ວັນທີ 28 ສິງຫາ 2020 ທ່ານ ພັນເອກ ທິມສາວ ດວງຈຳປາ ຫົວໜ້າບັນນາທິການວາລະສານປ້ອງກັນຊາດ ກະຊວງປ້ອງກັນປະເທດ ພ້ອມຄະນະ ໄດ້ເຂົ້າອວຍພອນທ່ານ ນາງ ແກ້ວຊ້ອນ ຈັນທະນາມ ຫົວໜ້າບັນນາທິການໜັງສືພິມວຽງຈັນໃໝ່ ພະແນກຖະແຫຼງຂ່າວ ວັດທະນະທຳ ແລະ ທ່ອງທ່ຽວ ນະຄອນຫຼວງວຽງຈັນ ພ້ອມຄະນະ ໃນໂອກາດວັນສ້າງຕັ້ງໜັງສືພິມວຽງຈັນໃໝ່ ຄົບຮອບ 45 ປີ (1/9/1975-1/9/2020).
ໂອກາດນີ້ ທ່ານ ພັນເອກ ທິມສາວ ດວງຈຳປາ ໄດ້ກ່າວອວຍພອນ ແລະ ສະແດງຄວາມຊົມເຊີຍມາຍັງຄະນະບັນນາທິການ ແລະ ພະນັກງານໜັງສືພິມວຽງຈັນໃໝ່ ທີ່ປະຕິບັດໜ້າທີ່ວຽກງານວິຊາສະເພາະຂອງຕົນ ສາມາດຍາດໄດ້ຜົນອັນພົ້ນເດັ່ນຫຼາຍດ້ານໃນຜ່ານມາ ທີ່ເປັນສື່ສິ່ງພິມໜຶ່ງທີ່ມີຊື່ສຽງຢູ່ໃນອັນດັບຕົ້ນໆ ໃນການໂຄສະນາເຜີຍແຜ່ແນວທາງນະໂຍບາຍຂອງພັກ ກົດໝາຍຂອງລັດ ແລະ ຂໍ້ມູນຂ່າວສານຕ່າງໆໃຫ້ສັງຄົມ ກໍຄືປະຊາຊົນບັນດາເຜົ່າໄດ້ຮັບຮູ້ຢ່າງກວ້າງຂວາງ ໂດຍສະເພາະ ປະຊາຊົນນະຄອນຫຼວງວຽງຈັນ ໃນນາມເປັນກະບອກສຽງຂອງອົງຄະນະພັກນະຄອນຫຼວງວຽງຈັນ.
ທ່ານ ນາງ ແກ້ວຊ້ອນ ຈັນທະນາມ ຕາງໜ້າໃຫ້ຄະນະບັນນາທິການ ແລະ ພະນັກງານໜັງສືພິມວຽງຈັນໃໝ່ ໄດ້ສະແດງຄວາມຂອບອົກຂອບໃຈ ມາຍັງຄະນະບັນນາທິການວາລະສານປ້ອງກັນຊາດ ທີ່ມາອວຍພອນໜັງສືພິມວຽງຈັນໃໝ່ຄັ້ງນີ້ ເປັນການສະແດງໃຫ້ເຫັນເຖິງຄວາມສາມັກຄີຮັກແພງໃນນາມສື່ດ້ວຍກັນ ແລະ ໃນອະນາຄົດ ຈະກ້າວໄປເຖິງການພົວພັນຮ່ວມມືທີ່ດີນຳກັນລະຫວ່າງສອງສື່ ເປັນຕົ້ນການແລກປ່ຽນຖອດຖອນບົດຮຽນວຽກງານວິຊາສະເພາະ ແລະ ອື່ນໆ ໃນສະພາບປັດຈຸບັນ ທີ່ສື່ດັ່ງເດີມກຳລັງປະເຊີນໜ້າກັບສິ່ງທ້າທາຍ ພວກເຮົາຕ້ອງຮ່ວມກັນຜ່ານຜ່າໄປດ້ວຍດີ ແລະ ພ້ອມກັນປະຕິບັດໜ້າທີ່ການເມືອງຮັບໃຊ້ພັກ-ລັດ ແລະ ສັງຄົມຕະຫຼອດໄປ.