ສຳນັກຂ່າວຕ່າງປະເທດ ອ້າງລາຍງານຈາກ Adobe Analytics ໃນໄລຍະເດືອນຕຸລາປີທີ່ຜ່ານມາ ທີ່ລະບຸວ່າປະມານ 40% ຂອງຄົນອາເມຣິກາ ມີທ່າອ່ຽງທີ່ຈະຊື້ລົດໃຫຍ່ຂັບເຄື່ອນອັດຕະໂນມັດໃນອະນາຄົດ ໂດຍສຳຫຼວດຈາກຊາວສະຫະລັດ ທີ່ມີອາຍຸ 18 ປີຂຶ້ນໄປຈຳນວນ 1.040 ຄົນ.
ພວກເຂົາຫວັງວ່າຈະໄດ້ກິນເຂົ້າໜົມ ພິມຕອບແຊັດ ເບິ່ງລາຍການທີ່ມັກ ຫຼືສົ່ງອີເມວ ຂະນະທີ່ລົດເຄື່ອນຕົວໄປແບບໄຮ້ຄົນຂັບ ເຊິ່ງພື້ນທີ່ໃນລົດຈະກາຍເປັນເໝືອນເຮືອນ ຫຼື ຫ້ອງການຂະໜາດນ້ອຍ.
ບໍລິສັດເຕັກໂນໂລຊີ ແລະ ບໍລິສັດລົດຊັ້ນແນວໜ້າລະດັບໂລກ ໄດ້ລົງທຶນນັບພັນລ້ານໂດລາເພື່ອພັດທະນາລົດຂັບເຄື່ອນແບບອັດຕະໂນມັດ ແຕ່ໃນຄວາມເຫັນຂອງຜູ້ຊ່ຽວຊານໃນແວດວົງລົດຍົນ ກັບເຫັນວ່າຈະຕ້ອງໃຊ້ເວລາອີກນານຫຼາຍປີກວ່າທີ່ອຸດສາຫະກຳລົດໃຫຍ່ ຈະພັດທະນາໄປເຖິງຈຸດທີ່ປາສະຈາກການຄວບຄຸມໂດຍມະນຸດແບບ 100%.
ໃນເດືອນຕຸລາທີ່ຜ່ານມາ ບໍລິສັດຮຸນໄດ ຜູ້ຜະລິດລົດຈາກປະເທດ ສ ເກົາຫຼີ ໄດ້ເປີດເຜີຍແຜນການລົງທຶນໃນລົດໄຮ້ຄົນຂັບ ແລະ ລະບົບທີ່ກ່ຽວຂ້ອງ ຢ່າງໃດກໍຕາມ ຍັງຖືວ່າໄລ່ຕາມອີກຫຼາຍບໍລິສັດທີ່ໄດ້ພັດທະນາໄປກ່ອນໜ້າ ຢ່າງເຊັ່ນ ບໍລິສັດ GM ຫຼື General Motors ບໍລິສັດ Uber ບໍລິສັດ Lyft ແລະ ບໍລິສັດ Apple ເຊິ່ງການແຂ່ງຂັນນີ້ຍັງຍາກທີ່ຈະບອກວ່າໃຜຈະກ້າວຂຶ້ນມາເປັນຜູ້ນຳ.
ລາຍງານປີທີ່ຜ່ານມາຈາກໜ່ວຍງານພາກລັດໃນກາລິຟໍເນຍ ລະບຸວ່າ ໂຄງການຢ່າງເຊັ່ນ Waymo ຂອງ Alphabet ແລະ GM Cruise ທີ່ໄດ້ຮັບເງິນລົງທຶນຈາກກອງທຶນ $100 billion Vision Fund ທີ່ມີບໍລິສັດຂ້າມຊາດ SoftBank Group ໃຫ້ການສະໜັບສະໜູນ ໄດ້ທົດສອບສະມັດຖະນະລົດໄຮ້ຄົນຂັບໄປຫຼາຍກວ່າ 25.000 ກິໂລແມັດ.
ທາງດ້ານບໍລິສັດ BMW ຜູ້ຜະລິດລົດຈາກປະເທດເຢຍລະມັນ ກໍໄດ້ຈັບມືກັບບໍລິສັດ Tencent Holdings ຜູ້ຜະລິດເກມອອນລາຍ ລາຍໃຫຍ່ສັນຊາດຈີນ ຮ່ວມພັດທະນາສູນຄອມພິວເຕີໃນປະເທດຈີນ.
ກຸ່ມມິລເລນນຽວສ໌ (Millennials) ຄືຄົນທີ່ໃຫ້ການຕອບຮັບລົດໄຟຟ້າ ລົດໄຮບຣິດ ແລະ ລົດເຊື່ອມຕໍ່ອິນເຕີເນັດ (connected car) ຫຼາຍທີ່ສຸດ ຈາກຜົນການສຳຫຼວດນີ້ ຍັງລະບຸອີກວ່າ ທ່າອ່ຽງຂອງຜູ້ຂັບຂີ່ໃນສະຫະລັດ ໃຫ້ການສະໜັບສະໜູນລົດໄຮ້ຄົນຂັບເພີ່ມຂຶ້ນກວ່າ 35% ເມື່ອທຽບກັບປີກ່ອນໜ້າ.
ໂດຍຜູ້ຊື້ລົດໃນອາເມຣິກາຈຳນວນຫຼາຍ ມັກຈະສອບຖາມວ່າ ລົດມີລະບົບຕົວຊ່ວຍຢ່າງຄຸນສົມບັດຂັບເຄື່ອນເຄິ່ງອັດຕະໂນມັດ (self-driving features) ຫຼືບໍ່ ລວມທັງມີຜູ້ທີ່ໃຫ້ຄວາມສົນໃຈກັບລົດທີ່ສາມາດເຊື່ອມຕໍ່ກັບອິນເຕີເນັດ ໄດ້ເປັນຈຳນວນຫຼາຍແບບທີ່ບໍ່ເຄີຍເກີດຂຶ້ນມາກ່ອນ.