ເຟສບຸກ ແລະ ກອງເລຂາຄະນະກຳມາທິການແມ່ນ້ຳຂອງສາກົນ (ຄມສ) ໄດ້ລິເລີ່ມການຮ່ວມມືກັນ ເພື່ອສະໜອງຂໍ້ມູນການເຕືອນໄພນ້ຳຖ້ວມລ່ວງໜ້າ ແລະ ການຕິດຕາມໄພແຫ້ງແລ້ງໃຫ້ຊຸມຊົນ ແລະ ລັດຖະບານໃນເຂດລຸ່ມແມ່ນ້ຳຂອງ ວັນທີ 31 ສິງຫາ 2020.
ການຮ່ວມມືຄັ້ງທຳອິດນີ້ ແນໃສ່ສ້າງຄວາມຮັບຮູ້ໃຫ້ປະຊາຊົນທົ່ວໄປໃນ 4 ປະເທດສະມາຊິກ ຄມສ ຄື: ລາຊະອານາຈັກກຳປູເຈຍ ສປປ ລາວ ລາຊະອານາຈັກໄທ ແລະ ສສ ຫວຽດນາມ ກ່ຽວກັບລະບົບຂໍ້ມູນຂ່າວ-ສານກ່ຽວກັບໄພນ້ຳຖ້ວມ ແລະ ໄພແຫ້ງແລ້ງຂອງ ຄມສ ແລະ ເພື່ອສ້າງຄວາມສາມາດໃຫ້ເຈົ້າໜ້າທີ່ກ່ຽວຂ້ອງ ໃນການນຳໃຊ້ລະບົບດີຈີຕອນອອນລາຍ ແຕ່ປີ 2020-2021.
ທ່ານນາງ ຊານຕິ ອາເລັກຊານເດີ ຜູ້ຈັດການດ້ານຊຸມຊົນ ອາຊີ-ປາຊີຟິກ ຂອງເຟສບຸກ ກ່າວວ່າ: ພວກເຮົາກຳລັງຊອກຫາວິທີໃໝ່ໆ ເພື່ອສະໜັບສະໜູນການພັດທະນາໃນລະດັບພາກພື້ນຢູ່ໃນເຟສບຸກ ດ້ວຍຊຸດເຄື່ອງມືທີ່ສະໜັບສະໜູນຊຸມຊົນໃນການກະກຽມຕອບໂຕ້ ແລະ ຟື້ນຟູຈາກໄພພິບັດ ແລະ ສ້າງຄວາມຍືດຍຸ່ນ ພວກເຮົາມີຄວາມຍິນດີທີ່ໄດ້ຮ່ວມມືກັບ ຄມສ ເພື່ອແຈ້ງໃຫ້ປະຊາຊົນຫຼາຍລ້ານຄົນໃນພາກພື້ນໄດ້ຮັບຮູ້ ແລະ ກຽມຄວາມພ້ອມຕໍ່ກັບໄພນ້ຳຖ້ວມ ແລະ ໄພແຫ້ງແລ້ງ.
ທ່ານ ອານຸລັກ ກິດຕິຄຸນ ຫົວໜ້າວາງແຜນຍຸດທະສາດ ແລະ ການຮ່ວມມືຂອງ (ຄມສ) ກ່າວວ່າ: ພວກເຮົາເຫັນຄວາມສຳຄັນທີ່ສຸດ ໃນການສະໜອງຂໍ້ມູນທີ່ວ່ອງໄວ ແລະ ໜ້າເຊື່ອຖື ກ່ຽວກັບລະດັບນ້ຳໃຫ້ບັນດາປະເທດແມ່ນ້ຳຂອງ ແລະ ຊຸມຊົນທີ່ປະສົບກັບໄພນ້ຳຖ້ວມ ແລະ ໄພແຫ້ງແລ້ງ ແລະ ສະພາບອາກາດປ່ຽນແປງຕະຫຼອດເວລາ ເພື່ອໃຫ້ພວກເຂົາເຫຼົ່ານັ້ນສາມາດຮັບມື ເພື່ອຫຼີກລ່ຽງ ຫຼື ຫຼຸດຜ່ອນຄວາມສ່ຽງໄດ້ທັນເວລາ ແລະ ກະກຽມການຕອບໂຕ້ທີ່ມີປະສິດທິຜົນ.
ເຟສບຸກ ຈະເຝິກອົບຮົມໃຫ້ເຈົ້າໜ້າທີ່ກ່ຽວຂ້ອງຈາກ 4 ປະເທດສະມາຊິກ ຄມສ ກ່ຽວກັບວິທີການໃຊ້ເຄື່ອງມືດິຈິຕອນທີ່ແຕກຕ່າງກັນ ເພື່ອໃຫ້ສື່ສານຢ່າງມີປະສິດທິຜົນ ແລະ ວ່ອງໄວ ລະຫວ່າງ ແລະ ຫຼັງເກີດໄພພິບັດ ເຊິ່ງຈະປະກອບມີການເຝິກອົບຮົມກ່ຽວກັບແຜນທີ່ປະຊາກອນຂອງເຟສບຸກ (Facebook’s Population Density Maps) ເຊິ່ງເປັນແອັບພລີເຄຊັ່ນທີ່ໃຊ້ເຕັກນິກ ພາບຄອມພິວເຕີທີ່ທັນສະໄໝ (State-of-the-art computer Visual Techniques) ເພື່ອສັງລວມຂໍ້ມູນທີ່ມີຢູ່ໃນສາທາລະນະ ແລະ ພາກສ່ວນທຸລະກິດ ເຂົ້າກັບຄວາມສາມາດທາງປັນຍາປະດິດ (AI) ຂອງເຟສບຸກ ແຜນທີ່ນີ້ ແມ່ນມີລາຍລະອຽດ 3 ເທົ່າກວ່າແຫຼ່ງທີ່ມີຢູ່.