ກໍຕາມ ນັບແຕ່ເດືອນເມສາ 2020 ລັດຖະບານກໍໄດ້ກຳນົດ ແລະ ຈັດຕັ້ງປະຕິບັດ 10 ມາດຕະການ ແລະ 9 ນະໂຍບາຍຕາມຂໍ້ຕົກລົງເລກທີ 31/ນຍ ແລະ ຫຼັງຈາກນັ້ນ ກໍໄດ້ສືບຕໍ່ອອກນະໂຍບາຍ ແລະ ມາດຕະການເພີ່ມຕື່ມ ເພື່ອແກ້ໄຂສະພາບຄວາມຫຍຸ້ງຍາກ ແລະ ຫຼຸດຜ່ອນຜົນກະທົບທາງດ້ານເສດຖະກິດຂອງການລະບາດພະຍາດ ໂຄວິດ-19 ໃນໄລຍະຜ່ານມາ ມາດຕະການ ແລະ ນະໂຍບາຍດັ່ງກ່າວ ໄດ້ຊ່ວຍແກ້ໄຂຫຼາຍບັນຫາທີ່ເກີດຂຶ້ນ ເປັນຕົ້ນ ການຜ່ອນຜັນເລື່ອນໄລຍະການຊຳລະພາສີ-ອາກອນ ຕົ້ນທຶນ ແລະ ດອກເບ້ຍສິນເຊື່ອ ຄຸ້ມຄອງການສະໜອງສິນຄ້າ ຮັກສາລະດັບລາຄາສິນຄ້າ ແລະ ແກ້ໄຂຂໍ້ຫຍຸ້ງຍາກໃນການຈໍລະຈອນສິນຄ້າ ອຸດໜູນເງິນຫວ່າງງານໃຫ້ແກ່ແຮງງານທີ່ໄດ້ຮັບຜົນກະທົບ ແລະ ຫຼຸດຄ່າບໍລິການສາທາລະນຸປະໂພກ ເຖິງຢ່າງໃດກໍຕາມ ການລະບາດພະຍາດໂຄວິດ-19 ຍັງສືບຕໍ່ສົ່ງຜົນກະທົບຕໍ່ເສດຖະກິດຫຼາຍດ້ານ ໂດຍສະເພາະ ຂະແໜງການທ່ອງທ່ຽວ ແລະ ການບໍລິການປິ່ນອ້ອມ ຍັງສືບຕໍ່ປະເຊີນກັບຄວາມຫຍຸ້ງຍາກໃນການດຳເນີນທຸລະກິດ ສະນັ້ນ ຈິ່ງມີຄວາມຈຳເປັນລັດຖະບານຈະໄດ້ປະເມີນຄືນ ບັນດາມາດຕະການທີ່ໄດ້ຈັດຕັ້ງປະຕິບັດຜ່ານມາ ແລະ ຄົ້ນຄວ້າອອກບາງມາດຕະການເພີ່ມໃນການແກ້ໄຂສະພາບຜົນກະທົບດັ່ງກ່າວ.
