ເມືອງປາກງື່ມ ນະຄອນຫຼວງວຽງຈັນ (ນວ) ຈັດພິທີປະກາດຈັດຕັ້ງຮອງເຈົ້າເມືອງ ແລະ ຫ້ອງການອ້ອມຂ້າງ ຂຶ້ນວັນທີ 28 ສິງຫາຜ່ານມາ ໂດຍແຕ່ງຕັ້ງທ່ານ ກອງມີ ສີສະໝຸດ ຄະນະປະຈຳພັກເມືອງ ເປັນຮອງເຈົ້າ ເມືອງປາກງື່ມ ແຕ່ງຕັ້ງທ່ານ ຕຸ້ຍ ສີລິວົງ ກຳມະການພັກເມືອງ ເປັນຫົວໜ້າຫ້ອງວ່າການປົກຄອງເມືອງປາກງື່ມ ທ່ານ ສີທົນ ສີວົງໄຊ ກຳມະການພັກເມືອງ ເປັນປະທານສະຫະພັນກຳມະບານເມືອງປາກງື່ມ ທ່ານນາງ ຂັນທອງ ສີທາ ກຳມະການພັກເມືອງ ເປັນຫົວໜ້າຫ້ອງການສຶກສາທິການ ແລະ ກີລາເມືອງປາກງື່ມ ນອກນີ້ຍັງໄດ້ແຕ່ງຕັ້ງຮອງຫົວໜ້າຫ້ອງການ ຫົວໜ້າໜ່ວຍງານ ແລະ ຮອງຫົວໜ້າໜ່ວຍງານ 12 ທ່ານ ຍິງ 4 ທ່ານ ຕື່ມອີກ.
ທ່ານ ພົຈ ສີພອນ ຈັນສົມວົງ ຄະນະປະຈຳພັກ ນວ ຫົວໜ້າການເມືອງ ກອງບັນຊາການທະຫານ ນວ ຜູ້ຊີ້ນຳເມືອງປາກງື່ມ ໄດ້ເນັ້ນໃຫ້ບັນດາທ່ານທີ່ໄດ້ຮັບການຕົກລົງແຕ່ງຕັ້ງ ແລະ ບັນດາກຳມະການພັກເມືອງປາກງື່ມທຸກທ່ານ ໃຫ້ມີສະຕິຕື່ນຕົວສູງຕໍ່ສະພາບການທີ່ມີທັງສິ່ງທ້າທາຍທົດສອບຫຼາຍປະການ ແລະ ມີສິ່ງທີ່ອຳນວຍຄວາມສະດວກ ເອົາໃຈໃສ່ເຝິກຝົນຫຼໍ່ຫຼອມຕົນເອງ ຍົກລະດັບຄວາມຮູ້-ຄວາມສາມາດຂອງຕົນໃຫ້ສູງຂຶ້ນ ເພື່ອຮອງຮັບຄວາມຕ້ອງການຂອງການພັດທະນາເສດຖະກິດ-ສັງຄົມ ໃນໄລຍະໃໝ່ຂອງເມືອງປາກງື່ມ ຈັດຕັ້ງປະຕິບັດ ແລະ ຜັນຂະຫຍາຍມະຕິ ແລະ ແຜນພັດທະນາເສດຖະກິດ-ສັງຄົມ ທີ່ກອງປະຊຸມໃຫຍ່ ຄັ້ງທີ V ຂອງອົງຄະນະພັກເມືອງປາກງື່ມໃຫ້ປະກົດຜົນສຳເລັດ.