ທ່ານຮູ້ຫຼືບໍ່ວ່າ “ມື” ຂອງເຮົານັ້ນ ເປັນແຫຼ່ງນຳເຊື້ອພະຍາດຫຼວງຫຼາຍ ສາມາດຕິດຕໍ່ຜ່ານການສຳຜັດ ເຊິ່ງມີຕົວຢ່າງພະຍາດທີ່ພົບໄດ້ເລື້ອຍໆ ບໍ່ວ່າຈະເປັນພະຍາດຕິດເຊື້ອລະບົບທາງເດີນຫາຍໃຈ ເຊັ່ນ: ຫວັດໄຂ້ຫວັດໃຫຍ່ ວັນນະໂຣກ ພະຍາດຕິດເຊື້ອທາງເດີນອາຫານ ເຊັ່ນ: ອາຈົມເຮ່ຍ ພະຍາດຕັບອັກເສບຊະນິດ A ອະຫິວາ ແລະ ເຊື້ອພະຍາດຊະນິດຕ່າງໆ ເຊິ່ງຕິດຕໍ່ໄດ້ຈາກການທີ່ມືປົນເປື້ອນເຊື້ອເຫຼົ່ານີ້ ແລ້ວຢິບຈັບອາຫານຮັບປະທານເຂົ້າໄປ ພະຍາດຕິດຕໍ່ຈາກການສຳຜັດໂດຍກົງ ເຊັ່ນ: ພະຍາດມື ຕີນ ປາກ ຕາແດງ ແຜອັກເສບທີ່ຜິວໜັງ ຂີ້ຫິດ ເຫົາ ຫຼື ພະຍາດທີ່ຕິດຕໍ່ໄດ້ຫຼາຍທາງ ເຊັ່ນ: ພະຍາດອີສຸກອີໃສ ອາດຕິດຕໍ່ໄດ້ຈາກການຫາຍໃຈ ແລະ ການສຳຜັດ ເປັນຕົ້ນ.
ນີ້ຄືເຫດຜົນດີໆ ທີ່ສາມາດອະທິບາຍໄດ້ວ່າ ເປັນຫຍັງເຮົາຕ້ອງລ້າງມືໃຫ້ເປັນນິໄສ
- ເພາະການລ້າງມືທີ່ຖືກວິທີ ມີປະສິດທິພາບທຽບເທົ່າກັບການສັກວັກຊີນ.
- ການລ້າງມືດ້ວຍນ້ຳ ແລະ ສະບູ ສາມາດຫຼຸດຈຳນວນການເສຍຊີວິດຈາກພະຍາດຖອກທ້ອງໄດ້ເຖິງ 50%.
- ເພາະເທິງມືຂອງເຮົາສາມາດມີແບກທີເຣຍ ເກາະໄດ້ເຖິງ 3.000 ຊະນິດ.
- ເນື່ອງຈາກແບກທີເຣຍສາມາດຢູ່ໄດ້ເຖິງ 3 ຊົ່ວໂມງ ແລະ ແບກທີເຣຍຕົວດຽວ ສາມາດແບ່ງຕົວໄດ້ເຖິງ 4.000.000 ຕົວ ໃນ 8 ຊົ່ວໂມງ.
- ເທິງສະມາທໂຟນ ສາມາດພົບແບກທີເຣຍຫຼາຍກວ່າ 30.000 ໂຕ.
- ໂຕະເຮັດວຽກ ຫຼື ແປ້ນພິມຄອມພິວເຕີ ສາມາດພົບແບກທີເຣຍໄດ້ຫຼາຍກວ່າໃນຫ້ອງນ້ຳ.
- ໂດຍການສຶກສາຂອງປະເທດສະຫະລັດອາເມຣິກາ ພົບວ່າການລ້າງມືຢ່າງຖືກວິທີເປັນເວລາ 20 ວິນາທີ ສາມາດຫຼຸດເຊື້ອພະຍາດໄດ້ເຖິງ 90%.
ເວລາໃດແດ່ ທີ່ຄວນລ້າງມື ?
- ກ່ອນຮັບປະທານອາຫານ.
- ກ່ອນ ແລະ ຫຼັງດູແລຜູ້ປ່ວຍ.
- ກ່ອນ ແລະ ຫຼັງການປົວບາດແຜ.
- ຫຼັງຈາກເຂົ້າຫ້ອງນ້ຳ.
- ກ່ອນ ໃນລະຫວ່າງ ແລະ ຫຼັງກຽມເຮັດອາຫານ.
- ຫຼັງຈາກການປ່ຽນຜ້າອ້ອມເດັກນ້ອຍ ຜູ້ປ່ວຍ ແລະ ຜູ້ສູງອາຍຸ.
- ພາຍຫຼັງການຈາມ ໄອ ຫຼື ສັ່ງນ້ຳມູກ.
- ພາຍຫຼັງການສຳຜັດຂີ້ເຫຍື້ອ.
- ພາຍຫຼັງສຳຜັດ ໃຫ້ອາຫານ ຫຼືການເກັບມູນສັດ ຂັ້ນຕອນລ້າງມືແບບງ່າຍໆ ໃຫ້ສະອາດ ຖືກຫຼັກອະນາໄມ.
- ເລີ່ມຈາກລ້າງມືດ້ວຍນ້ຳສະອາດ.
- ໃຊ້ສະບູໃນປະລິມານທີ່ພຽງພໍຕໍ່ການລ້າງມືໃນແຕ່ລະຄັ້ງ.
- ຈາກນັ້ນ ໃຊ້ຝາມືທັງສອງຂ້າງຖູກັນ ໂດຍສະຫຼັບກັນຖູ.
- ຖູຫຼັງມື ໂດຍສອດນິ້ວເຂົ້າໄປຖູງ່າມນິ້ວ ເຮັດສະຫຼັບກັນກັບມືອີກຂ້າງ.
- ຖູຝ່າມືດ້ວຍການໄຂວ່ນິ້ວມືທັງສອງຂ້າງເຂົ້າດ້ວຍກັນ ຄ້າຍທ່າປະສານມື.
- ຖູຫຼັງນິ້ວມືທັງສອງຂ້າງ.
- ໃຊ້ມືເບື້ອງຊ້າຍຈັບນິ້ວໂປ້ເບື້ອງຂວາແລ້ວໝູນໄປມາສະຫຼັບເບື້ອງ ເຮັດຊ້ຳແບບດຽວກັນ.
- ຖູປາຍນິ້ວເຂົ້າກັບຝາມື ໝູນເປັນວົງກົມ.
- ຖູຂໍ້ມື.
- ລ້າງສະບູ່ອອກດ້ວຍນ້ຳສະອາດ.
- ເຊັດມືໃຫ້ແຫ້ງ.
ຊາວບ້ານ – ນໍາສະເໜີ