ໂດຍອີງຕາມຂໍ້ມູນການເກີດອຸບັດເຫດທົ່ວປະເທດ ປະຈຳເດືອນສິງຫາ 2020 ຂອງກົມຕຳຫຼວດຈະລາຈອນ ກົມໃຫຍ່ຕຳຫຼວດ ກະຊວງປ້ອງກັນຄວາມສະຫງົບ ໃນວັນທີ 3 ກັນຍາ 2020 ຊາບວ່າ: ໃນເດືອນສິງຫາຜ່ານມາ ທົ່ວປະເທດມີອຸບັດເຫດເກີດຂຶ້ນທັງໝົດ 586 ກໍລະນີ ມີຄົນເສຍຊີວິດຈຳນວນ 68 ຄົນ ທຽບໃສ່ເດືອນກໍລະກົດ 2020 ການເກີດອຸບັດເຫດແມ່ນເພີ່ມຂຶ້ນ 68 ກໍລະນີ ແຕ່ມີຜູ້ເສຍຊີວິດຫຼຸດລົງ 7 ຄົນ ເຊິ່ງນະຄອນຫຼວງວຽງຈັນມີຜູ້ເສຍຊີວິດຫຼາຍກວ່າແຂວງອື່ນໆຄື 17 ຄົນ.
ຈາກການເກີດອຸບັດເຫດໃນແຕ່ລະຄັ້ງ ເຮັດໃຫ້ມີພາຫະນະເປ່ເພທັງໝົດ 1.043 ຄັນ ໃນນີ້ ເປ່ເພເລັກໜ້ອຍ 505 ຄັນ ສົມຄວນ 516 ຄັນ ໃຊ້ການບໍ່ໄດ້ 22 ຄັນ ມີຄົນໄດ້ຮັບບາດເຈັບທັງໝົດ 758 ຄົນ ໃນນີ້ ມີຄົນໄດ້ຮັບບາດເຈັບເລັກໜ້ອຍ 363 ຄົນ ສົມຄວນ 294 ຄົນ ສາຫັດ 101 ຄົນ ແລະ ເສຍຊີວິດທັງໝົດ 68 ຄົນ ຍິງ 26 ຄົນ ລວມມູນຄ່າຄວາມເສຍຫາຍທັງໝົດປະມານ 6,9 ຕື້ກີບ ເຊິ່ງອຸບັດເຫດສ່ວນໃຫຍ່ແມ່ນເກີດມາຈາກການດື່ມສິ່ງມືນເມົາແລ້ວຂັບຂີ່ 141 ລາຍ ແລະ ໃຊ້ຄວາມໄວເກີດກຳນົດ 129 ລາຍ.
ຕໍ່ກັບສະພາບການດັ່ງກ່າວນີ້ ທຸກໆຄົນຕ້ອງປ່ຽນພຶດຕິກຳຄືນໃໝ່ໃນການຂັບຂີ່ ຕ້ອງປະຕິບັດຕາມກົດລະບຽບຈະລາຈອນທາງບົກ (ຄຳສັ່ງ 06/ນຍ) ຢ່າງເຂັ້ມງວດ ໂດຍເອົາໃຈໃສ່ເປັນພິເສດໃນການຄວບຄຸມຄວາມໄວ ດື່ມສິ່ງມຶນເມົາແລ້ວບໍ່ຂັບຂີ່ລົດ ແລະ ອື່ນໆ ນອກຈາກນີ້ ຕ້ອງຂັບຂີ່ຢ່າງມີມາລະຍາດ ມີການຜ່ອນຜັນ ເຫັນອົກເຫັນໃຈເຊິ່ງກັນ ແລະ ກັນ ຕ້ອງຍອມເສຍສະລະ ແລະ ປ່ອຍສິດໃຫ້ແກ່ກັນ ຖ້າພວກເຮົາຫາກປະຕິບັດໄດ້ຄືແນວນີ້ ມັນຈະຊ່ວຍຫຼຸດຜ່ອນອຸບັດເຫດໄດ້ຫຼາຍສົມຄວນ.