ກອງປະຊຸມເຜີຍແຜ່ກ່ຽວກັບການອອກບັດພະນັກງານ-ລັດຖະກອນ ຈັດຂຶ້ນໃນວັນທີ 9 ກັນຍາ 2020 ທີ່ສະໂມສອນເມືອງສັງທອງ ນະຄອນຫຼວງວຽງຈັນ (ນວ) ເປັນປະທານຮ່ວມຂອງທ່ານ ຄຳສວຍ ອຸ່ນດາລາ ຮອງເຈົ້າເມືອງສັງທອງ ແລະ ທ່ານ ກາບແກ້ວ ນາມມະຈັກ ຮອງຫົວໜ້າພະແນກພາຍໃນ ນວ ມີບັນດາຄະນະປະຈຳພັກ ຫົວໜ້າຫ້ອງການ ຮອງຫ້ອງການ ພ້ອມດ້ວຍຜູ້ຮັບຜິດຊອບວຽກງານຈັດຕັ້ງ-ພະນັກງານອ້ອມຂ້າງເມືອງເຂົ້າຮ່ວມ.
ຈຸດປະສົງຂອງການເຜີຍແຜ່ຄັ້ງນີ້ ກໍເພື່ອກຳນົດຫຼັກການ ລະບຽບການ ແລະ ມາດຕະການກ່ຽວກັບການອອກບັດພະນັກງານ-ລັດຖະກອນ ເຮັດໃຫ້ການຈັດຕັ້ງພັກ-ລັດ ແນວລາວສ້າງຊາດ ແລະ ອົງການຈັດຕັ້ງມະຫາຊົນຂັ້ນສູນກາງ ທ້ອງຖິ່ນ ແລະ ພາກສ່ວນທີ່ກ່ຽວຂ້ອງ ເປັນບ່ອນອີງໃນການດຳເນີນຈັດຕັ້ງປະຕິບັດວຽກງານດັ່ງກ່າວໄດ້ຢ່າງຖືກຕ້ອງ ແລະ ເປັນລະບົບ ແນະນຳໃຫ້ພະນັກງານ-ລັດຖະກອນຜູ້ຖື ແລະ ນຳໃຊ້ບັດມີຄວາມຮັບຮູ້ ແລະ ເຂົ້າໃຈໃນການນຳໃຊ້ບັດໃຫ້ຖືກຕ້ອງຕາມລະບຽບກົດໝາຍ.