ການພິຈາລະນາຕັດສີນຢັ້ງຢືນໃບຕາດິນເສຍຫາຍ ໝາຍເຖິງການຢັ້ງຢືນກຳມະສິດ ໃນທີ່ດິນຂອງເຈົ້າຂອງສິດນຳໃຊ້ທີ່ດິນ ຕາມໃບຕາດິນທີ່ອົງການຮັບຜິດຊອບຄຸ້ມຄອງທີ່ດິນອອກໃຫ້ ແຕ່ໃບຕາດິນດັ່ງກ່າວເສຍຫາຍ ຫຼື ຖືກທຳລາຍດ້ວຍຮູບການຕ່າງໆ ທີ່ບໍ່ໄດ້ຮ່ອງຮອຍຂອງໃບຕາດິນໄວ້ ດັ່ງນັ້ນ ເມື່ອເຈົ້າຂອງສິດນຳໃຊ້ທີ່ດິນຕ້ອງການມອບ ໂອນ ຄ້ຳປະກັນ ຫຼື ຕ້ອງການຊີ້ຂາດ ກ່ຽວກັບກຳມະສິດທີ່ດິນຕອນດັ່ງກ່າວ ຕ້ອງໄດ້ມີເອກະສານຢັ້ງຢືນ ກ່ຽວກັບກຳມະສິດໃນທີ່ດິນຕອນດັ່ງກ່າວ ແຕ່ເອກະສານຢັ້ງຢືນກຳມະສິດຄື ໃບຕາດິນພັດເສຍຫາຍ ຫຼື ຖືກທຳລາຍແລ້ວ ຈຶ່ງຈຳເປັນຕ້ອງມີການຕັດສີນຂອງສານ ເພື່ອຢັ້ງຢືນການເສຍຫາຍ ຂອງໃບຕາດິນ ເພື່ອເປັນບ່ອນອີງໃຫ້ແກ່ອົງການທີ່ຮັບຜິດຊອບຄຸ້ມຄອງທີ່ດິນ ອອກໃບຕາດິນໃໝ່ໃຫ້ແກ່ເຈົ້າຂອງສິດນຳໃຊ້ທີ່ໄດ້ນຳໃຊ້.
ການພິຈາລະນາຢັ້ງຢືນໃບຕາດິນເສຍຫາຍ ມີຄວາມສຳຄັນຕໍ່ອົງການທີ່ເຮັດໜ້າທີ່ຄຸ້ມຄອງທີ່ດິນ ເພື່ອໃຊ້ເປັນຂໍ້ມູນຫຼັກຖານໃນການອອກສຳເນົາໃບຕາດິນ ເນື່ອງຈາກວ່າຂໍ້ມູນຫຼັກຖານກ່ຽວກັບທີ່ດິນ ແລະ ໃບຕາດິນ ແມ່ນບໍ່ມີເຫຼືອຢູ່ ບໍ່ມີຮ່ອງຮອຍໃດໆ ຊຶ່ງອົງການທີ່ຮັບຜິດຊອບຄຸ້ມຄອງທີ່ດິນ ບໍ່ສາມາດອອກໃບສຳເນົາທີ່ດິນໃຫ້ແກ່ເຈົ້າຂອງສິດນຳໃຊ້ທີ່ດິນໄດ້ ດັ່ງນັ້ນ ຈຶ່ງຈຳເປັນຕ້ອງໃຫ້ມີການພິຈາລະນາຕັດສີນຂອງສານຢັ້ງຢືນໃບຕາດິນເສຍຫາຍ ເພື່ອເປັນນິຕິກຳໃນການອອກໃບສຳເນົາຕາດິນ.
ໃບຕາດິນມີພຽງສະບັບດຽວທີ່ອອກໃຫ້ແກ່ເຈົ້າກຳມະສິດທີ່ດິນຮັກສາໄວ້ ຈຶ່ງຖືວ່າເປັນເອກະສານທີ່ສຳຄັນຢ່າງໜຶ່ງ ດັ່ງນັ້ນ ເມື່ອໃບຕາດິນຫາກຕົກເຮ່ຍເສຍຫາຍ ຫຼື ຖືກທຳລາຍຕ້ອງໄດ້ອອກໃບສຳເນົາຕາດິນໃໝ່ ເພື່ອຢັ້ງຢືນຄຶນໃຫ້ເຈົ້າກຳມະສິດທີ່ເອົາໄປນຳໃຊ້ ສຳລັບເງື່ອນໄຂການຮ້ອງຂໍຕໍ່ສານໃຫ້ຢັ້ງຢືນໃບຕາດິນເສຍຫາຍມີດັ່ງນີ້:
1. ການຕົກເຮ່ຍເສຍຫາຍ ຫຼື ຖືກທຳລາຍຂອງໃບຕາດິນນັ້ນ ຫາກປະຮ່ອງຮອຍທີ່ເປັນຫຼັກຖານໃດໜຶ່ງ ທີ່ຢັ້ງຢືນກ່ຽວກັບໃບຕາດິນທີ່ກ່ຽວຂ້ອງ ເປັນຕົ້ນມີສຳເນົາ ມີສ່ວນໃດສ່ວນໜຶ່ງຂອງໃບຕາດິນເຫຼືອຢູ່ ມີເອກະສານກ່ຽວຂ້ອງກັບໃບຕາດິນນັ້ນ ແລະ ອື່ນໆ ທີ່ພໍສາມາດຢັ້ງຢືນໃບຕາດິນດັ່ງກ່າວ ໃນກໍລະນີນີ້ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມປະຈຳແຂວງ ນະຄອນຫຼວງ ຈະອອກໃບສຳເນົາຕາດິນໃຫ້ບຸກຄົນ ຫຼື ການຈັດຕັ້ງທີ່ໄດ້ຮ້ອງຂໍໄດ້ໂດຍກົງ ເພື່ອນຳໄປເປັນບ່ອນອີງ ແລະ ຢັ້ງຢືນກຳມະສິດທີ່ດິນດັ່ງກ່າວ.
2. ການຕົກເຮ່ຍເສຍຫາຍ ຫຼື ຖືກທຳລາຍຂອງໃບຕາດິນນັ້ນ ຫາກບໍ່ໄດ້ປະຮ່ອງຮອຍ ຫຼື ບໍ່ມີຂໍ້ມູນໃດຂໍ້ມູນໜຶ່ງ ກ່ຽວກັບໃບຕາດິນດັ່ງກ່າວແລ້ວ ຕ້ອງແມ່ນສານປະຊາຊົນເຂດເປັນຜູ້ພິຈາລະນາຕັດສີນຢັ້ງຢືນໃບຕາດິນເສຍຫາຍກ່ອນ ພະແນກຊັບພະຍາກອນທຳມະຊາດ ແລະ ສິ່ງແວດລ້ອມປະຈຳແຂວງ ນະຄອນຫຼວງ ຈຶ່ງສາມາດອອກໃບສຳເນົາຕາດິນໄດ້.
ຄຳຮ້ອງຂໍໃຫ້ສານພິຈາລະນາຢັ້ງຢືນໃບຕາດິນເສຍຫາຍ ບໍ່ສາມາດຮ້ອງຂໍໂດຍກົງຕໍ່ສານໄດ້ ແຕ່ຕ້ອງຍື່ນຜ່ານອົງການທີ່ຮັບຜິດຊອບຄຸ້ມຄອງທີ່ດິນ ປະຈຳເມືອງ (ຫ້ອງການຊັບພະຍາກອນທຳມະຊາດ ແລະ ສິ່ງແວດລ້ອມ) ທີ່ກ່ຽວຂ້ອງເປັນຜູ້ຄົ້ນຄວ້າພິຈາລະນາເສຍກ່ອນ ຖ້າເຫັນວ່າມີເງື່ອນໄຂໃຫ້ສານຢັ້ງຢືນໃບຕາດິນເສຍຫາຍແລ້ວ ອົງການທີ່ເຮັດວຽກກ່ຽວກັບການຄຸ້ມຄອງທີ່ດິນທີ່ກ່ຽວຂ້ອງ ຈະສະຫຼຸບມີຄຳເຫັນແລ້ວ ສະເໜີຕໍ່ສານເພື່ອພິຈາລະນາຕັດສີນຢັ້ງຢືນໃບຕາດິນເສຍຫາຍ ຖ້າຫາກອົງການທີ່ເຮັດວຽກໃນການຄຸ້ມຄອງທີ່ດິນກ່ຽວຂ້ອງຫາກເຫັນວ່າ ບໍ່ມີເງື່ອນໄຂ ຫຼື ບໍ່ມີຮ່ອງຮອຍຂອງໃບຕາດິນຄົງເຫຼືອໄວ້ຢູ່ ຈະນຳສະເໜີຕໍ່ພະແນກຊັບພະຍາກອນທຳມະຊາດ ແລະ ສິ່ງແວດລ້ອມປະຈຳແຂວງ ນະຄອນຫຼວງເປັນຜູ້ພິຈາລະນາອອກໃບສຳເນົາຕາດິນຄືນໃໝ່.