ປັດຈຸບັນ ນັກຮຽນ-ນັກສຶກສາ ທັງພາກລັດ ແລະ ເອກະຊົນ ໃນຂອບເຂດທົ່ວປະເທດ ຢູ່ໃນໄລຍະຂອງການຈັດຕັ້ງປະຕິບັດຕາມແຈ້ງການຂອງໜ່ວຍງານສະເພາະກິດ ຕ້ານ ແລະ ສະກັດກັ້ນການແຜ່ລະບາດຂອງພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ (Covid-19) ກໍຄື ແຈ້ງການຂອງຫ້ອງການກະຊວງສຶກສາທິການ ແລະ ກີລາ ແລະ ລັດຖະມົນຕີກະຊວງສຶກສາທິການ ແລະ ກີລາ ໃຫ້ບັນດາໂຮງຮຽນ ສະຖານບັນການສຶກສາ ປິດພັກຮຽນຊົ່ວຄາວ.
ຕໍ່ບັນຫາດັ່ງກ່າວ ທ່ານ ບຸນທັນ ແສງມະນີ ຫົວໜ້າຂະແໜງສາມັນ ພະແນກສຶກສາທິການ ແລະ ກີລາ ນະຄອນຫຼວງວຽງຈັນ (ນວ) ໃຫ້ສຳພາດໃນຕົ້ນເດືອນມີນາ 2020 ຜ່ານມາວ່າ: ໂດຍອີງໃສ່ແຈ້ງການຂອງຫ້ອງການກະຊວງສຶກສາທິການ ແລະ ກີລາ ສະບັບເລກທີ 865 ລົງວັນທີ 6 ມີນາ 2020 ເຖິງຫົວໜ້າພະແນກສຶກສາທິການ ແລະ ກີລາແຂວງ ນະຄອນຫຼວງ ເລື່ອງ: ການໂຈະການສອບເສັງແຂ່ງຂັນນັກຮຽນເກ່ງຊັ້ນມັດທະຍົມສຶກສາລະດັບຊາດ ປະຈຳສົກຮຽນ 2019-2020 ແລະ ອີງຕາມໜັງສືແຈ້ງການ ສະບັບເລກທີ 005/ສພກ ລົງວັນທີ 2 ມີນາ 2020 ຂອງຄະນະສະເພາະກິດ ເພື່ອປ້ອງກັນ ຄວບຄຸມ ແລະ ແກ້ໄຂການລະບາດຂອງພະຍາດ COVID-19 ອີງຕາມທິດຊີ້ນຳຂອງລັດຖະມົນຕີກະຊວງສຶກສາທິການ ແລະ ກີລາ ຕໍ່ບົດລາຍງານຂອງກົມສາມັນສຶກສາ ສະບັບເລກທີ 267/ສມ ລົງວັນທີ 3 ມີນາ 2020 ແລະ ເພື່ອເປັນການປ້ອງກັນພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ COVID-19 ທີ່ກຳລັງລະບາດໃນພາກພື້ນ ແລະ ແຜ່ຂະຫຍາຍຫຼາຍປະເທດໃນໂລກ ສະນັ້ນ ທາງພະແນກສຶກສາທິການ ແລະ ກີລາ ນວ ຈຶ່ງໄດ້ໂຈະການສອບເສັງແຂ່ງຂັນ ນັກຮຽນເກ່ງຊັ້ນມັດທະຍົມສຶກສາລະດັບຊາດ ປະຈຳສົກຮຽນ 2019-2020 ແລະ ທາງພະແນກສຶກສາທິການ ແລະ ກີລາ ນວ ໄດ້ອອກຄຳແນະນຳ ເລກທີ 599 ລົງວັນທີ 3 ມີນາ 2020 ເຖິງທ່ານຫົວຫນ້າຫ້ອງການສຶກສາທິການ ແລະ ກີລາເມືອງ ແນະນຳໃຫ້ຫ້ອງການສຶກສາທິການ ແລະ ກີລາເມືອງ ແລະ ຫຼ້າສຸດແມ່ນແຈ້ງການຂອງລັດຖະມົນຕີກະຊວງສຶກສາທິການ ແລະ ກີລາ ເລື່ອງການໂຈະການຮຽນ-ການສອນ ໃນສະຖານການສຶກສາໃນຂອບເຂດທົ່ວປະເທດຊົ່ວຄາວ ແຕ່ວັນທີ 19 ມີນາ ເຖິງວັນທີ 21 ເມສາ 2020 ມອບໃຫ້ຜູ້ບໍລິຫານສະຖານການສຶກສາ ແຕ່ລະແຫ່ງໃຫ້ຄຳແນະນຳຄູ-ອາຈານ ພໍ່ແມ່-ຜູ້ປົກຄອງ ແລະ ນັກຮຽນ-ນັກສຶກສາ ໂດຍການມອບວຽກບ້ານ ການຈັດການຮຽນ-ການສອນຜ່ານຮູບແບບຕ່າງໆ ຕາມທ່າແຮງ ແລະ ເງື່ອນໄຂຂອງແຕ່ລະສະຖານການສຶກສາ.
ຕໍ່ສະພາບການດັ່ງກ່າວ ມັນກໍມີຜົນກະທົບຫຼາຍດ້ານ ທາງກົງ ແລະ ທາງອ້ອມ ເພາະກ່ອນໜ້ານີ້ຜູ້ຄົນສ່ວນໃຫຍ່ ມີລູກຫຼານທີ່ເຂົ້າຮຽນໃນໂຮງຮຽນລ້ຽງເດັກອະນຸບານ ເມື່ອໂຮງຮຽນປິດຊົ່ວຄາວ ພາລະນັ້ນກໍຕ້ອງຕົກເປັນໜ້າທີ່ຂອງພໍ່ແມ່ຜູ້ປົກຄອງທີ່ຈະຕ້ອງດູແລຕໍ່ມາໂຮງຮຽນປະຖົມ ມັດທະຍົມສຶກສາ ລວມໄປເຖິງສະຖາບັນການສຶກສາຫຼາຍແຫ່ງຕ້ອງໄດ້ປິດຊົ່ວຄາວເຊັ່ນດຽວກັນ ເຮັດໃຫ້ເກີດມີຫຼາຍບັນຫາທີ່ເປັນຄຳຖາມໃນສັງຄົມ ແລະ ຄວາມບໍ່ເຂົ້າໃຈຂອງພໍ່ແມ່ຜູ້ປົກຄອງ ແມ່ນກະທັ້ງຕົວນັກຮຽນ-ນັກສຶກສາເອງ ກໍຍັງບໍ່ເຂົ້າໃຈເຫດຜົນຂອງການໂຈະຮຽນຊົ່ວຄາວ ເຊິ່ງໃນຄວາມເປັນຈິງການພັກຮຽນຊົ່ວຄາວໃນຄັ້ງນີ້ ກໍຍ້ອນຄວາມເປັນຫວ່ງເປັນໄຍຂອງພັກ-ລັດຖະບານ ໃນການສະກັດກັ້ນການແຜ່ລະບາດຂອງພະຍາດ ບໍ່ໃຫ້ຜູ້ຄົນໄດ້ມີໂອກາດເຕົ້າໂຮມກັນຫຼາຍ ເພາະມັນເກີດຄວາມສ່ຽງຕໍ່ການດູແລບັນຫາຂອງສຸຂະພາບ ການແຜ່ລະບາດຂອງພະຍາດໄດ້ໄວ້.
ແຕ່ໃນສະພາບຄວາມເປັນຈິງປາກົດໃຫ້ເຫັນ ພໍໂຮງຮຽນພັກ ບັນດານັກຮຽນ-ນັກສຶກສາຈຳນວນຫຼວງຫຼາຍ ພັດຖືໂອກາດເປັນການພັກຜ່ອນຊອກຫາທ່ຽວຫຼິ້ນ ນັດພົບປະສັງສັນ ຫຼື ບໍ່ກໍຖືໂອກາດໄປຫາທ່ຽວໃນສະຖານທີ່ຊຸມຊົນ ໂດຍບໍ່ເອົາໃຈໃສ່ໃນການປ້ອງກັນຕົວເອງ ເຖິງຢ່າງໃດກໍດີ ພໍ່ແມ່ ຜູ້ປົກຄອງ ອຳນາດການປົກຄອງ ຄວນອະທິບາຍແນະນຳ ສ້າງຄວາມເຂົ້າໃຈທີ່ຖືກຕ້ອງຄືນໃໝ່ ບໍ່ປ່ອຍປະລະເລີຍໃຫ້ລູກຫຼານ ຕ້ອງມີຄວາມສ່ຽງໃນການຕິດພະຍາດດັ່ງກ່າວ ໄປພ້ອມກັບສະຖາບັນການສຶກສາຫຼາຍແຫ່ງ ກໍມີມາດຕະການໃນການສິດສອນ ສົ່ງຄວາມຮູ້ຜ່ານທາງເອເລັກໂຕຣນິກ ຕາມເງື່ອນໄຂ ແຕ່ທັງນີ້ກໍຕ້ອງໄດ້ຮັບການຮ່ວມມືຈາກພໍ່ແມ່ຜູ້ປົກຄອງສັງຄົມ ຕ້ອງຊ່ວຍກັນເປັນເຈົ້າການນຳກັນ ເພື່ອເຮັດໃຫ້ການຈັດຕັ້ງຜັນຂະຫຍາຍເນື້ອໃນຈິດໃຈແຈ້ງການຕ່າງໆ ໃນການຕ້ານ ແລະ ສະກັດກັ້ນການແຜ່ລະບາດຂອງພະຍາດດັ່ງກ່າວ ສາມາດຈັດຕັ້ງປະຕິບັດໄດ້ຢ່າງເຂັ້ມງວດ ພ້ອມກັນມີສະຕິ ຕ້ອງໃຊ້ກາລະໂອກາດນີ້ ສຶກສາຄົ້ນຄວ້າຮ່ຳຮຽນເພີ່ມ ເພື່ອປັບປຸງແກ້ໄຂການຮຽນ ບົດຮຽນ ວິຊາໃດທີ່ຕົນເອງຍັງເຫັນວ່າບໍ່ດີເທົ່າທີ່ຄວນ ກໍສຶກສາຄົ້ນຄວ້າຮ່ຳຮຽນຄືນ ຢ່າເມົາມົວເຫັນແກ່ການຫຼິ້ນ ການທ່ຽວ ສຸມໃສ່ການຄົ້ນ ຄວ້າຮ່ຳຮຽນໃຫ້ຫຼາຍຂຶ້ນ ເພື່ອພ້ອມກັນສາມາດຜ່ານວິກິດການໃນຄັ້ງນີ້ໄປດ້ວຍກັນ.
ນຳສະເໜີໂດຍ: ແວ່ນຂາວ