ໃນວັນທີ 26 ມີນາ 2020 ທີ່ສຳນັກງານນາຍົກລັດຖະມົນຕີ ບໍລິສັດ ເບຍລາວ ຈໍາກັດ ໄດ້ມອບເງິນ 2 ຕື້ກີບ ເພື່ອປະກອບສ່ວນສະໜັບສະໜູນລັດຖະບານລາວ ກໍຄືກະຊວງສາທາລະນະສຸກ ແລະ ເຈົ້າໜ້າທີ່ແພດໝໍທີ່ກໍາລັງຮັບມື ແລະ ຄວບຄຸມການລະບາດຂອງພະຍາດ COVID-19 ໃນລາວ ຕາງໜ້າມອບໂດຍທ່ານ ສູນທອນ ພົມມະຈັກ ປະທານບໍລິສັດ ເບຍລາວ ຈຳກັດ ຕາງໜ້າຮັບແມ່ນທ່ານ ສົມດີ ດວງດີ ຮອງນາຍົກລັດຖະມົນຕີ ລັດຖະມົນຕີກະຊວງການເງິນ ມີທ່ານ ເຮັນລິກ ເອັນເດີເຊັນ ຜູ້ອໍານວຍການໃຫຍ່ ບໍລິສັດ ເບຍລາວ ຈໍາກັດ ແລະ ພາກສ່ວນກ່ຽວຂ້ອງທັງສອງຝ່າຍເຂົ້າຮ່ວມ.
ທ່ານ ສົມດີ ດວງດີ ຮອງນາຍົກລັດຖະມົນຕີ ຫົວໜ້າຄະນະສະເພາະກິດ ປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດຈາກເຊື້ອຈຸລະໂຣກ COVID-19 ກ່າວສະແດງຄວາມຂອບໃຈຕໍ່ທາງບໍລິສັດ ເບຍລາວ ໂດຍສະເພາະທ່ານ ສູນທອນ ພົມມະຈັກ ທ່ານ ເຮັນລິກ ເອັນເດີເຊັນ ພ້ອມດ້ວຍຄະນະ ທີ່ເຫັນໄດ້ເຖິງຄວາມສຳຄັນຂອງວຽກງານອັນເລັ່ງດ່ວນໃນການຮັບມືຕໍ່ໂຣກລະບາດດັ່ງກ່າວນີ້ ເຊິ່ງພາຍຫຼັງທີ່ ສປປ ລາວ ໄດ້ອອກມາຢືນຢັນວ່າ ລາວເຮົາພົບ 3 ກໍລະນີຕິດເຊື້ອພະຍາດ COVID-19 ເມື່ອວັນທີ 25 ມີນາຜ່ານມາ ໂດຍປັດຈຸບັນ ພວກກ່ຽວໄດ້ຖືກນໍາສົ່ງເຂົ້າໄປແຍກປ່ຽວເພື່ອຮັບການປິ່ນປົວແລ້ວ ແລະ ຈະນຳໃຊ້ເງິນຈຳນວນດັ່ງກ່າວນີ້ເຂົ້າໃນວຽກງານປ້ອງກັນ ຄວບຄຸມ ແລະ ແກ້ໄຂພະຍາດອັກເສບປອດຈາກເຊື້ອຈຸລະໂຣກ COVID -19 ໃຫ້ເກີດປະໂຫຍດສູງສຸດ.
ຂ່າວ: ບຸນມີ