ການເຄື່ອນໄຫວຂອງສານ ບັນດາຄູ່ຄວາມ ແລະ ຜູ້ເຂົ້າຮ່ວມອື່ນ ໃນການດຳເນີນຄະດີແພ່ງ ແນໃສ່ແກ້ໄຂຂໍ້ຂັດແຍ່ງທາງແພ່ງທີ່ເກີດຂຶ້ນໃຫ້ຖືກຕ້ອງ ແລະ ເປັນທຳ ເພື່ອປົກປ້ອງສິດ ແລະ ຜົນປະໂຫຍດອັນຊອບທຳຂອງບຸກຄົນ ນິຕິບຸກຄົນ ການຈັດຕັ້ງໃດໜຶ່ງ ທີ່ຖືກບຸກຄົນອື່ນລະເມີດ ຫຼື ໂຕ້ແຍ່ງ ຊຶ່ງການເຄື່ອນໄຫວ ດັ່ງກ່າວ ຕ້ອງຢູ່ບົນຫຼັກການລະບຽບການ ແລະ ຂັ້ນຕອນທີ່ກຳນົດໄວ້ນັ້ນຄື ການຄົ້ນຄວ້າດຳເນີນຄະດີ ເພື່ອຈຸດປະສົງດຽວ ຄືຊອກຫາຂໍ້ມູນຫຼັກຖານມາຢັ້ງຢືນເຫດການຄວາມເປັນຈິງຂອງຄະດີ ຮັບປະກັນການພິຈາລະນາຕັດສີນຄະດີໃຫ້ມີຄວາມຖືກຕ້ອງ ແລະ ເປັນທຳ.
ຖ້າບໍ່ມີຫຼັກຖານ ຈະເຮັດໃຫ້ແຕ່ລະພາກສ່ວນເຄື່ອນໄຫວຕາມແນວຄິດ ຈຸດພິເສດ ຫຼື ຄວາມຕ້ອງການຂອງຕົນເອງ ອັນຈະພາໃຫ້ການເຄື່ອນໄຫວດຳເນີນຄະດີບໍ່ໄປເຖິງຈຸດປະສົງ ແລະ ຄາດໝາຍທີ່ວາງໄວ້ຄືການຊອກເຫັນໄດ້ຄວາມເປັນຈິງຂອງຄະດີ ເພື່ອນຳມາພິຈາລະນາຕັດສີນ ໃຫ້ຖືກຕ້ອງ ແລະ ສອດຄ່ອງກັບກົດໝາຍ.
ສະນັ້ນ ເພື່ອຮັບປະກັນໜ້າທີ່ດັ່ງກ່າວ ສານອາດຈະນຳໃຊ້ມາດຕະການຕ່າງໆ ຕາມທີ່ກົດໝາຍອະນຸຍາດເຂົ້າໃນເວລາດຳເນີນຄະດີຂອງຕົນ ຈຸດປະສົງກໍເພື່ອເຮັດໃຫ້ບັນລຸຕາມກຳນົດເວລາຂອງການດຳເນີນຄະດີ ໂດຍສະເພາະ ການດຳເນີນຄະດີແພ່ງ.
ມື້ນີ້ຈະສະເໜີໃຫ້ທ່ານຜູ້ອ່ານໄດ້ຮູ້ຕື່ມ ກ່ຽວກັບການນຳໃຊ້ມາດຕະການຂອງສານໃນເວລາດຳເນີນຄະດີແພ່ງ ໂດຍສະເພາະ ໝາຍພາຕົວຈະອອກໃນກໍລະນີ ທີ່ຜູ້ຖືກສົງໄສ ຜູ້ຖືກຫາ ທີ່ບໍ່ຖືກກັກຂັງພາງ ພະຍານໂຈດທາງແພ່ງ ຜູ້ຮັບຜິດຊອບທາງແພ່ງ ຫາກໄດ້ຮັບໝາຍຮຽກເຖິງ 3 ຄັ້ງແລ້ວແຕ່ບໍ່ເຂົ້າມາຕາມໝາຍຮຽກ ໂດຍບໍ່ມີເຫດຜົນພຽງພໍນັ້ນ ຫົວໜ້າອົງການສືບສວນ-ສອບສວນ ຫົວໜ້າອົງການໄອຍະການ ຫຼື ສານຈະອອກຄຳສັ່ງໃຫ້ພາຜູ້ກ່ຽວ ການປະຕິບັດຄຳສັ່ງພາຕົວ ແມ່ນສິດ ແລະ ໜ້າທີ່ຂອງເຈົ້າໜ້າທີ່ຕຳຫຼວດ ຫຼື ທະຫານ ສຳລັບການກະທຳຜິດທາງທະຫານ ກ່ອນຈະພາຕົວຕ້ອງອ່ານຄຳສັ່ງໃຫ້ຜູ້ຖືກຫາພາຕົວຊາບ.
ບໍ່ອະນຸຍາດໃຫ້ພາຕົວ ແມ່ຍິງຖືພາມານ ຫຼື ຄົນເຈັບປ່ວຍ ທີ່ບໍ່ສາມາດ ອອກຈາກສະຖານທີ່ ຊຶ່ງໄດ້ຮັບການຢັ້ງຢືນຈາກຄະນະແພດ.
ໝາຍພາຕົວອອກໂດຍຄຳສັ່ງຂອງສານ ແມ່ນມີລັກສະນະເຈາະຈົງ ແລະ ແນ່ນອນ ເພື່ອໃຫ້ເຈົ້າໜ້າທີ່ຕຳຫຼວດນຳຕົວຈຳເລີຍ ພະຍານເຂົ້າມາພົບກັບຜູ້ພິພາກສາ ຕາມວັນເວລາ ສະຖານທີໄດ້ກຳນົດໄວ້ໃນໝາຍພາຕົວນັ້ນ ໃນກໍລະນີທີ່ຈຳເລີຍບໍ່ເຂົ້າມາສານຕາມໝາຍຮຽກເຖິງ 3 ຄັ້ງໂດຍບໍ່ມີເຫດຜົນ ສານກໍຈະອອກໝາຍພາຕົວຜູ້ກ່ຽວເຂົ້າມາສານ ເພື່ອເກັບກຳຂໍ້ມູນຫຼັກຖານໃຫ້ຄົບຖ້ວນ ຮອບດ້ານ ແລະ ຖືກເປົ້າໝາຍນອກຈາກນັ້ນ ກໍເປັນການຮັບປະກັນບໍ່ໃຫ້ຈຳເລີຍເອົາຕົວຫຼົບໜີຈາກການດຳເນີນຄະດີ.
ການອອກໝາຍພາຕົວຈຳເລີຍມີເປົ້າໝາຍ ເພື່ອນຳເອົາຜູ້ກ່ຽວຂ້ອງເຂົ້າມາຊີ້ແຈງລາຍລະອຽດ ຊີ້ບອກຄວາມເປັນຈິງຂອງຄະດີຕໍ່ສານ ຊຶ່ຕ້ອງມີເງື່ອນໄຂຕົ້ນຕໍ ຄືບໍ່ເຂົ້າມາຕາມໝາຍຮຽກຂອງສານໂດຍບໍ່ມີເຫດຜົນ ຫຼື ສານສາມາດຮູ້ໄດ້ວ່າ ຜູ້ກ່ຽວມີເຈດຕະນາ ບໍ່ເຄົາລົບນັບຖືສານ ຄືບໍ່ປະຕິບັດຕາມໝາຍຮຽກ ຫຼື ໝາຍເຊີນຂອງສານ ການນຳໃຊ້ມາດຕະການໝາຍພາຕົວ ແມ່ນມີຄວາມຮັບປະກັນໃຫ້ການດຳເນີນຄະດີໃຫ້ຖືກເປົ້າໝາຍ ຜູ້ພິພາກສາເອງກໍສາມາດຄົ້ນຄວ້າຂໍ້ໄດ້ຢ່າງຊັດເຈນ ຄົບຖ້ວນ ແລະ ຖ່ວງທັນກັບເວລາ ພ້ອມທັງຮັບປະກັນໃຫ້ການຈັດຕັ້ງປະຕິບັດຄຳຕັດສີນຂອງສານມີປະສິດທິຜົນ.
ຜົນສະທ້ອນຂອງການອອກໝາຍພາຕົວ ແມ່ນຈຳເລີຍຈະຖືກຈຳກັດສິດ ແລະ ພັນທະໃນການເຄື່ອນໄຫວໂດຍທັນທີ ໝາຍຄວາມວ່າ ຜູ້ຖືກພາຕົວຕ້ອງໄດ້ເຂົ້າໄປສານ ແລະ ເຈົ້າໜ້າທີ່ ທີ່ກ່ຽວຂ້ອງ ຕາມວັນເວລາ ທີ່ສານນັດໝາຍ ແລະ ເມື່ອສານໄດ້ເກັບກຳຂໍ້ມູນນຳຜູ້ຖືກໝາຍພາຕົວຕາມຈຸດປະສົງຄົບຖ້ວນແລ້ວ ກໍອະນຸຍາດໃຫ້ຜູ້ກ່ຽວກັບຄືນບ້ານໄດ້ ດັ່ງນັ້ນ ເພື່ອຫຼີກເວັ້ນຈາກການໝາຍພາຕົວດັ່ງກ່າວມາ ຜູ້ທີ່ເປັນຈຳເລີຍ ຫຼື ພະຍານຕ້ອງໃຫ້ຄວາມຮ່ວມມືແຕ່ຫົວທີ ໂດຍສະເພາະຕ້ອງເຂົ້າໄປຍັງສານຕາມໝາຍຮຽກ ໝາຍເຊີນບໍ່ດັ່ງນັ້ນກໍຈະມີຜູ້ມາພາຕົວໄປ ຍ້ອນບໍ່ຢາກໄປສານ ຫຼື ຢາກຫຼົບໜີຈາກການດຳເນີນຄະດີນັ້ນ.