ເທດສະການອາຫານທີ່ສູນການຄ້າ ວຽງຈັນເຊັນເຕີ ຄັ້ງທີ 4 (Vientiane Center Food Fun Fair and Vientiane Center Dance Contest ຄັ້ງທີ 4) ຈັດຂຶ້ນໃນລະຫວ່າງວັນທີ 27 ສິງຫາ – ວັນທີ 2 ກັນຍາ 2020 ທີ່ສູນການຄ້າວຽງຈັນເຊັນເຕີ ນະຄອນຫຼວງວຽງຈັນ ໂດຍມີທ່ານນາງ ນວນສີ ມະຫັດທະນະວິໂຣດ ຮອງຜູ້ອຳນວຍການ ສູນການຄ້າວຽງຈັນເຊັນເຕີ ພ້ອມດ້ວຍບັນດາຜູ້ບໍລິຫານສູນການຄ້າວຽງຈັນເຊັນເຕີ ແຂກຖືກເຊີນ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ງານຄັ້ງນີ້ ຈັດຂຶ້ນເພື່ອຮວມອາຫານ ເຄື່ອງດື່ມ ແລະ ຂະໜົມຈາກໂຮງແຮມ 5 ດາວ ຮ້ານອາຫານຊື່ດັງຫຼາຍກວ່າ 30 ຮ້ານທີ່ເຂົ້າຮ່ວມງານ ເອົາໃຈທ່ານທີ່ມັກໃນການກິນ ໂດຍສະເພາະ ພາຍໃນງານຍັງມີການໃຫ້ຄວາມຮູ້ ການສາທິດເຮັດອາຫານ ແລະ ຂະໜົມ ພ້ອມກັນນັ້ນ ກໍມີກິດຈະກຳເຕັ້ນປະກອບເພງ (Dance Contest) ເປັນການແຂ່ງຂັນປະຈຳປີຂອງສູນການຄ້າວຽງຈັນເຊັນເຕີ ເຊິ່ງໄດ້ຈັດຂຶ້ນຕິດຕໍ່ກັນເປັນປີທີ 4 ແລ້ວ ເພື່ອຊິງເງິນລາງວັນຫຼາຍກວ່າ 10 ລ້ານກີບ ເພື່ອໃຫ້ທຸກທ່ານໄດ້ເພີດເພີນໄປກັບກິດຈະກຳການເຕັ້ນ ພ້ອມທັງອີ່ມທ້ອງ ອີ່ມຕາ ພາຍໃນງານດຽວກັນ ເຊິ່ງກິດຈະກຳ Vientiane Center Dance Contest ໃນປີນີ້ຈະແບ່ງອອກເປັນ 2 ປະເພດຄື: Cover Dance ແລະ All Style Battle ຮອບຄັດເລືອກສາຍ A Cover Dance ວັນທີ 27 ສິງຫາ 2020 ເລີ່ມເວລາ 15:00 ໂມງເປັນຕົ້ນໄປ ຮອບຄັດເລືອກສາຍ B Cover Dance ວັນທີ 29 ສິງຫາ 2020 ເວລາ 15:00 ໂມງເປັນຕົ້ນໄປ ຮອບຮອງຊະນະເລີດ ວັນທີ 30 ສິງຫາ 2020 ເລີ່ມເວລາ 15:00 ໂມງເປັນຕົ້ນໄປ ສ່ວນຮອບຊິງຊະນະເລີດ ຈະມີຂຶ້ນວັນທີ 2 ກັນຍາ 2020 ເລີ່ມແຕ່ເວລາ 15:00 ໂມງເປັນຕົ້ນໄປ.
