ຕາມຫຼັກການແລ້ວ ຄົນເຮົາໃນທຸກສາຂາອາຊີບນັ້ນ ລ້ວນແຕ່ຕ້ອງຢຶດໝັ້ນໃນຄວາມຮັບຜິດຊອບ ແລະ ຈັນຍາບັນຂອງຕົນ ແຕ່ໃນຕົວຈິງແລ້ວພັດບໍ່ເປັນຈັ່ງວ່າທັງໝົດ ຕົວຢ່າງ ທີ່ຂໍຍົກໃຫ້ເຫັນໃນບົດນີ້ ກໍຄື ເລື່ອງຄົນທີ່ມີອາຊີບຂັບລົດໂດຍສານປະເພດແທັກຊີທີ່ຂາດຄວາມຮັບຜິດຊອບ ຂາດຈັນຍາບັນທີ່ຄວນມີ.
ທີ່ປະເທດໄທ ເລື່ອງຜູ້ຂັບລົດແທັກຊີ ຫຼື ລົດໃຫ້ບໍລິການ ການໂດຍສານສາທາລະນະ ປະຕິເສດຮັບຜູ້ໂດຍສານແບບດື້ໆນີ້ ໄດ້ກາຍເປັນເລື່ອງວິພາກວິຈານໃນສັງຄົມໄທມາເປັນເວລາດົນນານແລ້ວ ເຖິງຂັ້ນໄດ້ມີຄຳຮຽກຮ້ອງໃຫ້ອອກກົດລະບຽບລົງໂທດພວກໂຊເຟີເຫຼົ່ານີ້ຢ່າງສະສົມ ເພາະຂືນປ່ອຍປະລະເລີຍພວກເຂົາກໍຈະສ້າງຄວາມເສຍຫາຍໃຫ້ແກ່ສັງຄົມ ແລະ ຂະແໜງການຂົນສົ່ງຂອງໄທ ແລະ ແລ້ວໃນທ້າຍເດືອນມິຖຸນາ 2019 ກໍມີຂ່າວວ່າ ກົມຂົນສົ່ງທາງບົກຂອງໄທໄດ້ອອກກົດໝາຍສະບັບໃໝ່ ໂດຍໂຮມເອົາກົດໝາຍຄຸ້ມຄອງຍານພາຫະນະ ສະບັບປີ 1979 ແລະ ກົດໝາຍຂົນສົ່ງທາງບົກ ປີ 1979 ເຂົ້າກັນ ແຕ່ຍັງຮັກສາບົດລົງໂທດສຳລັບຜູ້ປະຕິເສດຮັບຜູ້ໂດຍສານ ໂດຍໄດ້ເພີ່ມໂທດໜັກຂຶ້ນຕື່ມ ຄື ໄດ້ເພີ່ມຄ່າປັບໃໝຈາກ 2.000 ບາດ ເປັນ 5.000 ບາດ ສຳລັບໂຊເຟີລົດໂດຍສານແທັກຊີ ທີ່ພິເສດໄປກວ່ານັ້ນ ການປັບໃໝຍັງກຳນົດໃສ່ບໍລິສັດທີ່ໃຫ້ເຊົ່າລົດແທັກຊີ ທີ່ສ້າງບັນຫານຳອີກດ້ວຍ ຄ່າປັບໃໝສູງສຸດ 50.000 ບາດ ການປັບຂຶ້ນໂທດປັບໃໝໂຊເຟີລົດແທັກຊີນີ້ ແມ່ນເພື່ອໃຫ້ສອດຄ່ອງກັບລະບຽບການປັບໃໝລົດໃຫ້ບໍລິການໂດຍສານປະເພດຕ່າງໆ ເຊັ່ນ: ລົດທົວ ລົດຕູ້ ແລະ ອື່ນໆ ນອກຈາກຮູບການປັບໃໝແລ້ວ ພາຍໃຕ້ກົດໝາຍນີ້ພະນັກງານກ່ຽວຂ້ອງ ຍັງສາມາດກັກໃບຂັບຂີ່ຂອງລົດແທັກຊີຄັນກໍ່ເຫດໄວ້ເປັນເວລາແຕ່ 15-30 ວັນ ແລະ ບັງຄັບໃຫ້ຜູ້ກະທຳຜິດເຂົ້າເຝິກອົບຮົມ ກ່ຽວກັບຫຼັກການໃຫ້ບໍລິການໂດຍ ສານສາທາລະນະເປັນເວລາ 3 ຊົ່ວໂມງອີກດ້ວຍ.
ທີ່ຫວຽດນາມ ຂັ້ນຕອນ ແລະ ມາດຕະການໃໝ່ເພື່ອຄຸ້ມຄອງລົດໂດຍສານປະເພດແທັກຊີ ຢູ່ ສສ ຫວຽດນາມນັ້ນ ໄດ້ເລີ່ມປະຕິບັດມາແຕ່ກາງປີ 2014 ເປັນຕົ້ນມາ ດ້ວຍການຕິດຕັ້ງກ່ອງດຳ (Black Box) ແລະ ເຄື່ອງຈັກຊີ້ບອກໄລຍະທາງທີ່ແລ່ນໃຫ້ບໍລິການລູກຄ້າ ເປົ້າໝາຍຕົ້ນຕໍຂອງກົດລະບຽບຄຸ້ມຄອງນີ້ ແມ່ນເພື່ອຕິດຕາມການເກັບຄ່າໂດຍສານໃຫ້ມີຄວາມໂປ່ງໃສ ກົດລະບຽບຊຶ່ງທາງກະຊວງຂົນສົ່ງຫວຽດນາມເປັນເຈົ້າການຮ່າງຂຶ້ນນີ້ ໄດ້ກຳນົດຂັ້ນຕອນຄຸ້ມຄອງລົດແທັກຊີ ດັ່ງນີ້: ສຳເລັດການຕິດຕັ້ງກ່ອງດຳພາຍໃນເດືອນກໍລະກົດ 2014 ຕິດຕັ້ງເຄື່ອງຈັກສະແດງໄລຍະທາງທີ່ໃຫ້ບໍລິການລູກຄ້າ ພາຍໃນປີ 2016 ແລະ ກຳນົດໃຫ້ແທັກຊີທຸກຄັນບັນທຶກຕາຕະລາງ ແລະ ຄ່າບໍລິການໄວ້ໃນທຸກໆຖ້ຽວການບໍລິ ການ ກົດລະບຽບຍັງໄດ້ຮຽກຮ້ອງໃຫ້ບັນດາອົງການປົກຄອງທ້ອງຖິ່ນ ເພີ່ມທະວີການຄຸ້ມຄອງລົດແທັກຊີ ແລະ ມອບຄວາມຮັບຜິດຊອບໃຫ້ສະພາປະຊາຊົນທ້ອງຖິ່ນ ໃນການກຳນົດສີຂອງລົດແທັກຊີໃນເຂດຄຸ້ມຄອງຂອງຕົນ ນອກຈາກນັ້ນ ອົງການປົກຄອງທ້ອງຖິ່ນ ຍັງຮັບຜິດຊອບກຳນົດຈຳນວນລົດໃຫ້ແຕ່ລະບໍລິສັດບໍລິການລົດແທັກຊີ ໃນລະດັບແຕ່ 10 ຫາ 100 ຄັນ ທ່ານ ລຽນ (Bui Danh Lien) ປະທານສະມາຄົມຂົນສົ່ງຂອງນະຄອນຫຼວງຮ່າໂນ້ຍ (ໃນເວລານັ້ນ) ບອກກ່ຽວກັບເລື່ອງນີ້ວ່າ ການຕິດຕັ້ງກ່ອງດຳ ແລະ ໄດ້ພີມໃບບິນຮັບເງິນຄ່າແທັກຊີນີ້ ຈະຊ່ວຍເຮັດໃຫ້ການຕິດຕາມຄຸ້ມຄອງເຫຼົ່າບໍລິສັດລົດແທັກຊີ ແລະ ຜູ້ໂດຍສານດີຂຶ້ນ ໂດຍສະເພາະ ເວລາມີກໍລະນີຜູ້ໂດຍສານເຮັດເຄື່ອງຂອງຕົກເຮ່ຍໃນລົດ ຫຼື ເວລາມີການທັກທ້ວງກ່ຽວກັບການເກັບຄ່າໂດຍສານສູງເກີນກຳນົດ.