ໝາກຂຽບ ເປັນໝາກໄມ້ທີ່ມີວິຕາມິນ C ວີຕາມິນ B6 ແລະ ແຮ່ທາດ ເຊັ່ນ: ໂຟແທດຊຽມ ແລະ ແມັກນີຊຽມວິຕາມິນ C ແມ່ນສາມາດຕ້ານອາການອັກເສບ ແລະ ຕ້ານອະນຸມູນອິດສະຫຼະ ຊ່ວຍຫຼຸດຄວາມສ່ຽງຂອງການເປັນພະຍາດຫອບຫືດ ວິຕາມິນ B6 ຊ່ວຍປ້ອງກັນການອັກເສບຂອງຫຼອດລົມ ແລະ ມີປະໂຫຍດຫຼາຍຢ່າງດັ່ງນີ້.
1. ຮັກສາຕ່ອມໄທລອຍ: ເພາະໝາກຂຽບມີແຮ່ທາດທີ່ຊ່ວຍຮັກສາຕ່ອມໄທລອຍຫຼາຍທີ່ສຸດ ແລະ ມີຄວາມສຳຄັນຫຼາຍໃນການຜະລິດໂຮໂມນໄທລອຍ.
2. ຊ່ວຍສ້າງພະລັງໃຫ້ແກ່ຮ່າງກາຍ: ເພາະວິຕາມິນ B ເປັນສານອາຫານ ທີ່ສາມາດຊ່ວຍປ່ຽນນ້ຳຕານໃຫ້ເປັນພະລັງງານ ເມື່ອເຮົາເມື່ອຍ ຄວນກິນໝາກຂຽບ ເພາະເປັນແຫຼ່ງລວມຂອງວິຕາມິນ B ທີ່ຊ່ວຍສ້າງພະລັງງານໃຫ້ແກ່ຮ່າງກາຍ.
3. ເຮັດໃຫ້ກະດູກແຂງແຮງ: ໝາກຂຽບມີແມັກນີຊຽມ ເມື່ອເຮົາກິນເຂົ້າໄປ ຈະເຮັດໃຫ້ມັນໄປປະສົມກັບແຄວຊຽມທີ່ຢູ່ໃນກະດູກ ຈະຊ່ວຍເພີ່ມໃຫ້ກະດູກໜາຂຶ້ນ ແລະ ແຂງແຮງ.
4. ຫຼຸດຄໍເລດເຕີລໍ: ໝາກໄມ້ຊະນິດນີ້ມີ ໄນອາຊິນ (ວິຕາມິນ B) ເຊິ່ງມີຄວາມສາມາດໃນການຫຼຸດຄໍເລດເຕີລໍໄດ້ຢ່າງດີ.
5. ປ້ອງກັນບັນຫາທີ່ອາດເກີດຂຶ້ນຈາກການຖືພາ: ເພາະໝາກຂຽບ ມີວິຕາມິນ B9 ທີ່ມີບົດບາດສຳຄັນໃນການຊ່ວຍປ້ອງກັນບັນຫາທໍ່ເສັ້ນປະສາດສຳລັບລູກນ້ອຍ.
6. ບຳລຸງສາຍຕາ: ວິຕາມິນເອ ທີ່ມີຢູ່ໃນໝາກຂຽບ ສາມາດຊ່ວຍດູແລຮັກສາສຸຂະພາບຕາ ເພາະມີຄຸນສົມບັດໃນການຕ້ານອະນຸມູນອິດສະຫຼະ ເຊິ່ງສານຕ້ານອະນຸມູນອິດສະຫຼະຈະຊ່ວຍປ້ອງກັນຈໍປະສາດຕາ ແລະ ແກ້ວຕາ ຈາກອະນຸມູນອິດສະຫຼະທີ່ເປັນອັນຕະລາຍ.
7. ຊ່ວຍປິ່ນປົວເລືອດຈາງ: ໝາກຂຽບມີທາດເຫຼັກ ເຊິ່ງເປັນແຮ່ທາດທີ່ສຳຄັນໃນການຜະລິດເຊວເມັດເລືອດແດງຫາກກິນໝາກຂຽບຕະຫຼອດ ຈະຊ່ວຍປ້ອງກັນບໍ່ໃຫ້ເລືອດຈາງໄດ້.
ວ.ດາລາວົງ ນຳສະເໜີ