ບັນຫາຊຸມສາຍ ເປັນບັນຫາໜຶ່ງທີ່ສ້າງຄວາມບໍ່ເປັນລະບຽບຮ້ອຍໃຫ້ກັບນະຄອນຫຼວງຈັນ ເພື່ອແກ້ໄຂບັນຫາດັ່ງກ່າວ ອົງການປົກຄອງນະຄອນຫຼວງວຽງຈັນ ໄດ້ສົມທົບກັບພາກສ່ວນກ່ຽວຂ້ອງ ເລັ່ງແກ້ໄຂບັນຫານີ້ດ້ວຍການອະນຸຍາດໃຫ້ 3 ບໍລິສັດເຮັດທົດລອງ ໃນ 3 ເສັ້ນທາງ.
ໃນວັນທີ 16 ກັນຍາ 2020 ທ່ານ ພູຂົງ ບັນນາວົງ ຮອງເຈົ້າຄອງນະຄອນຫຼວງວຽງຈັນ ຫົວໜ້າພະແນກແຜນການ ແລະ ການລົງທຶນ ນວ ພ້ອມດ້ວຍຄະນະ ໄດ້ລົງຕິດຕາມການເຮັດທົດລອງການແກ້ໄຂຊຸມສາຍຢູ່ນະຄອນຫຼວງວຽງຈັນ ໃນ 3 ເສັ້ນທາງ ເພື່ອລົງກວດກາຕິດຕາມເບີ່ງການເຮັດທົດລອງໃນວຽກງານດັ່ງກ່າວຕາມເຕັກນິກຂອງແຕ່ລະບໍລິສັດ.
ສຳລັບການເຮັດທົດລອງແກ້ໄຂຊຸມສາຍໃນຄັ້ງນີ້ ແມ່ນໄດ້ດຳເນີນໃນ 3 ເສັ້ນທາງຄື: ເສັ້ນທາງ 23 ສິງຫາ ນັບແຕ່ ປະຕູໄຊ ຫາ ກະຊວງການເງິນ ແລະ ເສັ້ນໄກສອນ ພົມວິຫານ ນັບແຕ່ປະຕູໄຊ ຫາສີ່ແຍກໄຟແດງໂພນສະອາດ ມີຄວາມຍາວປະມານ 500 ແມັດ ມີສອງບໍລິສັດທີ່ຮັບຜິດຊອບ ຄື ຈຸດທຳອິດແມ່ນບໍລິສັດເຄທີສາມາດພັດທະນາຈຳກັດຜູ້ດຽວ ແລະ ຈຸດທີ 2 ບໍລິສັດລາວກໍ່ສ້າງຕິດຕັ້ງໂທລະຄົມຈຳກັດຜູ້ດຽວ ເຊິ່ງສອງບໍລິສັດໄດ້ມີການມ້ຽນມັດສາຍໃນແບບຄ້າຍຄືກັນ ເປັນຕົ້ນ ເກັບກູ້ສາຍທີ່ຂາດອອກຈາກກຸ່ມແລວສາຍ ປົດອຸປະກອນທີ່ບໍ່ໄດ້ໃຊ້ອອກຈາກເສົາ ແລະ ຕັດງ່າໄມ້ຕາມແລວສາຍອອກ ຕິດຕັ້ງອຸປະກອນຄອນສາຍຕິດໃສ່ເສົາ ໄຈ້ແຍກສາຍໄຍແກ້ວ ແລະ ສາຍໂທລະສັບຕັ້ງໂຕະ ສາຍອິນເຕີເນັດໃຫ້ເປັນກຸ່ມ ເຄັ່ງສາຍທີ່ໂຕ່ງຍານ ແລະ ມັດລວມກຸ່ມສາຍເປັນຍ່ານໃຫ້ເປັນລະບຽບ ເກັບມ້ຽນສາຍ ແລະ ຫົວຕໍ່ຢູ່ເສົາໃຫ້ຈົບງາມ ແລະ ໝັ້ນຄົງ ເຊິ່ງທັງສອງບໍລິສັດແມ່ນຈັດຕັ້ງປະຕິບັດຄືກັນແຕ່ແຕກຕ່າງກັນຢູ່ທາງດ້ານເຕັກນິກ ແລະ ອຸປະກອນທີ່ນຳໃຊ້ ສ່ວນຈຸດທີສາມເລີ່ມແຕ່ເສັ້ນທາງໜ້າຫໍຄຳ ຫາ ສີ່ແຍກໂຮງໝໍມະໂຫສົດ ມີຄວາມຍາວປະມານ 200 ແມັດ ບໍລິສັດທີ໋ຊ໋ອບໂປຣແກຣມດິວິລ໋ອບເມັນຈຳກັດຜູ້ດຽວ ຈັດຕັ້ງປະຕິບັດຕ່າງຈາກສອງຈຸດທີ່ຜ່ານມາ ຄື: ໄດ້ນຳໃຊ້ອຸປະກອນຄອນສາຍແມ່ນໄດ້ຫຸ້ມຊະນວນກັນໄຟຟ້າຊ໊ອດ ນຳໃຊ້ຮູບແບບຕິດຕັ້ງຄອນສາຍ ແລ້ວແຍກເປັນເສັ້ນຈັບໃສ່ຄອນສາຍ ເຊິ່ງໄດ້ຖືກຮອງຮັບມາດຕະຖານສາກົນ ໃນການເຮັດທົດລອງໃນ 3 ເສັ້ນທາງນີ້ ແມ່ນໄດ້ເຮັດສຳເລັດຕາມແຜນການ.
ພາຍຫຼັງສຳເລັດການເຮັດທົດລອງໃນຄັ້ງນີ້ ທາງຄະນະຮັບຜິດຊອບແມ່ນຈະໄດ້ຈັດກອງປະຊຸມຄົ້ນຄວ້າ ເພື່ອຮັບຮອງຄັດເລືອກເອົາບໍລິສັດທີ່ມີມາດຕະຖານເຕັກນິກ ເພື່ອສືບຕໍ່ມາດຳເນີນການແກ້ໄຂບັນຫາຊຸມສາຍໃນ ນວ ໃນຕໍ່ໜ້າ.