ພົບກັນປະຈຳວັນນີ້ ຜູ້ຂຽນໄດ້ສັງລວມຂໍ້ມູນກ່ຽວກັບນະໂຍບາຍ ກໍຄື ມາດຕະການດ້ານພາສີຂອງປະເທດ ສະວິດ (ສະວິດເຊີແລນ) ອິດສະລາແອນ ແລະ ອັງກິດ ມາເລົ່າສູ່ຟັງໃນບັນຍາກາດທີ່ປະເທດພວກເຮົາໃຫ້ຄວາມສຳຄັນເປັນເລີດ ເພື່ອເຮັດໃຫ້ລາຍຮັບງົບປະມານຈາກພາສີມີຄວາມໝັ້ນຄົງຍືນຍົງ ແລະ ໂປ່ງໃສ.
ທີ່ປະເທດສະວິດ: ປະເທດນ້ອຍໆໃນເອີຣົບ ແຕ່ອຸດົມຮັ່ງມີໃນລະດັບຫົວແຖວຂອງບັນດາປະເທດໃນໂລກນີ້ ໄດ້ເລີ່ມການປະຕິຮູບລະບົບພາສີ ຕິດພັນກັບການລະບົບບຳນານເປັນຄັ້ງທຳອິດ ໃນຮອບ 20 ປີ ເມື່ອທ້າຍປີ 2017 ທີ່ຈຳເປັນຕ້ອງມີການປະຕິຮູບກໍເພາະວ່າ ຈຳນວນຜູ້ເຖົ້າໄວບຳນານໃນປະເທດນີ້ ໄດ້ເພີ່ມຂຶ້ນບໍ່ດຸນດ່ຽງກັບລາຍຮັບພາສີທີ່ໃຊ້ຈ່າຍສຳລັບຂະແໜງສະຫວັດດີການ ນອກຈາກນັ້ນ ບັນຫາດອກເບ້ຍຕ່ຳຍັງໄດ້ສົ່ງຜົນກະທົບຕໍ່ກອງທຶນບຳນານອີກດ້ວຍ ການປະຕິຮູບລະບົບພາສີຖືເປັນເລື່ອງໃຫຍ່ ດັ່ງນັ້ນ ທາງການປະເທດນີ້ຈຶ່ງໄດ້ຈັດໃຫ້ປະຊາຊົນລົງປະຊາມະຕິຕໍ່ການປະຕິຮູບດັ່ງກ່າວ ໃນວັນທີ 24 ກັນຍາ ປີ 2017 ໃນແຜນປະຕິຮູບນີ້ ລັດຖະບານສະວິດ ໄດ້ສະເໜີຂຶ້ນພາສີມູນຄ່າຈາກ 8% ເປັນ 8,3% ຫັກເງິນປະກັນສັງຄົມຈາກຄ່າຈ້າງ ເພີ່ມຈາກ 10,25% ເປັນ 10,55% ແລະ ສຳຄັນແມ່ນໄດ້ເພີ່ມອາຍຸພາສີຂອງຜູ້ຍິງຈາກ 64 ປີ ເປັນ 65 ປີ ເທົ່າຜູ້ຊາຍ.
ທີ່ອິດສະຣາແອນ: ເລີ່ມແຕ່ກາງເດືອນພະຈິກ ປີ 2017 ອົງການພາສີແຫ່ງຊາດ ອິດສະຣາແອນ ໄດ້ຮັບຮອງເອົາແຜນເກັບພາສີຈາກບັນດາກຸ່ມບໍລິສັດ ອິນເຕີເນັດຂະໜາດໃຫຍ່ ໃນນັ້ນ ລວມມີ ບໍລິສັດ ກູເກິນ (Google) ແລະ ເຟດບຸກ (Facebook) ຂອງສະຫະລັດອາເມຣິກາ ອິດສະຣາແອນເປັນຄູ່ຮ່ວມກັບສະຫະພາບເອີຣົບໃນການຄຸ້ມຄອງພາສີ ກັບບັນດາກຸ່ມບໍລິສັດເຕັກໂນໂລຊີຂະໜາດໃຫຍ່ຂອງໂລກ ແຜນເກັບພາສີນີ້ ເລີ່ມດ້ວຍການເກັບກຳຂໍ້ມູນເອກະສານ ແລະ ຂ່າວສານຕ່າງປະເທດ ເພື່ອຕີລາຄາ ແລະ ກຳ ນົດໃບບິນເກັບພາສີຈາກສອງບໍລິສັດດັ່ງກ່າວ ໃນປີ 2018 ນອກຈາກປະເທດ ອິດສະຣາແອນແລ້ວ ບັນ ດາປະເທດໃນເອີຣົບ ກໍໄດ້ລິເລີ່ມແຜນເກັບພາສີກັບບໍລິສັດ ອິນເຕີເນັດຂະໜາດໃຫຍ່ເຊັ່ນກັນ.
ທີ່ອັງກິດ: ມີຂ່າວຈາກອັງກິດວ່າ ໃນສະໄໝທ່ານນາງ ເຕເຣຊາ ເມ ເປັນນາຍົກລັດຖະມົນຕີ ອັງກິດ ໄດ້ເອົາມາດຕະການເຄັ່ງຄັດ ແລະ ເດັດຂາດຕໍ່ຜູ້ທີ່ຫຼົບຫຼີກການເສຍພາສີດ້ວຍໂທດປັບໄໝ ຊຶ່ງອາດສູງເຖິງ 200% ຂອງຈຳນວນເງິນທີ່ບໍ່ໄດ້ແຈ້ງ ຫຼື ເງິນທີ່ຄ້າງຈ່າຍພາສີ ຂ່າວນີ້ມີຂຶ້ນໃນທ້າຍເດືອນສິງຫາ ປີ 2016 ແລະ ໄດ້ບອກວ່າ ທາງການອັງກິດໄດ້ກຳນົດເສັ້ນຕາຍສຳລັບແຈ້ງຈຳນວນເງິນທີ່ປິດບັງໄວ້ກ່ອນເດືອນກັນຍາ ປີ 2018 ບໍ່ຊັ້ນຈະຕ້ອງຖືກປັບໄໝ ໃນການປະຕິບັດມາດຕະການປັບໄໝດັ່ງກ່າວ ທ່ານນາຍົກລັດຖະມົນຕີ ແລະ ກະຊວງການເງິນອັງກິດ ໄດ້ມອບສິດຫຼາຍຂຶ້ນໃຫ້ບັນດາອົງການກວດສອບພາສີຮັບຜິດຊອບ ຕິດຕາມບັນຫາການຫຼີກລ່ຽງພາສີ ນອກຈາກໂທດປັບໄໝແລ້ວ ບຸກຄົນ ກໍຄື ບໍລິສັດທີ່ມີຄວາມຜິດຍັງອາດຖືກລະບຸຊື່ເພື່ອໃຫ້ທົ່ວສັງຄົມຊາບ ແນວໃດກໍດີ ມາດຕະການລົງໂທດນີ້ ກໍຍັງມີການໂຍະຍານຢູ່ ຄື ຖ້າຜູ້ມີຄວາມຜິດຍອມແຈ້ງອອກມາຢ່າງໂປ່ງໃສ ແລະ ສາມາດພິສູດໄດ້ວ່າ ພວກເຂົາບໍ່ໄດ້ມີເຈດຕະນາຫຼົບຫຼີກພາສີການປັບໄໝ ກໍຈະຫຼຸດລົງເປັນສູນເປີເຊັນ (0%).