ຄໍລຳປະຈຳວັນນີ້ ໄດ້ສັງລວມເອົາ 2 ເຫດການມາເລົ່າສູ່ຟັງ ຄືເລື່ອງແຜນໃຫ້ບໍລິການສັກຢາກັນພະຍາດສຳລັບເດັກໃນຄອບຄົວ ຜູ້ເຄື່ອນຍ້າຍຢູ່ໄທ ແລະ ຄະດີລ່າເສືອໂຄ່ງທີ່ອິນໂດເນເຊຍ.
ທີ່ ປະເທດໄທ: ຂ່າວນີ້ອ່າວເກົ່າເກີດຂຶ້ນແຕ່ຕົ້ນເດືອນທັນວາ 2019 (ວຽງຈັນທາມ 13 ທັນວາ 2019) ແຕ່ມີຄວາມສັນຄັນຫຼາຍສຳລັບບັນດາເດັກໆ ທີ່ເປັນລູກຂອງບັນດາຜູ້ເຄື່ອນຍ້າຍຢູ່ໃນໄທ (ບໍ່ເປັນພົນລະເມືອງໄທ) ຂ່າວບອກວ່າອົງການອະນາໄມໂລກ (WHO) ໄດ້ສະໜັບສະໜູນສະຖານບັນຮັບຜິດຊອບ ກ່ຽວກັບບັນຫາສຸຂະພາບທີ່ຂຶ້ນກັບກະຊວງສາທາລະນະສຸກໄທ ແລະ ມູນນິທິສົ່ງເສີມສຸຂະພາບໄທໃຫ້ຄົ້ນຄວ້າພິຈາລະນາ ຄວາມອາດສາມາດໃນການໃຫ້ບໍລິການສັກຢາກັນພະຍາດ ໃຫ້ເດັກນ້ອຍໃນຄອບຄົວຜູ້ເຄື່ອນຍ້າຍທີ່ອາໄສຢູ່ໃນປະເທດໄທ ຕາມຫຼັກການແລ້ວ ຢາກັນພະຍາດເດັກທີ່ສະໜອງດ້ວຍທຶນປະກັນສັງຄົມ ແຫ່ງຊາດໄທນັ້ນ ມີໄວ້ສະເພາະສຳລັບເດັກໄທ ບໍ່ໄດ້ກວມເອົາເດັກໃນຄອບຄົວຜູ້ເຄືອນຍ້າຍ ພາຍໃຕ້ໂຄງການສຶກສາກັບພະຍາດສຳລັບເດັກ ເດັກໄທແຕ່ລະຄົນຈະໄດ້ຮັບການສີດຢາຢ່າງໜ້ອຍ 10 ຊຸດ ສະຖິຕິປີ 2018 ໃຫ້ຮູ້ວ່າ ເດັກໄທຈຳນວນ 95% ໄດ້ຮັບການສີດຢາປ້ອງກັນພະຍາດ.
ທີ່ ອິນໂດເນເຊຍ: ເຊັ່ນດຽວກັບຢູ່ຫຼາຍໆປະເທດ ທາງການອິນໂດເນເຊຍ ໄດ້ເອົາມາດຕະການເດັດຂາດກັບຜູ້ລັກລອບລ່າສັດປະເພດຫວງຫ້າມ ເຊິ່ງໄດ້ແກ່ຈຳພວກສັດໃກ້ຈະສູນພັນ ໃນນັ້ນລວມທັງເສືອໂຄ່ງພັນສະເພາະຂອງຊູມາຕຣາ ເສືອໂຄ່ງຊະນິດນີ້ ເປັນພັນຫາຍາກ ດັ່ງນັ້ນ ຈຶ່ງເປັນເປົ້າໝາຍຖືກລັກລອບວ່າ ເຮັດໃຫ້ຈຳນວນເສືອໂຄ່ງພັນນີ້ນັບມື້ຫຼຸດລົງ ສະຖິຕິໃນເດືອນທັນວາ ປີ 2018 ຂອງກະຊວງສິງແວດລ້ອມ ແລະ ປ່າໄມ້ ອິນໂດເນເຊຍ ຊີ້ອອກວ່າ ເສືອໂຄ່ງພັນຊູມາຕຣາ ຍັງເຫຼືອບໍ່ເກີນ 600 ໂຕເທົ່ານັ້ນ ທຽບກັບຈຳນວນ 742 ໂຕ ໃນປີ 2000 ການຫຼຸດລົງຂອງຈຳນວນເສືອໂຄ່ງຊູມາຕຣານີ້ ເກີດມາຈາກການລັກລອບລ່າ ແລະ ຍ້ອນທີ່ຢູ່ອາໄສຂອງສັດຊະນິດນີ້ຖືກມະນຸດບຸກລຸກ ມີຄົນຈຳນວນໜຶ່ງໄດ້ສວຍໃຊ້ການຂັດແຍ່ງລະຫວ່າງສັດກັບຄົນ ເປັນຂໍ້ອ້າງເພື່ອຂ້າເສືອໂຄ່ງພັນນີ້ ໃນທ້າຍປີ 2019 ກໍໄດ້ມີຂ່າວໃຫຍ່ທີ່ບອກວ່າເຈົ້າໜ້າທີ່ຕຳຫຼວດອິນໂດເນເຊຍ ໄດ້ຈັບກຸມນາຍພານເຖື່ອນ ແລະ ພໍ່ຄ້າເສືອໂຄ່ງຈຳນວນ 5 ຄົນ ທີ່ລັກລອບຍິງເສືອໂຄ່ງຊູມາຕຣາ ຂອງກາງທີ່ຢຶດໄດ້ນັ້ນ ລວມມີລູກອ່ອນໃນທ້ອງແມ່ເສືອ ຈຳນວນ 4 ໂຕ ສ່ວນຊາກແມ່ເສືອທີ່ຖືກຂ້ານັ້ນໄດ້ແຍກຂາຍເປັນຊິ້ນສ່ວນຕ່າງຫາກຢູ່ເຂດອື່ນ ຕາມກົດໝາຍວ່າດ້ວຍການອະນຸຮັກສິ່ງແວດລ້ອມ ແລະ ລະບົບນິເວດ ເລກທີ 5/1990 ມາດຕາ 40 ແລະ ມາດຕາ 21 ຖ້າພົບວ່າມີຄວາມຜິດຈິງ ຜູ້ກະທຳຜິດທັງ 5 ຄົນກໍຈະໄດ້ຮັບໂທດຕິດຄຸກສູງສຸດ 5 ປີ ແລະ ຖືກປັບໃໝເປັນຈຳນວນເງິນ 100 ລ້ານຣູເປຍ (ສະກຸນເງິນຂອງອິນໂດເນເຊຍ).