ດັ່ງທີ່ເຄີຍເວົ້າມາແລ້ວໃນຫຼາຍບົດຜ່ານມາວ່າ ໃນຍຸກປັດຈຸບັນຍຸກທີ່ມີການແກ່ງແຍ້ງແຂ່ງຂັນກັນຮອບດ້ານ ໂດຍສະເພາະ ທາງດ້ານເສດຖະກິດ ການຄ້າ ແລະ ປັນຍາປະດິດນີ້ ບັນດາປະເທດໃນໂລກ ຕ່າງກໍສະແຫວງຫາຄວາມເປັນເລີດ ດັ່ງນັ້ນ ຈຶ່ງມີຄວາມຕ້ອງການບຸຄະລາກອນ “ຄົນ” ທີ່ມີຄວາມຮູ້ປັນຍາຊົນຄົນເກ່ງໃນສາຂາອາຊີບຕ່າງໆ ດ້ວຍການສົ່ງເສີມການສຶກສາສ້າງຄົນພາຍໃນ ໄປພ້ອມໆກັບການຍາດແຍ່ງເອົາຄົນເກ່ງຈາກຕ່າງປະເທດ ທີ່ມີຄວາມຊ່ຽວຊານ ຊຳນານງານ ສະນັ້ນ ໃນບົດປະຈຳວັນນີ້ ຈຶ່ງຂໍສະເໜີກ່ຽວກັບນະໂຍບາຍຂອງບາງປະເທດ ເພື່ອອ່ອຍເອົາຄົນທີ່ມີມັນສະໝອງລະດັບຫົວກະທິ ເຂົ້າໄປເປັນກຳລັງແຮງໃນການພັດທະນາປະເທດຂອງຕົນ ເຊັ່ນ:
ທີ່ຣັດເຊຍ: ທາງການຣັດເຊຍ ໄດ້ປັບປຸງກົດໝາຍວ່າດ້ວຍສັນຊາດສະບັບໃໝ່ ແລະ ປາກາດໃຊ້ນັບແຕ່ວັນທີ 31 ເດືອນກໍລະກົດ ປີ 2016 ເປັນຕົ້ນມາ ກົດໝາຍນີ້ ມີເປົ້າໝາຍດຶງດູດເອົານັກທຸລະກິດຕ່າງປະເທດ ທີ່ມີຄວາມເກ່ງກ້າສາມາດ ແລະ ປະສົບຜົນສຳເລັດມາແລ້ວ ກໍຄື ບັນດາຊ່ຽວຊານຂັ້ນຍອດໆໃນສາຂາອາຊີບທີ່ຣັດເຊຍມີຄວາມຕ້ອງການ ກົດໝາຍສັນຊາດສະບັບປັບປຸງ ໄດ້ກຳນົດມາດຕະການໂຍະຍານຂັ້ນຕອນ ເພື່ອໃຫ້ສັນຊາດແກ່ຕ່າງປະເທດທີ່ເປັນເປົ້າໝາຍ ລາຍລະອຽດມີດັ່ງນີ້: ຄົນຕ່າງປະເທດທີ່ໄດ້ຮັບການສຶກສາໃນຂະແໜງວິຊາຊີບຢູ່ຣັດເຊຍ ຫຼັງປີ 2002 ແລະ ໄດ້ເຮັດວຽກຢູ່ໃນປະເທດນີ້ມາແລ້ວ ບໍ່ຕ່ຳກວ່າ 3 ປີນັ້ນ ແມ່ນມີສິດຂໍຖືສັນຊາດຣັດເຊຍ ໄດ້ຊ່ຽວຊານຕ່າງປະເທດທີ່ມີຄວາມຊຳນານຖານລະດັບມືອາຊີບພິເສດ ກໍໄດ້ຮັບສິດໃນການຂໍຖືສັນຊາດເຊັ່ນກັນ ຄົນຕ່າງປະເທດທີ່ເຮັດທຸລະກິດຢູ່ຣັດເຊຍ ເປັນເວລາ 3 ປີ ແລະ ໄດ້ເສຍພາສີຂອງວິສາຫະກິດ ແລະ ປະກັນໄພເຂົ້າໃນກອງທຶນບຳນານເປັນຈຳນວນເງິນ 1 ລ້ານຣຸບ ເປັນຢ່າງໜ້ອຍໃນແຕ່ລະປີ ກໍສາມາດຂໍຖືສັນຊາດຣັດເຊຍໄດ້.
ທີ່ສະຫະພາບເອີຣົບ: ໃນໄລຍະກວ່າ 1 ທົດສະວັດຜ່ານມາ ຄະນະກຳມາທິການເອີຣົບຂອງສະຫະພາບເອີຣົບ ໄດ້ດຳເນີນນະໂຍບາຍດຶງດູດເອົາຊາວຕ່າງປະເທດ ເຂົ້າໄປລົງທຶນ ແລະ ເຄື່ອນໄຫວເຮັດທຸລະກິດ ໃນບັນດາປະເທດສະມາຊິກສະຫະພາບເອີຣົບ ຫຼື ອີຢູ (EU) ວິທີດຶງດູດໄດ້ເຮັດຜ່ານນະໂຍບາຍການອອກວີຊາໃຫ້ຄົນຕ່າງປະເທດ ທີ່ເປັນເປົ້າໝາຍ ເອີ້ນວ່າ “ວີຊາສີເຫຼືອງ” ທີ່ໄດ້ອອກໃຫ້ຄົນຕ່າງປະເທດໄປແລ້ວ 1 ແສນຄົນ (ສະຖິຕິຕົ້ນປີ 2019) ນອກຈາກນັ້ນ ອີຢູ ຍັງໄດ້ມອບສັນຊາດກິຕິມະສັກ ຫຼື ໜັງສືເດີນທາງພິເສດໃຫ້ຊາວຕ່າງປະເທດ ທີ່ມີຖານະຮັ່ງມີຈຳນວນກວ່າ 6.000 ຄົນອີກດ້ວຍ.
ທີ່ຍີ່ປຸ່ນ: ບັນຫາຄົນເຖົ້າເພີ່ມຈຳນວນຂຶ້ນຢ່າງໄວວາ ໄດ້ເຮັດໃຫ້ຍີ່ປຸ່ນປະເຊີນກັບບັນຫາຂາດແຄນແຮງງານ ດັ່ງນັ້ນ ທາງການຂອງປະເທດນີ້ ຈຶ່ງມີນະໂຍບາຍດິໆ ເພື່ອດຶງດູດເອົານັກວິຊາການຄຸນນະພາບຈາກຕ່າງປະເທດ ເຂົ້າໄປຕື່ມເຕັມໃຫ້ຂະແໜງການທີ່ຂາດແຄນແຮງງານຢ່າງໜັກໜ່ວງ ນະໂຍບາຍອຳນວຍຄວາມສະດວກໃຫ້ແກ່ຊ່ຽວຊານ ແລະ ແຮງງານຕ່າງປະເທດນັ້ນມີຫຼາຍຢ່າງ ແຕ່ຂໍເວົ້າສະເພາະແຕ່ເລື່ອງນະໂຍບາຍຊ່ວຍເຫຼືອເດັກນ້ອຍຊາວຕ່າງປະເທດ ໃຫ້ໄດ້ເຂົ້າໂຮງຮຽນຢ່າງທົ່ວເຖິງ ຄື ນັບແຕ່ປີ 2020 ນີ້ເປັນຕົ້ນໄປ ທາງກະຊວງສຶກສາຍີ່ປຸ່ນ ໄດ້ກຳນົດແຜນຊ່ວຍເຫຼືອເດັກຊາວຕ່າງປະເທດ ເພື່ອໃຫ້ໄດ້ເຂົ້າຮຽນລະດັບໂຮງຮຽນປະຖົມ ແລະ ມັດທະຍົມຕົ້ນ ໂດຍໄດ້ເນັ້ນໃຫ້ຄະນະຮັບຜິດຊອບຂະແໜງສຶກສາແຈ້ງໃຫ້ຄອບຄົວຊາວຕ່າງປະເທດຊາບ ກ່ຽວກັບຂັ້ນຕອນການສະເໜີເຂົ້າຮຽນໃນໂຮງຮຽນຂອງຍີ່ປຸ່ນ ຂຶ້ນບັນຊີເດັກຊາວຕ່າງປະເທດ ໃນເກນອາຍຸເຂົ້າໂຮງຮຽນພາກບັງຄັບ ຈັດສົ່ງປື້ມຄູ່ມືແນະນຳກ່ຽວກັບຂັ້ນຕອນການສະເໜີເຂົ້າຮຽນ ໃຫ້ຄອບຄົວຊາວຕ່າງປະເທດຊາບ ແລະ ໃນກໍລະນີບໍ່ໄດ້ຄຳຕອບຈາກຄອບຄົວຕ່າງປະເທດ ພະນັກງານທີ່ກ່ຽວຂ້ອງ ກໍຕ້ອງໄດ້ພົວພັນກັບຄອບຄົວດັ່ງກ່າວທາງໂທລະສັບ ຫຼື ໄປພົວພັນດ້ວຍຕົນເອງ ຕາມສະຖິຕິເດັກນັກຮຽນຊາວຕ່າງປະເທດ ທີ່ເຂົ້າຮຽນຂັ້ນປະຖົມ ມັດທະຍົມຕົ້ນ ແລະ ປາຍຢູ່ຍີ່ປຸ່ນ ໃນສົກສຶກສາປີ 2019 ນັ້ນ ມີເຖິງ 101.402 ຄົນ.