ພິທີເຊັນສັນຍາວ່າດ້ວຍການບໍລິການ ຜ່ານລະບົບທະນາຄານພັດທະນາລາວ (ທພລ) ລະຫວ່າງ ທພລ ສະມາຄົມການເງິນຈຸນລະພາກ ພ້ອມດ້ວຍ 7 ສະຖາບັນການເງິນຈຸນລະພາກ ປະກອບມີ ສະຖາບັນການເງິນຈຸນລະພາກ (ສກຈບ) ສະເຫຼີມສຸກ ສກຈບ ສີສົມບັດ ສກຈບ ເພື່ອການພັດທະນາ ແລະ ສົ່ງເສີມທຸລະກິດ (ບີດີພີ) ສກຈບ ດອກຄູນ ຈຳກັດ ສກຈບ ໄຊທານີ ສກຈບ ແອວເອທີ ແລະ ສກຈບ ໄພສານລ້ານຊ້າງ ໄດ້ຈັດຂຶ້ນວັນທີ 10 ກັນຍາ 2020 ທີ່ສຳນັກງານໃຫຍ່ທະນາຄານພັດທະນາລາວ ໂດຍການລົງນາມຂອງທ່ານ ສູນທອນ ສິນປະເສີດ ຮອງຜູ້ອຳນວຍການໃຫຍ່ ທພລ ແລະ ຜູ້ອຳນວຍການສະມາຄົມການເງິນຈຸນລະພາກ ພ້ອມດ້ວຍ ຜູ້ອຳນວຍການ 7 ສະຖາບັນການເງິນຈຸນລະພາກ ມີທ່ານ ອາຄົມ ປຣະເສີດ ຜູ້ອຳນວຍການໃຫຍ່ ທພລ ທ່ານ ນາງ ຂັນມະນີ ສຸທຳມະວົງ ຮອງປະທານສະພາບໍລິຫານສະມາຄົມການເງິນຈຸນລະພາກ ທ່ານ ພັນທະບູນ ໄຊຍະເພັດ ຮອງຫົວໜ້າກົມຄຸ້ມຄອງສະຖາບັນການເງິນທະນາຄານແຫ່ງ ສປປ ລາວ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.
ການເຊັນສັນຍາຮ່ວມມືກັນໃນຄັ້ງນີ້ ເປັນຂີດໝາຍອັນດີໃນການຮ່ວມມືກັນ ລະຫວ່າງຂົງເຂດສະຖາບັນການເງິນຈຸນລະພາກ ແລະ ຂົງເຂດທະນາຄານ ເປັນການນຳເອົາເຕັກໂນໂລຊີທີ່ທັນສະໄໝ ເຂົ້າມາປະກອບສ່ວນໝູນໃຊ້ເຂົ້າໃນວຽກງານການຄຸ້ມຄອງພະນັກງານ ການຊຳລະຄ່າງວດສິນເຊື່ອ ສຳລັບລູກຄ້າຂອງສະຖາບັນການເງິນຈຸນລະພາກ ການໃຫ້ບໍລິການຝາກ ຫຼື ຖອນ ໃຫ້ແກ່ລູກຄ້າຂອງທະນາຄານພັດທະນາລາວ ແນໃສ່ສ້າງຄວາມສະດວກສະບາຍໃຫ້ແກ່ພະນັກງານ ແລະ ລູກຄ້າຂອງທະນານຄານພັດທະນາລາວ ແລະ ລູກຄ້າຂອງແຕ່ລະສະຖາບັນການເງິນຈຸນລະພາກ ໃຫ້ສາມາດດຳເນີນທຸລະກຳທາງດ້ານການເງິນໄດ້ສະດວກ ພ້ອມທັງເປັນການກະຕຸ້ນລູກຄ້າເຂົ້າມາໃຊ້ບໍລິການຫຼາຍຂຶ້ນ ເປັນການປະກອບສ່ວນກະຕຸກຊຸກຍູ້ໃຫ້ພໍ່ແມ່ປະຊາຊົນ ຫັນໄປສູ່ການນຳໃຊ້ລະບົບເອເລັກໂຕຣນິກໃນການຊຳລະສະສາງຫຼາຍຂຶ້ນ ຕາມແນວທາງນະໂຍບາຍທີ່ຂັ້ນເທິງວາງອອກ ທັງຮັບປະກັນຄວາມຖືກຕ້ອງ ວ່ອງໄວ ແລະ ປອດໄພ.