ເຊື່ອວ່າເປັນຄຳຖາມທີ່ໄດ້ຍິນເລື້ອຍໆ “ສາກ iPhone ພ້ອມທັງໃຊ້ວຽກຈະມີຜົນເສຍບໍ່ ?” “ສາກໂນດບຸ໊ກໄປພ້ອມ ໃຊ້ໄປນຳ ມັນຈະເພໄວຫຼືບໍ່ ?” ພວກເຮົາມາເບິ່ງນຳກັນ.
ອັນດັບທຳອິດ ກໍຕ້ອງມາສ້າງຄວາມເຂົ້າໃຈກ່ອນວ່າ ປັດຈຸບັນອຸປະກອນເອເລັກໂຕຣນິກສ່ວນໃຫຍ່ໃຊ້ແບດເຕີຣີ(ຖ່ານ) ຊະນິດ ລິທຽມໄອອອນ (Li-ion) ແລະ ລິທຽມພໍລິເມີ (LiPo) ຊຶ່ງໂດຍສ່ວນຫຼາຍແລ້ວ ອຸປະກອນເຫຼົ່ານີ້ ບໍ່ວ່າຈະເປັນສະມາດໂຟນ ແລັບທັອບ ຫຼືແທັບເລັດ ຕ່າງຖືກອອກແບບມາໃຫ້ຕັດສາກເຂົ້າແບດເຕີຣີ ເມື່ອແບດເຕີຣີມີໄຟເຕັມ 100% ນັ້ນໝາຍຄວາມວ່າ ເມື່ອເຮົາສາກອຸປະກອນເຫຼົ່ານີ້ຈົນແບດເຕີຣີເຕັມ 100% ແລ້ວ ຕົວເຄື່ອງຈະໄປປ່ຽນໄປຮັບກະແສໄຟຈາກອະແດບເຕີແທນ ລະຫວ່າງນີ້ ຈະບໍ່ມີການຈ່າຍໄຟເຂົ້າແບດເຕີຣີເກີດຂຶ້ນເລີຍ ແຕ່ຖ້າລະຫວ່າງທີ່ໃຊ້ໆໄປແລ້ວ ແບດເຕີຣີເກີດຫຼຸດລົງ ອະແດບເຕີຈະຈ່າຍໄຟເຂົ້າແບດເຕີຣີອີກຄັ້ງ.
ສັນຍະລັກສະແດງວ່າແບດເຕີຣີສາກເຕັມແລ້ວ ໃຊ້ໄຟຈາກອະແດບເຕີແທນ
ບັນຫາຄວາມຮ້ອນ ຄືສິ່ງທີ່ຕ້ອງລະວັງຫຼາຍກວ່າ
ການໃຊ້ງານສະມາດໂຟນ ຫຼື ແລັບທັອບ ແລະ ສາກໄປນຳ ສິ່ງທີ່ຕ້ອງລະວັງຫຼາຍກວ່າຄືເລື່ອງຂອງຄວາມຮ້ອນ ແລ້ວເປັນຫຍັງຄວາມຮ້ອນຈຶ່ງເຮັດໃຫ້ແບດເຕີຣີເສື່ອມໄວ ? ແບດເຕີຣີເປັນອຸປະກອນທາງໄຟຟ້າທີ່ແປງເຄມີເປັນພະລັງງານ ຕາມທິດສະດີແລ້ວ ປະ ຕິກິລິຍາທາງເຄມີຈະຂັບເຄື່ອນດ້ວຍແຮງດັນໄຟຟ້າ ແລະ ຄວາມຮ້ອນ ຍິ່ງມີຄວາມຮ້ອນຫຼາຍ ຍິ່ງເຮັດໃຫ້ປະຕິກິລິຍາທາງເຄມີເກີດໄວຂຶ້ນ ຄວາມຈິງແລ້ວ ອຸນຫະພູມທີ່ເພີ່ມຂຶ້ນ ກໍສາມາດຊ່ວຍເພີ່ມປະສິດທິພາບໄດ້ ແຕ່ໃນທາງກັບກັນ ມັນກໍເຮັດໃຫ້ເກີດປະຕິກິລິຍາເຄມີທີ່ບໍ່ເພິ່ງປະສົງ ໂດຍຄວາມຮ້ອນທີ່ຫຼາຍເກີນໄປ ເຮັດໃຫ້ຂອງແຫຼວຊຶ່ງເປັນເຄມີພາຍໃນແບດເຕີຣີລະເຫີຍໄວຂຶ້ນ ເຮັດໃຫ້ໂຄງສ້າງແບດເຕີຣີເກີດຄວາມເສຍຫາຍໄດ້.
ຖ້າເປັນສະໄໝກ່ອນ ເຮົາມັກຈະໄດ້ຍິນຄຳກ່າວວ່າ “ຖ້າສາກຄອມພ້ອມທັງເຮັດວຽກໄປນຳ ໃຫ້ຖອດແບດເຕີຣີອອກ” ຊຶ່ງເປັນຄຳກ່າວທີ່ຖືກຕ້ອງ ເພາະຈະເຮັດໃຫ້ຄວາມຮ້ອນທີ່ເກີດຂຶ້ນບໍ່ໄປກະທົບກັບແບດເຕີຣີ ແຕ່ວ່າໂນດບຸ໊ກ ແລະ ສະມາດໂຟນສະໄໝນີ້ ມັນຖອດບໍ່ໄດ້ແລ້ວ.
ສະຫຼຸບ: ບໍ່ຕ້ອງຫ່ວງວ່າການສາກແບດເຕີຣີໄປພ້ອມ ໃຊ້ງານໄປນຳ ຈະເຮັດໃຫ້ແບດເຕີຣີເສື່ອມໄວຂຶ້ນ ຕາບໃດທີ່ຍັງບໍ່ເກີດຄວາມຮ້ອນທີ່ຫຼາຍເກີນໄປ ໂດຍ Apple ໄດ້ໃຫ້ຄຳແນະນຳໄລຍະອຸນຫະພູມທີ່ເໝາະສົມໃນການໃຊ້ງານ iPhone ແລະ Mac ເອົາໄວ້ດັ່ງນີ້.
iPhone iPad iPod ແລະ Apple Watch: ບໍ່ຕ່ຳກວ່າ 0 ອົງສາເຊ ແລະ ບໍ່ເກີນ 35 ອົງສາເຊ.
MacBook: ບໍ່ຕ່ຳກວ່າ 10 ອົງສາເຊ ແລະ ບໍ່ເກີນ 35 ອົງສາເຊ.
ແບບນີ້ ສາກແບດເຕີຣີໄປນຳໃຊ້ໄປນຳຕະຫຼອດເວລາກໍດີກວ່າຫຼືບໍ່ ເພາະແບດເຕີຣີ Li-ion ແລະ LiPo ຈະນັບຕາມ Cycle ?.
ແບດເຕີຣີຊະນິດ Li-ion ແລະ LiPo ຈະມີອາຍຸການໃຊ້ງານປະມານ 500-1.000 cycle ແລ້ວແຕ່ຊະນິດຂອງແບດເຕີຣີ ຊຶ່ງຕ້ອງຫາຂໍ້ມູນຕາມຊະນິດຂອງອຸປະກອນທີ່ໃຊ້ ໂດຍ Cycle ນັ້ນໝາຍຄວາມວ່າ “ໜຶ່ງຮອບການສາກເຕັມ 100%” ເຊັ່ນສາກແບດເຕີຣີຈາກ 0-100% = 1 cycle ແຕ່ຫາກສາກຈາກ 50-100% = 0,5 cycle ຫຼືເຄິ່ງຮອບເທົ່ານັ້ນ.
ການທີ່ເຮົາສາກອຸປະກອນໄວ້ຕະຫຼອດເວລາເລີຍກໍບໍ່ແມ່ນເລື່ອງທີ່ດີພໍເທົ່າໃດ ໂດຍສະເພາະ ການເກັບຄວາມຈຸແບດເຕີຣີໄວ້ໃຫ້ເຕັມຕະຫຼອດເວລາ ຫຼືການປ່ອຍໃຫ້ແບດເຕີ ຣີໝົດກ້ຽງ ຍິ່ງເປັນສິ່ງທີ່ບໍ່ຄວນເຮັດ ຢ່າງໜ້ອຍຄວນປ່ອຍໃຫ້ແບດເຕີຣີຫຼຸດເຫຼືອປະມານ 30-50% ແດ່ ເພື່ອໃຫ້ບັນຈຸໄຟຟ້າເກີດການໃຊ້ງານ ຫຼຸດຄວາມເສື່ອມທີ່ເກີດຂຶ້ນໄດ້ຊ້າລົງ ໂດຍ Apple ໃຫ້ຂໍ້ມູນວ່າ ຫາກເຮົາຈຳເປັນຕ້ອງເກັບອຸປະກອນດົນໆ (ບໍ່ໄດ້ນຳມາໃຊ້ເປັນໄລຍະເວລາ 6 ເດືອນ) ຄວນປ່ອຍໃຫ້ອຸປະກອນມີແບດເຕີຣີປະມານ 50% ຈະດີທີ່ສຸດ.