ທີ່ອາຊີຕາເວັນອອກສຽງໃຕ້ (ອາຊຽນ) ເລີ່ມແຕ່ກາງປີ 2016 ເປັນຕົ້ນມາ ມີຫຼາຍປະເທດທີ່ໄດ້ປັບປຸງນະໂຍບາຍວີຊາ ເພື່ອດຶງດູດຄົນຕ່າງປະເທດໃນໄວບຳນານເຂົ້າມາປະເທດຂອງຕົນ ແນໃສ່ກະຕຸ້ນການພັດທະນາອຸດສາຫະກຳການທ່ອງທ່ຽວ ໂຮງແຮມ ຮ້ານອາຫານ ແລະ ໂຮງໝໍເຊັ່ນ:
ທີ່ກຳປູເຈຍ: ທາງການຂອງປະເທດນີ້ໄດ້ອອກນະໂຍບາຍກ່ຽວກັບວີຊາບຳນານ ສຳລັບຊາວຕ່າງປະເທດທີ່ເຂົ້າບຳນານແລ້ວເຂົ້າໄປອາໄສຢູ່ກຳປູເຈຍ ໃນເບື້ອງຕົ້ນນະໂຍບາຍນີ້ໄດ້ກຳນົດວ່າຊາວຕ່າງປະເທດທີ່ເຂົ້າບຳນານແລ້ວ ແລະ ມີຫຼັກຊັບທາງເສດຖະກິດຄ້ຳປະກັນນັ້ນ ຈະມີສິດໄດ້ວີຊາກຳປູເຈຍແບບເຂົ້າ-ອອກໄດ້ຫຼາຍເທື່ອພາຍໃນໜຶ່ງປີ.
ທີ່ປະເທດໄທ: ນະໂຍບາຍບຳນານດຶງດູດຜູ້ເຖົ້າເຂົ້າບຳນານ ຈາກຕ່າງປະເທດເຂົ້າໄທ ໄດ້ດຳເນີນມາເປັນເວລາກວ່າ 10 ປີແລ້ວ ໂດຍໄດ້ກຳນົດວ່າ ຄົນຕ່າງປະເທດທີ່ມີອາຍຸແຕ່ 50 ປີຂຶ້ນໄປ ມີຫຼັ້ກຖານທີ່ສະແດງເຖິງຄວາມສາມາດດ້ານເສດຖະກິດ ແລະ ເງື່ອນໄຂທີ່ກ່ຽວຂ້ອງອື່ນໆ ນັ້ນ ສາມາດຂໍວີຊາບຳນານຢູ່ໄທໄດ້.
ຢູ່ຟີລິບປິນ: ທາງການໄດ້ມີນະໂຍບາຍອອກວີຊາບຳນານໃຫ້ຊາວຕ່າງປະເທດ ທີ່ມີອາຍຸແຕ່ 35 ປີ ຂຶ້ນໄປ ພ້ອມທັງຫຼຸດຈຳນວນເງິນຝາກໃຫ້ຕ່ຳສຸດ (ຫຼັກຊັບຄ້ຳປະກັນທາງເສດຖະກິດ) ພ້ອມດຽວກັນກໍກຳນົດຄ່າທຳນຽມວີຊາບຳນານໃຫ້ຄຸ້ມຄ່າກວ່າວີຊາການທ່ອງທ່ຽວ ນອກຈາກ 3 ປະເທດທີ່ເວົ້າມານັ້ນ ມາເລເຊຍ ກໍເປັນອີກປະເທດໜຶ່ງທີ່ມີນະໂຍບາຍວີຊາບຳນານທີ່ມີກຳລັງແຂ່ງຂັນສູງ ນະໂຍບາຍນີ້ທາງ ມາເລເຊຍໃສ່ຊື່ວ່າ “ວີຊາພູມລຳເນົາແຫ່ງທີສອງ” ຟັງແລ້ວມີສະເໜ່ດຶງດູດທີ່ສຸດ ວີຊານີ້ກຳນົດໃຫ້ຊາວຕ່າງປະເທດຢູ່ອາໄສໄດ້ນານເຖິງ 10 ປີ ຜູ້ຖືວິຊານີ້ຍັງສາມາດເອົາສະມາຊິກຄອບຄົວມາອາໄສຢູ່ນຳກັນໄດ້ອີກດ້ວຍ.
ທີ່ອິນໂດເນເຊຍ: ໃນທ້າຍປີ 2016 ທາງການອິນໂດເນເຊຍ ໄດ້ອອກລະບຽບການໃໝ່ເພື່ອເພີ່ມຄວາມເຄັ່ງຄັດຮັດກຸມເລື່ອງການອອກວີຊາໃຫ້ຊາວຕ່າງປະ ເທດ ຕາມລະບຽບການໃໝ່ນີ້ ຊາວຕ່າງປະເທດທີ່ຕ້ອງການວີຊາ ຫຼື ຕໍ່ວີຊາຕ້ອງໄດ້ໄປເຂົ້າແຖວສະເໜີໜ້າດ້ວຍຕົນເອງຕໍ່ເຈົ້າໜ້າທີ່ອອກວີຊາທີ່ຫ້ອງການຄຸ້ມຄອງຄົນເຂົ້າເມືອງ ທ່ານ ເຮຣູ ຊານໂຕໂຊ ໂຄສົກສຳນັກງານຄຸ້ມຄອງຄົນເຂົ້າເມືອງອິນໂດເນເຊຍ ໄດ້ໃຫ້ລາຍລະອຽດກ່ຽວກັບລະບຽບການໃໝ່ ວ່າ ແມ່ນຄວາມພະຍາຍາມຂອງທາງການ ເພື່ອປັບປຸງຄວາມໂປ່ງໃສ ແລະ ຄວາມສາມາດໃນການກວດກາໄດ້ກ່ຽວກັບຂັ້ນຕອນຕ່າງໆ ໃນການຂໍ ແລະ ອອກວີຊາໃຫ້ຊາວຕ່າງປະເທດ ພາຍໃຕ້ລະບຽບການໃໝ່ນີ້ ຈະບໍ່ມີນາຍໜ້າວິ່ງເຕັ້ນແລ່ນເອກະສານຂໍວີຊາໃຫ້ຊາວຕ່າງປະເທດອີກຄືເກົ່າ ເພາະວ່າມັນເປັນຊ່ອງຫວ່າງ ໃຫ້ບັນດານາຍໜ້າຊອກຫາຜົນປະໂຫຍດແບບຜິດກົດໝາຍ ມາດຕະການນີ້ ຍັງສາມາດປ້ອງກັນບໍ່ໃຫ້ພະນັກງານຄຸ້ມຄອງຄົນເຂົ້າເມືອງ ສົມຮູ້ຮ່ວມຄິດກັບບັນດານາຍໜ້າ ໃນການຊອກຫາຜົນປະໂຫຍດເຂົ້າໂຕເອງ ດ້ວຍຮູບການສໍ້ລາດບັງຫຼວງ ຫຼືຮັບສິນບົນຕ່າງໆ ຍິງຄົນອັງກິດຜູ້ໜຶ່ງທີ່ມີຜົວເປັນຄົນອິນໂດເນເຊຍ ຢູ່ເກາະບາຫຼີ ໄດ້ສະແດງຄວາມຊື່ນຊົມຍິນດີກັບລະບຽບການໃໝ່ນີ້ໂດຍບອກວ່າ ນາງເບື່ອໜັງໜ້າພວກນາຍໜ້າຮັບແລ່ນເອກະສານວີຊາ ເພາະພວກເຂົາບາງຄັ້ງກໍຮຽກຮ້ອງຄ່າເມື່ອຍສູງເຖິງ 500% ຂອງຈຳນວນເງິນທີ່ຄວນຈ່າຍກໍມີ.