ທ່ານນາງ ວຽງທອງ ສີພັນດອນ ປະທານອົງການກວດສອບແຫ່ງລັດ ໄດ້ນຳພາຄະນະຜູ້ແທນລາວເຂົ້າຮ່ວມກອງປະຊຸມທາງໄກ ຄະນະກຳມະການແລກປ່ຽນຄວາມຮູ້ອາຊຽນຊາຍຄັ້ງທີ 2 ແລະ ກອງປະຊຸມເຜີຍແຜ່ວິທີການກວດສອບເປົ້າໝາຍພັດທະນາແບບຍືນຍົງຂອງອົງການລິເລີ່ມເພື່ອການພັດທະນາອິໂຕຊາຍ ຈັດຂຶ້ນວັນທີ 9 ກັນຍາ 2020 ທີ່ອົງການກວດສອບແຫ່ງລັດ ໂດຍເປັນປະທານຈັດກອງປະຊຸມ ແລະ ເປັນປະທານກອງປະຊຸມຂອງທ່ານ ດາໂຕະນິກ ອັດສະມັນນິກ ອັບດຸນມາຢີດ ປະທານອົງການກວດສອບມາເລເຊຍ ໃນຖານະເປັນປະທານຄະນະກຳມະການແລກປ່ຽນຄວາມຮູ້ຂອງອາຊຽນຊາຍ 2020-2021 ມີ 8 ສະຖາບັນກວດສອບສູງສຸດທີ່ເປັນສະມາຊິກເຂົ້າຮ່ວມຄື: ມາເລເຊຍ ບຣູໄນ ກຳປູເຈຍ ລາວ ມຽນມາ ຟີລິບປິນ ໄທ ແລະ ຫວຽດນາມ.
ກອງປະຊຸມໄດ້ຄັດເລືອກຫົວຂໍ້ຂອງການກວດສອບ ເພື່ອຈະເປັນຫົວຂໍ້ໃນການແລກປ່ຽນຄວາມຮູ້ໃນປີ 2020-2021 ເຊິ່ງປະກອບມີບັນດາຫົວຂໍ້ຄື: ຄວາມຮູ້ກ່ຽວກັບວິທີການກວດສອບການພັດທະນາແບບຍືນຍົງຮັບຜິດຊອບໂດຍອົງການກວດສອບມາເລເຊຍ ການກວດສອບສິ່ງແວດລ້ອມ ຮັບຜິດຊອບໂດຍອົງການກວດສອບຫວຽດນາມ ການກວດສອບເຕັກໂນໂລຊີການສື່ສານຂໍ້ມູນຂ່າວສານ ຮັບຜິດຊອບໂດຍສຳນັກງານກວດເງິນແຜ່ນດິນປະເທດໄທ ກວດສອບກະສິກຳທັນສະໄໝ (ການປະມົງ) ຮັບຜິດຊອບໂດຍອົງການກວດສອບອິນໂດເນເຊຍ ການກວດສອບກໍ່ສ້າງ ຮັບຜິດຊອບໂດຍອົງການກວດສອບບຣູໄນ ການກວດສອບການຈັດຊື້ຢາຮັບຜິດຊອບໂດຍອົງການກວດສອບມຽນມາ ການກວດສອບການມືສ່ວນຮ່ວມຂອງພົນລະເມືອງ ຮັບຜິດຊອບໂດຍອົງການກວດສອບຟີລິບປິນ ແລະ ການກວດສອບການຈັດຊື້ໃນຂົງເຂດລັດວິສາຫະກິດ ຮັບຜິດຊອບໂດຍອົງການກວດສອບແຫ່ງລັດ ສປປ ລາວ.
