ໄລຍະຜ່ານມາ ກອງບັນຊາການປ້ອງກັນຄວາມສະຫງົບ (ປກສ) ເມືອງຫາດຊາຍຟອງ ໄດ້ເອົາໃຈໃສ່ປະຕິບັດບັນດາຄາດໝາຍສູ້ຊົນຂອງມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກນະຄອນຫຼວງວຽງຈັນ ກໍຄືເມືອງວາງອອກເປັນໃຫ້ເປັນຮູບປະທຳ ເປັນຕົ້ນ ການເພີ່ມທະວີບົດບາດການນຳພາຂອງຄະນະພັກ ຄະນະບັນຊາການຕິດພັນກັບວຽກງານວິຊາສະເພາະຂອງຕົນ.
ສະຫາຍພັນໂທ ແສງທອງ ເກື້ອບຸນລ້ຳ ເລຂາຄະນະພັກຮາກຖານ ຫົວໜ້າກອງບັນຊາການ ປກສ ເມືອງຫາດຊາຍຟອງ ໄດ້ລາຍງານຕໍ່ກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງຫາດຊາຍຟອງ ວັນທີ 27 ສິງຫາ 2020 ຜ່ານມາວ່າ ຕະຫຼອດໄລຍະ 5 ປີຜ່ານມາ ທົ່ວເມືອງມີຄະດີເກີດຂຶ້ນ 1.465 ເລື່ອງ ແກ້ໄຂໄດ້ 1.158 ເລື່ອງ ກັກຕົວມາດຳເນີນຄະດີໄດ້ 1.201 ຄົນ ຍິງ 71 ຄົນ ໃນນີ້ ຄະດີເກີດຂຶ້ນຫຼາຍກວ່າໝູ່ແມ່ນລັກຊັບພົນລະເມືອງ ຄ້າ-ຂາຍຢາເສບຕິດ ນັກເລງອັນຕະພານ ບັນຫາອຸບັດເຫດ ແລະ ອື່ນໆ ໄດ້ສ້າງຜົນເສຍຫາຍທີ່ເກີດຂຶ້ນແກ່ຊັບສິນຂອງລັດ ລວມໝູ່ ແລະ ພົນລະເມືອງ ມີລົດຈັກ 346 ຄັນ ລົດໃຫຍ່ 4 ຄັນ ປືນສັ້ນ 2 ກະບອກ ເງິນກີບ 500 ລ້ານກວ່າກີບ ເງິນບາດ 1 ລ້ານກວ່າບາດ ເງິນໂດລາ 21.000 ກວ່າໂດລາ ຄຳຮູບປະພັນໜັກ 75 ບາດ ໂທລະສັບ 82 ໜ່ວຍ ເລີກຮື້ກຸ່ມແກ້ງລັກລົດຈັກໄດ້ 38 ກຸ່ມ ກັກຕົວໄດ້ 136 ຄົນ ແລະ ວັດຖຸອື່ນໆອີກຈຳນວນໜຶ່ງ ປັດຈຸບັນ ສາມາດເກັບກູ້ຂອງກາງຄືນປະເພດລົດຈັກໄດ້ 110 ຄັນ ລົດໃຫຍ່ 1 ຄັນ ເງິນກີບໄດ້ 92 ລ້ານກວ່າກີບ ໂທລະສັບ 42 ໜ່ວຍ ປືນສັ້ນ 2 ກະບອກ.
ສະເພາະຄະດີຢາເສບຕິດ ສາມາດມ້າງໄດ້ 510 ເລື່ອງ ກັກຕົວໄດ້ 667 ຄົນ ຄະດີລາຍໃຫຍ່ສາມາດມ້າງໄດ້ 6 ລາຍ ກັກຜູ້ຕ້ອງຫາໄດ້ 9 ຄົນ ສົມທົບແກ້ໄຂພວກມົ້ວສຸມຢາເສບຕິດໄດ້ 205 ລາຍ ຜູ້ຕ້ອງຫາ 194 ຄົນ ສຶກສາອົບຮົມແລ້ວມອບໃຫ້ຜູ້ປົກຄອງ 104 ຄົນ ຢຶດຂອງກາງທີ່ພົວພັນກັບຢາເສບຕິດປະເພດຢາບ້າໄດ້ 403.678 ເມັດ ຢາໄອສ໌ 46.884 ກຣາມ ກັນຊາອັດແທ່ງ 14 ແທ່ງ ລົດໃຫຍ່ 5 ຄັນ ລົດຈັກ 32 ຄັນ ປືນເຊກາເຊດັດແປງ 1 ກະບອກ ພ້ອມລູກປືນ 6 ລູກ ປືນສັ້ນຫັນລີ 38 ຈຳນວນ 1 ກະບອກພ້ອມລູກປືນ 33 ລູກ ປືນສັ້ນດັດແປງ 10 ກະບອກ ພ້ອມລູກປືນ 159 ລູກ ເງິນກີບ 195 ລ້ານກວ່າກີບ ເງິນບາດ 4 ແສນກວ່າບາດ ເງິນໂດລາ 1.000 ກວ່າໂດລາ ແລະ ໂທລະສັບມືຖື 12 ໜ່ວຍ.