ທ່ານ ນາງ ນັດທະອອນ ມະຫິດຖິກຸນ ກຳມະການຜູ້ຈັດການບໍລິສັດ ຟ້າໃຫຍ່ມີເດຍ (BigBlue Agency) ແລະ ທ່ານນາງ ວາລະນີ ອິນສີຊຽງໃໝ່ ພະນັກງານບໍລິຫານ ແລະ ການຕະຫຼາດປະຊາສຳພັນຂັ້ນອາວຸໂສ ບໍລິສັດ ຕຣີເພັດ ອີຊູຊຸເຊວສ໌ ຈຳກັດ ພ້ອມຄະນະ ໄດ້ເຂົ້າອວຍພອນທ່ານນາງ ແກ້ວຊ້ອນ ຈັນທະນາມ ຫົວໜ້າບັນນາທິການໜັງສືພິມວຽງຈັນໃໝ່ ພ້ອມດ້ວຍຄະນະ ວັນທີ 2 ກັນຍາ 2020 ໃນໂອກາດວັນສ້າງຕັ້ງໜັງສືພິມວຽງຈັນໃໝ່ ຄົບຮອບ 45 ປີ (1/9/1975-1/9/2020) ແລະ ວັນສ້າງຕັ້ງສື່ມວນຊົນ ແລະ ການພິມຈຳໜ່າຍຄົບຮອບ 70 ປີ (13/8/1950-13/8/2020).
ທ່ານ ນັດທະອອນ ມະຫິດຖິກຸນ ໄດ້ຕາງໜ້າໃຫ້ທັງສອງບໍລິສັດ ກ່າວຄຳອວຍພອນ ແລະ ສະແດງຄວາມຊົມເຊີຍມາຍັງຄະນະບັນນາທິການ ແລະ ພະນັກງານໜັງສືພິມວຽງຈັນໃໝ່ ທີ່ໄດ້ປະຕິບັດໜ້າທີ່ວຽກງານວິຊາສະເພາະຂອງຕົນ ສາມາດຍາດໄດ້ຜົນງານອັນພົ້ນເດັ່ນຫຼາຍດ້ານໃນຜ່ານມາ ທີ່ເປັນສື່ສິ່ງພິມໜຶ່ງທີ່ມີຊື່ສຽງຢູ່ໃນອັນດັບຕົ້ນໆ ໃນການໂຄສະນາເຜີຍແຜ່ແນວທາງນະໂຍບາຍຂອງພັກ ກົດໝາຍຂອງລັດ ແລະ ຂໍ້ມູນຂ່າວສານຕ່າງໆໃຫ້ສັງຄົມ ກໍຄືປະຊາຊົນບັນດາເຜົ່າໄດ້ຮູ້ຢ່າງກວ້າງຂວາງ ໂດຍສະເພາະປະຊາຊົນນະຄອນຫຼວງວຽງຈັນ ໃນນາມເປັນກະບອກສຽງຂອງອົງຄະນະພັກ ນະຄອນຫຼວງວຽງຈັນ.
ໂອກາດນີ້ ທ່ານ ນາງ ແກ້ວຊ້ອນ ຈັນທະນາມ ໄດ້ຕາງໜ້າໃຫ້ຄະນະບັນນາທິການ ແລະ ພະນັກງານໜັງສືພິມວຽງຈັນໃໝ່ ໄດ້ສະແດງຄວາມຂອບໃຈມາຍັງບໍລິສັດ ຟ້າໃຫຍ່ມີເດຍ ແລະ ບໍລິສັດ ຕຣີເພັດ ອີຊູຊຸເຊວສ໌ ຈຳກັດ ທີ່ມາອວຍພອນໃນຄັ້ງນີ້ ເຊິ່ງເປັນການສະແດງໃຫ້ເຫັນເຖິງຄວາມຮັກແພງ ຄວາມສາມັກຄີລະຫວ່າງໜັງສືພິມວຽງຈັນໃໝ່ ແລະ ຜູ້ປະກອບການທຸລະກິດ ທີ່ໄດ້ສະໜອງຂໍ້ມູນ ຂ່າວສານ ແລະ ໂຄສະນາຕ່າງໆລົງໜ້າໜັງສືພິມວຽງຈັນໃໝ່ ໂດຍຕ່າງຝ່າຍຕ່າງໄດ້ຮັບຜົນປະໂຫຍດ ແລະ ໃນອະນາຄົດ ຫວັງວ່າທັງສອງບໍລິສັດ ຈະສືບຕໍ່ໃຫ້ການສະໜັບສະໜູນໜັງສືພິມວຽງຈັນໃໝ່ ຕື່ມອີກ.