ທີມຊາດລາວ ຮຸ່ນອາຍຸບໍ່ເກີນ 19 ປີ (U-19) ຊຸດກຽມຄວາມພ້ອມເຂົ້າຮ່ວມແຂ່ງຂັນບານເຕະຊາຍ ຮຸ່ນອາຍຸບໍ່ເກີນ 19 ປີ ຊີງແຊັມອາຊີ 2020 ຮອບສຸດທ້າຍ ເດີນທາງໄປອຸ່ນເຄື່ອງ ຢູ່ແຂວງຈຳປາສັກ 2 ນັດໂດຍນັດທຳອິດ ວັນທີ 28 ສິງຫາ 2020 ເອົາຊະນະ ທີມຕູ່ ຂົນສົ່ງ ແຊັມບານເຕະຊີງຂັນເຈົ້າແຂວງຈຳປາສັກ ຮຸ່ນອາຍຸບໍ່ເກີນ 19 ປີ 2-0 ປະຕູ ນັດທີ 2 ວັນທີ 30 ສິງຫາ 2020 ສະເໝີ ປກສ ແຂວງຈຳປາສັກ ແຊັມບານເຕະຊີງຂັນເຈົ້າແຂວງຈຳປາສັກ ຮຸ່ນທົ່ວໄປ 1-1 ປະຕູ ໂດຍທີມຊາດລາວ ໄດ້ປະຕູຈາກ ບຸນມີ ປິ່ນແກ້ວ ນາທີ 2 ສ່ວນ ປກສ ແຂວງ ໄດ້ປະຕູຈາກການຍິງຈຸດໂທດຂອງ ອຸດົມສິດ ສິງລາດສົມບູນ ນາທີ 47.
ການແຂ່ງຂັນບານເຕະຊາຍ U-19 ຊີງແຊັມອາຊີ 2020 ຮອບສຸດທ້າຍ ຢູ່ປະເທດອຸດສະເບກິດສະຖານ U-19 ທີມຊາດລາວ ຢູ່ກຸ່ມ C ຮ່ວມກັບ ຊາອຸດີອາຣາເບຍ ແຊັມເກົ່າ ອົດສະຕຣາລີ ແຊັມອາຊຽນ ຄັ້ງຫຼ້າສຸດ ແລະ ຫວຽດນາມ ໂດຍນັດທີ 1 ທີມຊາດລາວ ພົບ ຊາອຸດີອາຣາເບຍ ນັດທີ 2 ພົບ ອົດສະຕຣາລີ ນັດທີ 3 ພົບ ຫວຽດນາມ ໂດຍການແຂ່ງຂັນຈະຈັດຂຶ້ນວັນທີ 14-31 ຕຸລາ 2020 ສ່ວນວັນ ແລະ ເວລາແຂ່ງຂັນໃນຮອບແບ່ງກຸ່ມ ຝ່າຍຈັດການແຂ່ງຂັນຈະແຈ້ງໃຫ້ຊາບໃນໄວໆນີ້.
U-19 ທີມຊາດລາວ ສາມາດຜ່ານການຄັດເລືອກ ກ້າວສູ່ຮອບສຸດທ້າຍລາຍການນີ້ຄັ້ງທຳອິດ ໃນຮອບ 46 ປີ ຕໍ່ຈາກປີ 1974 ນີ້ເປັນຄັ້ງທີ 5 ທີ່ໄດ້ເຂົ້າມາຫຼິ້ນ ໃນຮອບສຸດທ້າຍ ຕໍ່ຈາກປີ 1969 1970 1972 ແລະ 1974 ຜົນງານດີສຸດເຂົ້າຮອບ 8 ທີມ ໃນປີ 1972 ການແຂ່ງຂັນບານ ເຕະຊາຍ U-19 ຊີງແຊັມອາຊີ ປີ 2020 ຮອບສຸດທ້າຍ ມີ 16 ທີມ ທີ່ຜ່ານການຄັດເລືອກ ແບ່ງເປັນ 4 ກຸ່ມ ແຂ່ງພົບກັນ ໝົດໃນກຸ່ມ ແລ້ວຄັດເອົາທີ 1 ແລະ ທີ 2 ຂອງກຸ່ມເຂົ້າຮອບ 8 ທີມສຸດທ້າຍ ທີມທີ່ຕິດອັນດັບ 1-4 ຈະໄດ້ສິດເປັນຕົວແທນທະວີບອາຊີ ໄປແຂ່ງຂັນບານເຕະຊາຍ U-20 ປີ ຊີງແຊັມໂລກ 2021 ຢູ່ປະເທດອິນໂດເນເຊຍ.