ພົບກັນປະຈຳວັນນີ້ ຜູ້ຂຽນໄດ້ສັງລວມເອົາບັນຫາສັບສົນວຸ້ນວາຍຕ່າງໆທີ່ມັກຈະເກີດຂຶ້ນໃນຖ້ຽວບິນ ທັງນີ້ກໍເພື່ອໃຫ້ພວກເຮົາມີສະຕິລະວັງຕົວເວລາໂດຍສານທາງເຄື່ອງບິນ ແນໃສ່ຄວາມປອດໄພຂອງຕົນເອງ ແລະ ຜູ້ໂດຍສານອື່ນໆ.
ທີ່ອົງການ ສປຊ: ເມື່ອເດືອນ 4 ປີຜ່ານມາ ກອງປະຊຸມອົງການສະຫະປະຊາຊາດ ກ່ຽວກັບການບິນໄດ້ຈັດຂຶ້ນທີ່ນະຄອນມົງເຣອານ (Moutreal) ປະເທດການາດາ ໂດຍໄດ້ເນັ້ນທິດທາງແກ້ໄຂສິ່ງທ້າທາຍຕໍ່ຄວາມປອດໄພຂອງຖ້ຽວບິນທີ່ພົວພັນກັບການປະພຶດຂອງຜູ້ໂດຍສານ ກໍຄື ອຸດສາຫະກຳການບິນ ກອງປະຊຸມໄດ້ຍົກໃຫ້ເຫັນວ່າ ການປະພຶດທີ່ເປັນອັນ
ຕະລາຍຂອງຜູ້ໂດຍສານໃນບັນດາຖ້ຽວບິນທົ່ວໂລກ ໄດ້ເພີ່ມຂຶ້ນເກືອບ 17% ໃນປີ 2015 ໂດຍສະເລ່ຍແລ້ວຜູ້ໂດຍສານທີ່ໃຊ້ຄຳເວົ້າປ້ອຍດ່າ ຂົ່ມຂູ່ ແລະ ບໍ່ປະຕິບັດຕາມຄຳສັ່ງຂອງພະນັກງານພາຍໃນເຄື່ອງບິນນັ້ນມີຈຳນວນ 1 ຄົນ ຕໍ່ຜູ້ໂດຍສານ 1.282 ຄົນ ໃນເດືອນຕຸລາ ປີ 2015 ຊາຍຜູ້ໂດຍສານຄົນໜຶ່ງໃນຖ້ຽວບິນຂອງສາຍການບິນເຊົາແວດ (Southwest) ໄດ້ໃຊ້ກຳລັງທຳຮ້າຍຮ່າງກາຍຜູ້ໂດຍສານເພດຍິງທີ່ນັ່ງຢູ່ຕັ່ງດ້ານໜ້າ ເມື່ອນາງເອ່ນຕັ່ງນັ່ງລົງຖືກເຂົາ ຄວາມວຸ້ນວາຍທີ່ເກີດຈາກການປະພຶດຂອງຜູ້ໂດຍສານໄດ້ບັງຄັບໃຫ້ການບິນຫຼາຍໆຖ້ຽວຕ້ອງໄດ້ລົງຈອດສຸກເສີນ ການລົງຈອດສຸກເສີນແຕ່ລະຄັ້ງຂອງຖ້ຽວບິນທາງໄກ 1 ຖ້ຽວນັ້ນ ຈະເຮັດໃຫ້ສູນເສຍລາຍຈ່າຍປະມານ 200.000 ໂດລາສະຫະລັດ ຄວາມວຸ້ນວາຍຈາກການປະພຶດຂອງຜູ້ໂດຍສານປະມານ 23% ແມ່ນເກີດມາຈາກການດື່ມເຫຼົ້າຈົນເມົາ ດັ່ງນັ້ນ ຈຶ່ງເວົ້າໄດ້ວ່າ ຮ້ານຂາຍເຄື່ອງດື່ມ ແລະ ຮ້ານອາຫານພາຍໃນສະໜາມບິນ ກໍຄື ການຂາຍເຫຼົ້າພາຍໃນເຄື່ອງບິນ ຈຶ່ງຕ້ອງມີສ່ວນຮັບຜິດຊອບຢ່າງຫຼີກລ້ຽງບໍ່ໄດ້ຕໍ່ກໍລະນີຄວາມວຸ້ນວາຍທີ່ເກີດຂຶ້ນຈາກນ້ຳເມົາໃນຖ້ຽວບິນ ນອກຈາກນັ້ນ ກອງປະຊຸມຍັງເຫັນວ່າ ບັນຫາການໃຊ້ຄວາມຮຸນແຮງ ກໍຄື ການອາລະວາດກັນພາຍໃນເຄື່ອງບິນທີ່ກໍ່ຂຶ້ນໂດຍຜູ້ໂດຍສານນັ້ນມີສ່ວນພົວພັນກັບບັນດາບໍລິສັດສາຍການບິນທີ່ຄິດແຕ່ເລື່ອງກຳໄລ ຈາກການບັນທຸກຜູ້ໂດຍສານໃຫ້ໄດ້ຈຳນວນຫຼາຍໆ ຍ້ອນແນວນີ້ເອງທາງບໍລິສັດຈຶ່ງມີການເພີ່ມຕັ່ງນັ່ງໃຫ້ໄດ້ຫຼາຍຂຶ້ນ ເຮັດໃຫ້ເກີດສະພາບແອອັດບຽດສີກັນ ຕາມຫຼັກການແລ້ວໃນແຖວຕັ່ງຊັ້ນປະຢັດ (Economy) ນັ້ນໄລຍະຫ່າງລະຫວ່າງຕັ່ງຕ້ອງບໍ່ໃຫ້ຫຼຸດ 78 ຫຼື 79 ຊັງຕີແມັດ ແຕ່ໃນຫຼາຍສາຍການບິນນັ້ນໄລຍະຫ່າງລະຫວ່າງຕັ່ງກັບຕັ່ງນັ້ນມີພຽງ 71 ຊັງຕີແມັດ ທີ່ສຳຄັນອີກຈຸດໜຶ່ງ ກໍຄື ພະນັກງານການບິນທີ່ມີໜ້າທີ່ປ່ອຍຜູ້ໂດຍສານເຂົ້າເຄື່ອງບິນຍັງບໍ່ມີການໃຊ້ມາດຕະການເຄັ່ງຄັດ ໃນການຕິດຕາມກວດກາຜູ້ໂດຍສານທີ່ມີທ່າອ່ຽງກໍ່ອາລະວາດພາຍໃນຖ້ຽວບິນ ທັງນີ້ ກໍເພື່ອ “ມອດໄຟໄວ້ກ່ອນຫົວລົມຈະພັດມາ”.
ທີ່ ສປ ຈີນ: ໃນໄລຍະຫຼັງໆມານີ້ ທາງການ ສປ ຈີນ ໄດ້ໃຊ້ມາດຕະການເຫຼັກເພື່ອຄວບຄຸມຜູ້ໂດຍສານທາງອາກາດ ແລະ ທາງພາກພື້ນດິນ ແນໃສ່ແກ້ໄຂຄວາມສ່ຽງທີ່ຈະເກີດຂຶ້ນຈາກການປະພຶດທີ່ແຕກປອກນອກລະບຽບຂອງຜູ້ໂດຍສານໂລເລ ຕົວຢ່າງທີ່ເຫັນຢ່າງຈະແຈ້ງ ກໍຄື ການອອກລະບຽບສະບັບໃໝ່ ເພື່ອຄວບຄຸມຜູ້ໂດຍສານທາງລົດໄຟຄວາມໄວສູງຢູ່ແຂວງກວາງຕຸງ (Guangdong) ທີ່ເລີ່ມປະຕິບັດນັບແຕ່ເດືອນທັນວາ ປິ 2018 ເປັນຕົ້ນມາ ກົດລະບຽບໄດ້ກຳນົດຄ່າປັບໃໝລະຫວ່າງ 500-2.000 ຢວນ(ລະຫວ່າງ 72-295 ໂດລາສະຫະລັດ) ຕໍ່ຜູ້ຈົງໃຈຍາດທີ່ນັ່ງຂອງຄົນອື່ນ ໃນປີ 2018 ບັນຫາການຍາດນັ່ງກັນໃນລົດໄຟຄວາມໄວສູງຢູ່ແຂວງກວາງຕຸງໄດ້ກາຍເປັນຂ່າວຮ້ອນຍ້ອນເກີດມີການອາລະວາດກັນພາຍໃນລົດຢ່າງຕໍ່ເນື່ອງ ຍ້ອນແນວນີ້ເອງທາງການຈຶ່ງໄດ້ອອກກົດລະບຽບບັງຄັບໃຫ້ຜູ້ໂດຍສານທຸກຄົນນັ່ງຕັ່ງຕາມທີ່ໄດ້ກຳນົດໄວ້ຢູ່ໃນປີ້ໂດຍສານ.