ພິທີມອບ-ຮັບກິດຈະກຳການປັບປຸງ ໂຮງຮຽນປະຖົມສົມບູນບ້ານຫ້ວຍຊອງ-ຊ່າງແຄນ ເມືອງໃໝ່ ແຂວງຜົ້ງສາລີ ຈັດຂຶ້ນວັນທີ 7 ກັນຍາ 2020 ທີ່ໂຮງຮຽນແຫ່ງດັ່ງກ່າວ ໂດຍມີທ່ານ ສົມຈິດ ສິດທິວົງ ເຈົ້າເມືອງເມືອງໃໝ່ ທ່ານນາງ ແສງອ່ອນ ປວງມະນີວັນ ຮອງຫົວໜ້າກົມພັດທະນາວິຊາຊີບຊາວໜຸ່ມ ສູນກາງຊາວໜຸ່ມ ປະຊາຊົນປະຕິວັດລາວ (ສຊປລ) ພ້ອມດ້ວຍທ່ານ ນະລົງວິດ ຄອງສິນ ຜູ້ຈັດການອົງກອນສຳພັນ ບໍລິສັດ ຣາຊ-ລາວ ບໍລິການ ຈຳກັດ ມີທ່ານຮອງເລຂາຄະນະບໍລິຫານງານຊາວໜຸ່ມ ແຂວງຜົ້ງສາລີ ທ່ານຮອງຫົວໜ້າຫ້ອງການສຶກສາທິການ ແລະ ກີລາເມືອງໃໝ່ ອຳນາດການປົກຄອງ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ນະລົງວິດ ຄອງສິນ ແຈ້ງໃຫ້ຊາບວ່າ: ກິດຈະກຳດັ່ງກ່າວ ແມ່ນການຮ່ວມມືຈາກຫຼາຍພາກສ່ວນ ໂດຍສະເພາະຈາກ ສະຖານທູດໄທປະຈຳລາວ ບໍລິສັດ ຣາຊ ກຣຸບ ຈຳກັດ (ມະຫາຊົນ) ແລະ ບໍລິສັດ ຣາຊ-ລາວ ບໍລິການ ຈຳກັດ ຮ່ວມກັບກົມພັດທະນາວິຊາຊີບຊາວໜຸ່ມ (ສຊປລ) ລວມທັງບັນດາຫ້າງຮ້ານ ບໍລິສັດທັງພາກລັດ ແລະ ເອກະຊົນ ບຸກຄົນທົ່ວໄປ ອຳນາດການປົກຄອງ ພໍ່ແມ່ປະຊາຊົນພາຍໃນບ້ານດັ່ງກ່າວ ເປັນຕົ້ນ ຈາກສະຖານເອກອັກຄະລາຊະທູດໄທປະຈຳລາວ 15.000 ບາດ ປະມານ 4,3 ລ້ານ ກວ່າກີບ ສູນກາງຊາວໜຸ່ມປະຊາຊົນປະຕິວັດລາວ 18,2 ລ້ານກວ່າກີບ ບໍລິສັດ ຣາຊ-ລາວ ບໍລິການ ຈຳກັດ 27,3 ລ້ານກວ່າກີບ ແລະ ບໍລິສັດ ຣາຊ ກຣຸບ ຈຳກັດ (ມະຫາຊົນ) 50.000 ບາດ ປະມານ 14,5 ລ້ານກວ່າກີບ ພ້ອມກຳລັງແຮງງານຂອງພໍ່ແມ່ປະຊາຊົນ ແລະ ວັດສະດຸທ້ອງຖິ່ນປະກອບສ່ວນ ລວມມູນຄ່າທັງໝົດ 75,7 ລ້ານກວ່າກີບ.
ກິດຈະກຳຄັ້ງນີ້ ມີຊື່ວ່າ: ກິດຈະກຳໂຮງຮຽນຂອງນ້ອງ ປະກອບມີການປັບປຸງຫ້ອງຮຽນ ຫ້ອງເດັກຫຼີ້ນ (ຫ້ອງຮຽນເດັກນ້ອຍອະນຸບານ) ຫ້ອງນ້ຳ ສວນກະເສດແບບປະສົມປະສານ ລ້ຽງສັດ ປູກພືດສວນຄົວ ເຮັດເສົາທຸງ ປັບປຸງທັດສະນີຍະພາບໂດຍລວມ ພ້ອມທັງ ມີການມອບເຄື່ອງນຸ່ງຫົ່ມ ອຸປະກອນການຮຽນ ແລະ ອຸປະກອນກີລາ ກິດຈະກຳຄັ້ງນີ້ໄດ້ເລີ່ມການສຳຫຼວດມາແຕ່ວັນທີ 24 ກໍລະກົດ 2020 ເລີ່ມລົງມືຈັດຕັ້ງປະຕິບັດວັນທີ 10 ສິງຫາ 2020 ແລະ ສຳເລັດໃນວັນທີ 6 ກັນຍາ 2020.
ໂອກາດນີ້ ທ່ານ ສົມຈິດ ສິດທິວົງ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ການປະກອບສ່ວນຂອງທຸກພາກສ່ວນໃນຄັ້ງນີ້ ພິເສດແມ່ນທາງສະຖານທູດໄທ ແລະ ບໍລິສັດ ຣາຊ ກຣຸບ ຈຳກັດ (ມະຫາຊົນ) ບໍລິສັດ ຣາຊ-ລາວ ບໍລິການ ຈຳກັດ ກົມພັດທະນາວິຊາຊີບ ຊາວໜຸ່ມ ສຊປລ ທີ່ເປັນເຈົ້າການໃນການລະດົມທຶນ ເພື່ອນຳມາຊ່ວຍເຫຼືອໃນຄັ້ງນີ້ ລວມທັງອຳນາດການປົກຄອງ ພໍ່ແມ່ປະຊາຊົນ ອົງການຈັດຕັ້ງທຸກພາກສ່ວນ ທີ່ໃຫ້ການປະກອບສ່ວນ ເຮັດໃຫ້ກິດຈະກຳຄັ້ງນີ້ສຳເລັດ ເປັນການປະກອບສ່ວນອັນສຳຄັນ ເຂົ້າໃນການພັດທະນາວຽກງານຂະແໜງການສຶກສາ ໂດຍສະເພາະສົ່ງເສີມວຽກງານຂະຫຍາຍໂອກາດເຂົ້າຮຽນ ສ້າງໂອກາດໃຫ້ນັກຮຽນໄດ້ ເຂົ້າເຖິງການສຶກສາຫຼາຍຂຶ້ນ ສ້າງໃຫ້ເດັກໄດ້ມີສະຖານທີ່ຮຽນ ປະກອບສ່ວນເຂົ້າໃນການພັດທະນາຊັບພະຍາກອນມະນຸດ ໃຫ້ສາມາດຫຼຸດພົ້ນອອກຈາກຄວາມທຸກຍາກ ແລະ ດ້ອຍພັດທະນາ ແລະ ຫວັງວ່າກິດຈະກຳດັ່ງກ່າວຄົງໄດ້ຮັບການສະໜັບສະໜູນ ຊ່ວຍເຫຼືອຈາກບັນດາທ່ານ ອີກໃນໂອກາດຕໍ່ໄປ.
