ໃນຊຸມມື້ມໍ່ໆມານີ້ ມີເລື່ອງວຸ້ນວາຍຫຼາຍເລື່ອງເກີດຂຶ້ນໃນສັງຄົມຂ່າວອອນລາຍ ເປີດໜ້າເຟສບຸກຂຶ້ນມາລະແມ່ນພໍ້ໂລດ ຄັນບໍ່ມີສະຕິໃນການບໍລິໂພກຂ່າວແລ້ວ ຈະຖືກຂ່າວອອນລາຍປັ່ນຫົວເນີ !.
ທີ່ເວົ້າວ່າ: ປັ່ນຫົວ ເພາະວ່າໃນເລື່ອງທີ່ເກີດຂຶ້ນນັ້ນ ມີບາງຂໍ້ມູນແອບແຝງເຂົ້າມາ ພົ້ນເດັ່ນກວ່າເພິ່ນແມ່ນກໍລະນີຂໍ້ຂັດແຍ່ງຢູ່ວັດບ້ານໜອງພະຍາ ເມືອງໄຊທານີ ນະຄອນຫຼວງວຽງຈັນ ເຮົານີ້ເອງ.
ມີການຕັ້ງຂໍ້ກ່າວຫາເຊິ່ງກັນ ແລະ ກັນ ບາງຂ່າວກໍອອກມາໂດຍເອົາກົດໝາຍມາທຽບຄຽງ…ປອມແປງຄຳສັ່ງຂອງຂັ້ນເທິງ ອັນຮ້າຍແຮງແມ່ນການກົດ Like ກົດ Share ຕໍ່ ມີ Comment ພາໃຫ້ເກີດຄວາມສັບສົນວຸ້ນວາຍພໍສົມຄວນໃນໜ້າເຟສບຸກ.
ຕໍ່ເຫດການນີ້ ຜູ້ຂຽນຢາກໃຫ້ຜູ້ບໍລິໂພກຂ່າວທັງຫຼາຍມີສະຕິ ແລະ ບໍ່ຍອມໃຫ້ສື່ອອນລາຍມັນປັ່ນຫົວແລ້ວໄປຫຼົງ Share ຫຼື Comment ຕາມເພາະມັນຫຼໍ່ແຫຼມ ແລະ ມີຄວາມສ່ຽງຕໍ່ການລະເມີດກົດໝາຍທີ່ກ່ຽວຂ້ອງ ເປັນຕົ້ນແມ່ນ ໃນປະມວນກົດໝາຍອາຍາ ມາດຕາ 168 ໄດ້ກຳນົດໄວ້ ກ່ຽວກັບການສ້າງຄວາມເສຍຫາຍຜ່ານສື່ສັງຄົມອອນລາຍ ເຊິ່ງມີທັງປັບໃໝ ແລະ ຕັດອິດສະຫຼະພາບ.
ຢາກແນະນຳໃຫ້ເພື່ອນຜູ້ອ່ານສຶກສາລະບຽບການ ແລະ ກົດໝາຍຕ່າງໆ ເປັນຕົ້ນແມ່ນຄຳແນະນຳກ່ຽວກັບການນຳໃຊ້ສື່ສັງຄົມອອນລາຍ ໃຫ້ມີຄວາມປອດໄພ ສະບັບເລກທີ 1561/ປທສ ລົງວັນທີ 26 ສິງຫາ 2020 ຂອງທ່ານລັດຖະມົນຕີກະຊວງໄປສະນີໂທລະຄົມມະນາຄົມ ແລະ ການສື່ສານ (ປທສ) ໂດຍສະເພາະແມ່ນໝວດທີ V ວ່າດ້ວຍຂ່າວປອມ ແລະ ການຫຼິ້ນການພະນັນຜ່ານສື່ສັງຄົມອອນລາຍ.
ສຳລັບຂ່າວປອມເພິ່ນແນະນຳດັ່ງນີ້:
9. ການສັງເກດຂ່າວປອມ ຄວນປະຕິບັດດັ່ງນີ້:
9.1 ຄວນມີສະຕິຢ່າຫຼົງເຊື່ອຫົວຂໍ້ຂ່າວ ເພາະຂ່າວປອມມັກຈະມີຂໍ້ຄວາມພາດຫົວຂໍ້ຂ່າວ ທີ່ເຮັດໃຫ້ຄົນທີ່ພົບເຫັນສະດຸດຕາ ຢາກກົດເຂົ້າໄປອ່ານ ຖ້າອ່ານຫົວຂໍ້ຂ່າວບໍ່ມີຄວາມເປັນໄປໄດ້ ໃຫ້ສັນນິຖານໄວ້ວ່າເປັນຂ່າວປອມ.
9.2 ຄວນພິຈາລະນາລີ້ງຢ່າງຖີ່ຖ້ວນລີ້ງປອມ ຫຼື ລີ້ງທີ່ຄ້າຍຄືລີ້ງແທ້ ອາດເປັນສັນຍານເຕືອນວ່າເປັນຂ່າວປອມ ມັກຈະປອມແປງຊື່ລີ້ງໃຫ້ມີຊື່ຄືກັບເວັບໄຊທີ່ໜ້າເຊື່ອຖື.
9.3 ຄວນກວດສອບແຫຼ່ງທີ່ມາຂອງຂ່າວ ກວດສອບໃຫ້ແນ່ໃຈວ່າລີ້ງດັ່ງກ່າວຂຽນຂຶ້ນຈາກແຫຼ່ງຂ່າວທີ່ໜ້າເຊື່ອຖື ແລະ ມີຊື່ສຽງໃນການນຳສະເໜີຂໍ້ມູນ.
9.4 ຄວນສັງເກດຮູບພາບຂ່າວປອມ ມັກເອົາຮູບພາບທີ່ບໍ່ກ່ຽວຂ້ອງ ຫຼື ບິດເບືອນຂຶ້ນ ເພື່ອດຶງດູດຜູ້ອ່ານໃຫ້ກົດເຂົ້າເວັບໄຊ ຊຶ່ງເຮົາສາມາດກວດສອບຮູບພາບໄດ້ໃນອິນເຕີເນັດ.
9.5 ຄວນສັງເກດສິ່ງທີ່ຜິດປົກກະຕິຂອງເວັບໄຊ ຂ່າວປອມມັກສະກົດຄຳຜິດ ຫຼື ມີການຈັດວາງຮູບແບບທີ່ເບິ່ງບໍ່ເປັນມືອາຊີບ ຫາກເຫັນລັກສະນະເຫຼົ່ານີ້ ຄວນອ່ານຂ່າວຢ່າງລະມັດລະວັງ.
9.6 ຄວນກວດສອບວັນທີຂ່າວປອມອາດມີລຳດັບເຫດການທີ່ບໍ່ສົມເຫດສົມຜົນ ຫຼື ມີການປ່ຽນແປງວັນທີຂອງເຫດການ.
9.7 ຄວນກວດສອບຫຼັກຖານແຫຼ່ງຂໍ້ມູນຂອງຜູ້ຂຽນ ເພື່ອຢືນຢັນວ່າແຫຼ່ງຂໍ້ມູນນັ້ນຖືກຕ້ອງ ຂ່າວທີ່ບໍ່ມີຫຼັກຖານ ຫຼື ອ້າງອີງຜູ້ຊ່ຽວຊານທີ່ບໍ່ລະບຸຊື່ ອາດຊີ້ໃຫ້ເຫັນວ່າ ຂ່າວດັ່ງກ່າວເປັນຂ່າວປອມ.
9.8 ຄວນປຽບທຽບຂ່າວຈາກແຫຼ່ງຂ່າວອື່ນ ຖ້າບໍ່ມີແຫຼ່ງຂ່າວອື່ນທີ່ຂຽນເລື່ອງດຽວກັນ ອາດເປັນຂ່າວປອມໄດ້ ຖ້າຫຼາຍແຫຼ່ງຂ່າວໃຫ້ຂໍ້ມູນທີ່ກົງກັນກໍມີຄວາມໜ້າເຊື່ອຖືໄດ້.
9.9 ຄວນສັງເກດເບິ່ງບາງຂ່າວກໍຈົງໃຈສ້າງຂຶ້ນໃຫ້ເປັນຂ່າວປອມ ໃຊ້ວິຈາລະນະຍານໃນການອ່ານ ແລະ ສົ່ງຕໍ່ສະເພາະຂ່າວທີ່ເຊື່ອຖືໄດ້ເທົ່ານັ້ນ.
ສະເໜີຂໍ້ມູນຂ້າງເທິງ ເພື່ອໃຫ້ຜູ້ອ່ານມີຂໍ້ມູນເວລາບໍລິໂພກຂ່າວອອນລາຍເນີ !.
ໂດຍ: ແນວລາວ