ສື່ສັງຄົມອອນລາຍ “ເຟສບຸກ” ຖອດພາບທີ່ສະແດງເຖິງການທຳຮ້າຍຕົວເອງອອກຈາກໜ້າເຟສບຸກ ເຊິ່ງເປັນໜຶ່ງມາດຕະການຈັດການເນື້ອຫາທີ່ກ່ຽວຂ້ອງກັບການຂ້າຕົວຕາຍ ຈາກທີ່ມີກະແສວິຈານວ່າ ສື່ສັງຄົມອອນລາຍນັ້ນເປັນຊ່ອງທາງໃນການນຳສະເໜີເນື້ອຫາຮຸນແຮງ ແລະ ອັນຕະລາຍ.
ຖະແຫຼງການຂອງເຟສບຸກລະບຸວ່າ ເນື້ອຫາທີ່ສະແດງເຖິງການທຳຮ້າຍຕົວເອງ ຈະຖືກຄົ້ນຫາໄດ້ຍາກຂຶ້ນທາງອິນສະຕາແກຣມ ແລະ ທາງເຟສບຸກຈະໃຫ້ຄວາມເຊື່ອໝັ້ນວ່າ ເນື້ອຫາລັກສະນະນີ້ຈະບໍ່ປາກົດເທິງຖານເວທີ ເຖິງແມ່ນວ່າຈະເປັນການຄົ້ນຫາດ້ວຍຕົວເອງກໍຕາມ.
ທ່າທີຂອງເຟສບຸກ ມີຂຶ້ນເມື່ອມໍ່ໆມານີ້ ເຊິ່ງຖືເປັນວັນ World Suicide Prevention Day ເຊິ່ງປີນີ້ທາງອົງການອະນາໄມໂລກ ຫຼື WHO ອອກມາເປິດເຜີຍວ່າ ຈະມີຄົນຂ້າຕົວຕາຍໃນທຸກ 40 ວິນາທີ ຫຼື ເທົ່າກັບ 8 ລ້ານຄົນທຸກປີ.
ທີ່ຜ່ານມາ ບໍລິສັດເຕັກໂນໂລຊີ ແລະ ສື່ສັງຄົມອອນລາຍ ພະຍາຍາມເຂົ້າມາມີບົດບາດໃນການຈັດການເນື້ອຫາຮຸນແຮງ ເຊິ່ງລວມເຖິງການຂ້າຕົວຕາຍ ທັງເຟສບຸກ ທະວິດເຕີ ແລະ ກູເກິລ ໄດ້ເພີ່ມສາຍດ່ວນກ່ຽວກັບການຂ້າຕົວຕາຍ ແລະ ເມື່ອເດືອນທີ່ຜ່ານມາ ບໍລິສັດອາເມຊອນ ມີແຜນຈັດສ້າງສາຍດ່ວນໃຫ້ກັບລູກຄ້າທີ່ຄົ້ນຫາຂໍ້ມູນກ່ຽວກັບການຂ້າຕົວຕາຍ ລວມທັງເພີ່ມການເຕືອນໃຫ້ກັບລູກຄ້າທີ່ເຂົ້າໄປເບິ່ງ ຫຼື ຊື້ສິນຄ້າທີ່ເປັນອັນຕະລາຍ.