ຫຸ່ນຍົນຜູ້ຊ່ວຍສຳລັບກີລາໂອລິມປິກລະດູຮ້ອນ ປີ 2020 ໄດ້ຮັບການອອກແບບມາໃຫ້ສາມາດເຄື່ອນຍ້າຍສິ່ງຂອງຕ່າງໆຂ້າມສະໜາມໄດ້ຢ່າງວ່ອງໄວ ແລະ ເຮັດໜ້າທີ່ເກັບອຸປະກອນໃນການແຂ່ງຂັນກີລາ ເຊັ່ນ ຫອກຈາກກີລາພຸ່ງຫຼາວ ແລະ ແຜ່ນກົມສຳລັບກີລາແກວ່ງຈັກ ຫຼັງຈາກທີ່ນັກກີລາແກວ່ງອອກໄປແລ້ວ.
ຫຸ່ນຍົນອີກຕົວຈະມີໜ້າຈໍທີ່ມີຂະໜາດເທົ່າຄົນເທິງລໍ້ຂອງມັນ ຫຸ່ນຍົນຕົວນີ້ໄດ້ຮັບການອອກແບບມາເພື່ອຊ່ວຍໃຫ້ຜູ້ຊົມຢູ່ເຮືອນສາມາດຊົມກີລາແບບເໝືອນຈິງໄດ້.
ນອກຈາກນີ້ ຍັງມີຫຸ່ນຍົນທີ່ຖືກອອກແບບມາໃຫ້ເບິ່ງຄືກັນສິ່ງມີຊີວິດທີ່ຍິ້ມແຍ້ມເປັນມິດ ເອີ້ນວ່າ “ຫຸ່ນຍົນມາສຄອດ” ເຊິ່ງເຖິງແມ່ນຍ່າງບໍ່ໄດ້ ແຕ່ສາມາດຫຍັບແຂນຂາໄດ້ ເວົ້າບໍ່ໄດ້ ແຕ່ສາມາດສົ່ງສາຍຕາໄດ້ຫຼາຍແບບ ທັງແບບສາຍຕາເປັນປະກາຍ ແລະ ເປັນຮູບຫົວໃຈ ຖືເປັນສັນຍະລັກ ຫຼືເປັນຕົວແທນການແຂ່ງຂັນກີລາໂອລິມປິກຄັ້ງນີ້.
ທ່ານ Tomohisa Moridaira ຫົວໜ້າຄະນະວິສະວະກອນກ່າວເສີມວ່າ ຫຸ່ນຍົນຕົວນີ້ຍັງອາດເຮັດວຽກຢ່າງອື່ນໄດ້ອີກ ເຊັ່ນ ການຖືທວນໄຟໂອລິມປິກໂດຍໃຊ້ແມ່ເຫຼັກ.
“ຫຸ່ນຍົນພາກສະໜາມ” ເປັນຫຸ່ນຍົນທີ່ມີຂະໜາດນ້ອຍ ມີຮູບຮ່າງເໝືອນລົດປະຈຳທາງ ສາມາດເດີນທາງໄດ້ຢ່າງວ່ອງເຖິງ 20 ກິໂລແມັດຕໍ່ຊົ່ວໂມງ ມີກ້ອງສາມຕົວ ແລະ ເຊັນເຊີພິເສດທີ່ຊ່ວຍໃຫ້ເບິ່ງເຫັນສະພາບແວດລ້ອມ ດ້ານເທິງຂອງຕົວລົດມີໄຟຊະນິດພິເສດຮອບໆ ທີ່ຈະສະຫວ່າງຂຶ້ນໃນຂະນະທີ່ເຮັດວຽກ ໂດຍເຕັກໂນໂລຊີປັນຍາປະດິດ ຊ່ວຍໃຫ້ຫຸ່ນຍົນສາມາດຫຼົບຫຼີກສິ່ງກີດຂວາງ ແລະ ຍັງສາມາດປັບປ່ຽນເສັ້ນທາງເພື່ອຫຼີກລ່ຽງບໍລິເວນທີ່ເປັນຫຍ້າໄດ້ອີກດ້ວຍ.
ທ່ານ Takeshi Kuwabara ຜູ້ຮັບຜິດຊອບການພັດທະນາຫຸ່ນຍົນ ບອກວ່າ ຫຸ່ນຍົນນີ້ຖືກອອກແບບມາໃຫ້ສາມາດເຮັດວຽກຮ່ວມກັນກັບທັງຫຸ່ນຍົນ ແລະ ມະນຸດ ແລະ ວ່າເປົ້າໝາຍກໍຄືການໃຊ້ປະໂຫຍດຈາກຂໍ້ດີຂອງທັງມະນຸດ ແລະ ຫຸ່ນຍົນ.
ຫຸ່ນຍົນເຫຼົ່ານີ້ ລ້ວນເປັນສ່ວນໜຶ່ງຂອງການກຽມການສຳລັບການແຂ່ງຂັນກີລາໂອລິມປິກປີ 2020 ທີ່ນະຄອນຫຼວງໂຕກຽວ ປະເທດຍີ່ປຸ່ນ.
ບໍລິສັດຜູ້ຜະລິດຍານຍົນຂອງຍີ່ປຸ່ນ Toyota Motor Corporation ເປິດຕົວຫຸ່ນຍົນເຫຼົ່ານີ້ໃຫ້ຜູ້ສື່ຂ່າວໄດ້ຊົມເມື່ອບໍ່ເທົ່າໃດວັນກ່ອນ ໂດຍ Toyota ເປັນໜຶ່ງໃນຜູ້ສະໜັບສະໜູນຫຼັກຂອງການແຂ່ງຂັນກີລາໂອລິມປິກປີ 2020 ດ້ວຍ.
ສູນວິທະຍາການຫຸ່ນຍົນຂອງໂຕໂຢຕາໃນສະຫະລັດ ໄດ້ພັດທະນາໜ້າຈໍເຄື່ອນທີ່ຂະໜາດເທົ່າມະນຸດ ຫຼື T-TR1 ທີ່ອອກແບບມາເພື່ອເປັນຕົວແທນຂອງຄົນທີ່ບໍ່ສາມາດເຂົ້າຮ່ວມຊົມການແຂ່ງຂັນໄດ້.
ກ່ອນໜ້ານີ້ ໂຕໂຢຕາໄດ້ພັດທະນາຫຸ່ນຍົນທີ່ເຄື່ອນທີ່ດ້ວຍລໍ້ມາແລ້ວຫຼາຍຊະນິດ ເພື່ອຊ່ວຍຜູ້ສູງອາຍຸເຮັດວຽກເຮືອນ ແລະ ຊ່ວຍຜູ້ປ່ວຍໃນໂຮງໝໍ ນອກຈາກນີ້ ຫຸ່ນຍົນເຫຼົ່ານີ້ຍັງສາມາດນຳທາງຄົນພິການໄປຍັງບ່ອນນັ່ງໃນການແຂ່ງຂັນກີລາໂອລິມປິກ ແລະ ຍັງຊ່ວຍບໍລິການອາຫານ ແລະ ເຄື່ອງດື່ມໄດ້ອີກດ້ວຍ.