ເພື່ອຕ້ານການແຜ່ລະບາດຂອງເຊື້ອໄວຣັສໂຄໂຣນາສາຍພັນໃໝ່ ຫຼື COVID-19 ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມຄະນະສະເພາະກິດ ໄດ້ຖະແຫຼງຂ່າວຕໍ່ສື່ມວນຊົນໃນວັນທີ 25 ມີນາ 2020 ທີ່ສຳນັກງານນາຍົກລັດຖະມົນຕີ ກ່ຽວກັບການລະບາດຂອງເຊື້ອ COVID-19 ທີ່ມີຜູ້ຕິດເຊື້ອ 2 ຄົນໃນລາວ.
ທ່ານ ທອງລຸນ ສີສຸລິດ ກ່າວວ່າ: ລັດຖະບານລາວ ຈະເພີ່ມມາດຕະການເຂັ້ມງວດຄື:
1. ຈະເພີ່ມທະວີຕິດຕາມແຮງງານທີ່ກັບມາຈາກປະເທດເພື່ອນບ້ານ ເພື່ອຄຸ້ມຄອງໃຫ້ເຂັ້ມງວດໃນການກັກຕົວເອງພາຍໃນ 14 ວັນ.
2. ຂໍໃຫ້ປະຕິບັດຫຼັກການກັກກັນຕົວເອງ ຕາມຫຼັກການທາງການແພດວາງອອກ ແລະ ກວດກາເປັນປົກກະຕິ.
3. ໃຫ້ທຸກພາກສ່ວນຕິດຕາມການເຄື່ອນໄຫວຂອງສຳນັກງານອົງການ ໃຫ້ຢຸດຕິການປະຊຸມ ແລະ ການຊຸມນຸມຈຳນວນຫຼາຍ ຖ້າມີຄວາມສາມາດເຮັດວຽກຢູ່ເຮືອນ ຜ່ານ Online ໄດ້ ກໍໃຫ້ຈັດຕັ້ງປະຕິບັດໄດ້.
4. ການເດີນທາງໄປ-ມາລະຫວ່າງກັນຄື ບ້ານຕໍ່ບ້ານ ເມືອງຕໍ່ເມືອງ ຫຼື ຕໍ່ສຳນັກງານອົງການ ແມ່ນໃຫ້ຫຼຸດຜ່ອນລົງ ໂດຍການໂທລະສັບຫາກັນ.
5. ຖ້າພົບອາການຜິດປົກກະຕິ ໃຫ້ຮີບຮ້ອນໂທຫາແພດທັນທີ ຜ່ານສາຍດ່ວນ 166.
6. ຄະນະສະເພາະກິດ ຈະໄດ້ອອກຂໍ້ກຳນົດຕື່ມອີກ ເພື່ອໃຫ້ສັງຄົມປະຕິບັດຢ່າງເຂັ້ມງວດ ທັງນີ້ກໍເພື່ອປົກປັກຮັກສາຊີວິດປະຊາຊົນ ແລະ ຮຽກຮ້ອງສັງຄົມ ຈົ່ງໃຫ້ການຮ່ວມມືກັນເພື່ອຕ້ານເອົາຊະນະເຊື້ອພະຍາດ COVID-19 ນີ້ໃຫ້ໄດ້.