ຄົນເຮົາເມື່ອເກີດອອກມາຈາກທ້ອງແມ່ ເມື່ອຍາມເຕີບໂຕຂຶ້ນມາເປັນບ່າວ ເປັນສາວສາມາດເພິ່ງພາຕົນເອງໄດ້ ກໍຢາກຊອກຢູ່ທຳກິນ ຢາກຫາລ້ຽງພໍ່ ລ້ຽງແມ່ຕາມແບບສະບັບຂອງຄົນຮູ້ຈັກບາບບຸນຄຸນໂທດ ຢາກຕອບແທນເຫື່ອແຮງຂອງພໍ່ແມ່ຜູ້ບັງເກີດເກົ້າທີ່ໄດ້ລ້ຽງ ໄດ້ເກືອຕົນເອງມາແຕ່ນ້ອຍຈົນໃຫຍ່ ຈົນສາມາດເພິ່ງພາຕົນເອງໄດ້ ຈຶ່ງຢາກຫາທຸກສິ່ງ ແລະ ເຮັດທຸກຢ່າງເພື່ອການໄດ້ມາສິ່ງຂອງວັດຖຸ ເຂົ້າປາອາຫານ ເງິນຄຳ ກຳແກ້ວ ເຄື່ອງນຸ່ງຂອງຖື ໃຫ້ພໍ່ແມ່ໄດ້ຢູ່ດີ ໄດ້ກິນແຊບ ໄດ້ນຸ່ງອຸ່ນ ນຸ່ງງາມ ໄດ້ໃຊ້ໄດ້ຈ່າຍນຳບ້ານນຳເມືອງເພິ່ນ ແຕ່ຄວາມກະຕັນຍູຮູ້ບຸນຄຸນເປັນເລື່ອງດີທີ່ທຸກຄົນມີ ຕ້ອງໄດ້ປະຕິບັດ ແຕ່ຜູ້ທີ່ໄປຊອກວຽກເຮັດງານທຳຈຳນວນໜຶ່ງກໍຍັງເປັນເດັກ ຍັງເປັນໄວໜຸ່ມ ຍັງບໍ່ຮູ້ຮ້າຍຮູ້ດີ ບໍ່ຮູ້ອັນໃດຖືກອັນໃດຜິດ ອັນໃດເຮັດໄດ້ອັນໃດເຮັດບໍ່ໄດ້ ອັນໃດກົດໝາຍອະນຸຍາດ ຫຼື ບໍ່ອະນຸຍາດ ຊຶ່ງກົດໝາຍບາງວຽກ ບາງງານ ກົດໝາຍກໍບໍ່ອະນຸຍາດໃຫ້ຜູ້ໃຊ້ແຮງງານນຳໃຊ້ແຮງງານເດັກໄດ້ຕາມຈຸດປະສົງ ແລະ ຄວາມຕ້ອງການຂອງຕົນເອງໄດ້ທັງໝົດ ໃນຄວາມເປັນຈິງ ກົດໝາຍວ່າດ້ວຍແຮງງານ ກໍໄດ້ກຳນົດກ່ຽວກັບລະບອບການອອກແຮງງານ ການໃຊ້ແຮງງານ ສະຖານທີ່ການອອກແຮງງານ ວຽກງານທີ່ອະນຸຍາດໃຫ້ເດັກສາມາດເຮັດໄດ້ ພ້ອມດຽວກັນນີ້ ກົດໝາຍກໍໄດ້ໃຫ້ການປົກປ້ອງຄຸ້ມຄອງ ກຳລັງແຮງງານຂອງສັງຄົມເຫຼົ່ານີ້ໄວ້ເປັນຢ່າງດີໃຜໃຊ້ແຮງງານເກີນຂອບເຂດ ໃຊ້ແຮງງານເກີນຄວາມສາມາດ ໃຊ້ແຮງງານເດັກທີ່ຍັງບໍ່ທັນເຖິງກະສຽນອາຍຸ ໃຊ້ແຮງງານເດັກເຮັດວຽກບ່ອນທີ່ມີຄວາມສ່ຽງ ມີຄວາມເປັນອັນອັນຕະລາຍ ບ່ອນທີ່ເຮັດກັບສານເຄມີ ເຮັດວຽກບ່ອນທີ່ບໍ່ມີມາດຕະການປ້ອງກັນ ເຮັດວຽກບ່ອນທີ່ມີການໃຊ້ກຳລັງໜັກໜ່ວງ ສິ່ງເຫຼົ່ານີ້ ກົດໝາຍຫ້າມ ພ້ອມທັງມີມາດຕະການປົກປ້ອງເປັນຢ່າງດີ ສະນັ້ນ ໃຜກໍຕາມຫາກໃຊ້ແຮງງານເດັກ ຫຼື ເວົ້າອີກຢ່າງໜຶ່ງ ແມ່ນໃຊ້ແຮງງານໄວໜຸ່ມ ກົດໝາຍສາມາດເອົາຄວາມຜິດໄດ້ ການລະເມີດ ຫຼື ການໃຊ້ແຮງງານໂດຍບໍ່ຖືກຕ້ອງທີ່ວ່ານີ້ໄດ້ກຳນົດໄວ້ໃນມາດຕາ 176 ປະມວນກົດໝາຍອາຍາ ຊຶ່ງເນື້ອໃນໄດ້ລະບຸໄວ້ຄືແນວນີ້: ບຸກຄົນຜູ້ໃດ ຫາກໄດ້ຮັບເອົາເດັກອາຍຸແຕ່ ສິບສີ່ປີ ຫາຕ່ຳກວ່າ ສິບແປດປີ ເຂົ້າເຮັດວຽກ ໃຫ້ເຮັດວຽກໜັກ ຫຼື ວຽກທີ່ເປັນອັນຕະລາຍ ຫຼື ວຽກຢູ່ສະຖານທີ່ ທີ່ເປັນອັນຕະລາຍ ໃຫ້ເດັກເຮັດວຽກເກີນເວລາ ຕາມທີ່ໄດ້ກຳນົດໃນກົດໝາຍແຮງງານ ແລະ ລະບຽບການທີ່ກ່ຽວຂ້ອງ ຫຼື ໃຊ້ເດັກໃນການສູ້ຮົບ ຈະຖືກລົງໂທດຕັດອິດສະລະພາບແຕ່ ສາມເດືອນຫາໜຶ່ງປີ ແລະ ຈະຖືກປັບໃໝແຕ່ 3.000.000 ກີບຫາ 15.000.000 ກີບ.
ໃນກໍລະນີການກະທຳຜິດ ຫາກພາໃຫ້ມີຄົນບາດເຈັບສາຫັດ ບາດເຈັບຫຼາຍຄົນ ເສຍອົງຄະ ຫຼື ພິການ ຈະຖືກລົງໂທດຕັດອິດສະລະພາບແຕ່ ໜຶ່ງປີ ຫາ ຫ້າປີ ແລະ ຈະຖືກປັບໃໝ ແຕ່ 7.000.000 ກີບຫາ 30.000.000 ກີບ.
ໃນກໍລະນີການກະທຳຜິດ ຫາກພາໃຫ້ມີຄົນເສຍຊີວິດ ຈະຖືກລົງໂທດຕັດອິດສະລະພາບແຕ່ ຫ້າປີ ຫາ ສິບປີ ແລະ ຈະຖືກປັບໃໝ ແຕ່ 10.000.000 ກີບຫາ 50.000.000 ກີບ.
ໃນກໍລະນີການກະທຳຜິດ ຫາກພາໃຫ້ມີຄົນເສຍຊີວິດ ແຕ່ສອງຄົນຂຶ້ນໄປຈະຖືກລົງໂທດຕັດອິດສະລະພາບແຕ່ ແປດປີ ຫາ ສິບຫ້າປີ ແລະ ຈະຖືກປັບໃໝ ແຕ່ 20.000.000 ກີບຫາ 100.000.000 ກີບ ດັ່ງນັ້ນ ຜູ້ທີ່ຈະຮັບເອົາຜູ້ສະໝັກເຮັດວຽກ ສະໝັກອອກແຮງງານ ເຖິງແມ່ນຈະເປັນຄວາມພໍໃຈຂອງເຂົາກໍຕາມ ແຕ່ຜູ້ທີ່ຈະອອກແຮງງານຍັງເປັນເດັກ ສະຖານທີ່ອອກແຮງງານບໍ່ເໝາະສົມ ວຽກທີ່ຈະໃຫ້ເຂົາເຈົ້າເຮັດມີຄວາມສ່ຽງ ມີຄວາມເປັນອັນຕະລາຍ ແລະ ຈະກະທົບຕໍ່ການຈະເລີນເຕີບໂຕຂອງຮ່າງກາຍ ຈະເປັນໄພຕໍ່ສຸຂະພາບ ຕໍ່ຊີວິດກໍບໍ່ຄວນຮັບເອົາ ຫຼື ຮັບເອົາກໍຕ້ອງໃຫ້ເຮັດວຽກທີ່ກົດໝາຍອະນຸຍາດໃຫ້ເຂົາເຮັດໄດ້ ເທົ່ານັ້ນ.
ໂດຍ: ໄມ້ງັດ