ສຳລັບຜູ້ໃຊ້ງານສະມາດໂຟນ Android ກໍຕ້ອງລະວັງຕົວກັນເພີ່ມແດ່ ຫຼ້າສຸດສື່ຕ່າງປະເທດລາຍງານວ່າ ຕອນນີ້ມີມັລແວຣ໌ຕົວໃໝ່ທີ່ຊື່ວ່າ “EventBot” ຊຶ່ງເປັນມັລແວຣ໌ທີ່ຈອບລັກຂໍ້ມູນຈາກແອັບທະນາຄານ ເຊັ່ນ ລະຫັດຜ່ານ ລວມເຖິງລະຫັດສອງຊັ້ນ ຫຼື Two-Factor Authentiation ແລະ ລະຫັດກະເປົ໋າເງິນດິຈິຕອນດ້ວຍ.
ອ້າງອີງຈາກ Micky ນັກວິໄຈຈາກບໍລິສັດດ້ານຄວາມປອດໄພ Cybereason ໄດ້ເຕືອນຜູ້ໃຊ້ງານ Android ທຸກຄົນໃຫ້ລະວັງມັລແວຣ໌ທີ່ຊື່ວ່າ “EventBot” ມັນສາມາດປອມຕົວເປັນແອັບທີ່ໄດ້ຮັບຄວາມນິຍົມຢ່າງ Adobe Flash ຫຼືແມ່ນແຕ່ Microsoft Word ເປັນຕົ້ນ.
ມັລແວຣ໌ດັ່ງກ່າວ ຖືກສ້າງຂຶ້ນມາເພື່ອລັກຂໍ້ມູນທາງການເງິນຈາກແອັບພລິເຄຊັນກຸ່ມທະນາຄານ ເຊັ່ນ: Revolut TransferWise CoinBase CapitalOne Barclays ແລະ PayPal ນັ້ນໝາຍຄວາມວ່າ ຜູ້ໃຊ້ງານສະມາດໂຟນ Android ທີ່ເນັ້ນເຮັດທຸລະກຳທາງການເງິນເທິງມືຖື ກໍຕ້ອງລະວັງຕົວກັນດ້ວຍ.
TechCrunch ລາຍງານວ່າ ເມື່ອມັລແວຣ໌ດັ່ງກ່າວຖືກຕິດຕັ້ງລົງເທິງເຄື່ອງແລ້ວ ມັນຈະປອມເປັນແອັບພລິເຄຊັນອື່ນໆ ແລະ ຄອຍຈອບລັກຂໍ້ມູນຈາກແອັບທາງການເງິນຕ່າງໆໃນເຄື່ອງ ລວມເຖິງລະຫັດຢືນຢັນຕົວຕົນສອງຊັ້ນ ຫຼື Two-Factor Authentication ເພື່ອນຳໄປໃຊ້ໃນຂະບວນການອື່ນໆອີກດ້ວຍ.
ທີ່ໜ້າຢ້ານກວ່ານັ້ນ ຄືແຮັກເກີທີ່ສ້າງມັນຂຶ້ນມາ ໄດ້ຂຽນໂຄ້ດໃຫ້ມັລແວຣ໌ສາມາດພັດທະນາຕົວເອງຂຶ້ນມາໄດ້ອີກດ້ວຍ.